ISAÍAS 55 - Guarani Bible with DC

Mboroparareko jepɨmbae opaete pegua

1Opaete iɨuve vae reta: Peyu peɨu;

jare mbaetɨ ikorepoti vae reta, peyu jare pekaru.

Peyu, peraja pekorepotimbae reve jare jepɨmbae reve, vino jare neche.

2¿Maera pa peiporu pekorepoti, tembiumbae re,

jare peparavɨkɨ, mbae pemoangapɨɨmbae re?

Peyeapɨsaka kavi cheré, jare peu tembíu kavi,

peu tembíu jëe ngatu vae.

3Pemboɨke peapɨsa, peyeapɨsaka,

peyu chekotɨ jare peikoveta;

jare ayapota pe reta ndive, morogüɨrökuavee päve opambae,

mboroparareko jekuae avei pegua David pe ayapo vae.

4Mase, che ko añono imiari vaerä tëta reta pe,

oiko vaerä mburuvicha guasurä jare tëtaguasu reta imboearä.

5Mase, reenɨita kuimbae reikuaambae reta,

jare kuimbae ndekuaambae reta yogüeruta ndekotɨ,

che ndeYa Tumpa jeko pegua, Iyoambae Israel pegua ndemboeteuka vae jeko pegua.

6“Eeka yandeYa ipuere oñeväe ramboeve,

eenɨi köi oï ramboeve.

7Iyoa vae toyepoepɨ,

jare kuimbae ipɨapochɨ yae vae toeya iyemongeta,

jare toyerova ye yandeYa kotɨ,

jare jae iporopararekota jese,

jare ñaneTumpa kotɨ, echa jae ipɨakavi avei iñɨ̈ro vaerä.

8YandeYa jei: Cheyemongeta reta mbaetɨ ko peyemongeta reta rami,

jare perape reta, mbaetɨ cherape rami.

9Ara ɨvate yae ko ɨvɨ güi,

jökorai ko cherape reta ɨvate yae perape reta güi,

jare cheyemongeta reta peyemongeta reta güi.”

10“Echa ama jare iroɨ oa ara güi rami,

jare mbaetɨ ojo ye jokotɨ, jaeño omoäkɨ ɨvɨ,

jare omojeñɨi temitɨ reta jare omboia,

jare omee jäɨgüe omaetɨ vae pe,

jare tembíu okaru vae pe,

11jökoraita ko cheñee oë cheyuru güi vae;

ngaraa ou ye jökoraiño chekotɨ,

oyapota ko che aipota vae,

jare ikavita ko jókuae amondo chupe vae reta pe.

12Echa peyerovia katu reve kavi peëta,

jare mbɨakatu ndive peyerova yeta;

ɨvɨtɨ guasu reta jare ɨvɨtɨ reta otairarita perenonde,

jare opaete ɨvɨra reta ñana rupigua oyepopeteta.

13Ñurati jekovia pe oñemuñata ɨvɨra ciprés jee vae,

jare ïru ñana yuu reve vae reta jekovia pe okuakuaata ɨvɨra mí arrayán jee vae;

kuaekuae reta re yandeYa jee oyemboeteukata,

jare opɨta retata kañɨmaa opambae vaerä,

ngaraa ye ma oyemboai.”