ECLESIASTÉS 5 - Guarani Bible with DC

Ñererökuavee oyeapo rai voi vae regua

1Reo Tumpa jo pe yave, eyeandu reve eiko: Eya katu reyeapɨsaka vaerä, agüɨye eya mɨmba oyeyukagüe remee vaeräño, jókuae kuimbae reta yarakuaambae omee rami, echa mbaetɨ oikuaa reta ikavimbae ko oyapo ñogüɨnoi vae.

2Agüɨye eyeapo rai voi mbae rere vaerä, ndepɨa rupi ave agüɨye eñererökuavee voi Tumpa pe, echa Tumpa ko oï ɨvate jare nde ko reï ɨvɨ pe. Jáeramo mbovɨño nemiari,

3echa jeta ete yayemoambeko jese vae, yandembopaɨu pochɨ ko; jare jeta ñaneñee ñamoë yave, yae ñee ikavimbae.

4Tumpa pe mbae rerökuavee yave, agüɨye eäro rembopo vaerä, echa jae mbaetɨ ipɨakatu yarakuaambae reta re. Embopo jókuae rerökuavee vae,Dt 23.21-23; Sal 66.13-14.

5echa ikavi yae ko reñererökuavee yave rembopo vae, mbaetɨ rembopo vae güi.

6Agüɨye tandeyoa neñee rupi, agüɨye vaerä rere Tumpa jembiokuai jóvai: “Mbaetɨ aikuaa ramo ko ayavɨ.” ¿Maera pa Tumpa remboarasɨukata neñee jeko pegua jare omboai jókuae reyapogüe?

7Echa jeta yemongeta reyapo vae rupi jeta ñee reta mbaeä etei vae rere. Ërei jeseve nde, eipoɨu Tumpa güiño.

Ikaviä etei yandeve vae

8Metei tëtaguasu pe reecha yave paravete vae oyererekoasɨ katu jare jupigüe mbaetɨ oyeapo chupe yave, agüɨye nepɨakañɨ jese; echa metei mburuvicha re omae, ïru mburuvicha ma tuicha vae, jare ïru mburuvicha tuicha yae ete vae güɨnoi mbaepuere kuae mókoi reta re.

9¡Echa mbaravɨkɨ ko pegua ikavi ko opaete vae pegua, jare mburuvicha guasu ave vi ko oporomborɨta!

10Korepoti oaɨu yae vae, yangapɨɨä etei jese; oipota yae oikokatu vaerä, ngaraa mai ipɨakatu jókuae güɨnoigüe re. Kuaekuae mbaeä etei vi,

11echa jeta mbaembae ñanoi yave, jeta vi iua reta. ¿Mbae yé pa ñanoeta jókuae jeta mbaembae ñanoi vae güi, ñamae güire jese?

12Mbaravɨkɨ regua paravete vae, yepe michi okaru ani jeta okaru, ërei oke pɨagüive; ërei ngatu oikokatu vae, jeta mbaembae güɨnoi jeko pegua mbaetɨ oke pɨagüive.

13Oime mbae jasɨ katu yae ete kuae ɨvɨ pe aecha vae, jae ko: Oyemboikokatu vae jeta mbae omboatɨ, ërei oñererokomegua pɨpe vaerä ko,

14echa mbaetɨ yave oyeporu kavi, ipuere opaetei okañɨ, jare imichia reta peguarä mbaetɨ eteita mbae opɨta.

15Ichɨ jɨe güi inandi oa rami, jökorai ko ojo yeta, güɨrajambae reve oparavɨkɨ mbatee jese vae.Job 1.21; Sal 49.17; 1 Ti 6.7.

16Jókuae ikaviä yae ko, ou rami jökorai ojo yeta vae. ¿Mbae pa güɨnoe oparavɨkɨ mbateeiño vae?

17Jare opaete ara rupi mbaetɨ yeti okaru pɨagüive, oiko pɨtumimbi rupi rami, mbɨatɨtɨ rupi jare jasɨ katu rupi.

18Jayave, aecha ikavi yae vae jae ko: Yakaru kavi vae, yayerovia vaerä opaete yandeparavɨkɨagüe güi, kuae ɨvɨ pe yayemoambeko jese vae re, opaete ara Tumpa omee tekove yandeve ramboeve, echa jókuae ko jae yandeparavɨkɨ jekovia.

19Jökorai vi Tumpa omee opaete oikokatu vaerä vae reta pe, omee vi okaru kavi vaerä chugüi, oyekou vaerä iparavɨkɨ rupi güɨnoigüe re, echa Tumpa ko omee jókuae yekou.

20Echa Tumpa omboyekou ramboeve opaete mbaembae rupi jeko pegua, jókuae kuimbae mbaetɨ oyemoambeko jekove re.