TOBIT 9 - Guarani Bible with DC

Araɨgua Rafael ojo oeka korepoti

1Jayave Tobías oenɨi Rafael, jare jei chupe:

2“Chëi Azarías, ekua Ragues pe, irundɨ tembiokuai reta ndive jare eraja mókoi camello, ekua Gabael jëta pe. Emee chupe kuae kuatía yaru vae, eru jókuae korepoti, jare eru vi Gabael kuae menda iarete guasu pe.

3-4Nde reikuaa ko reï cheru ara ñavo ko oipapa güɨnoi kuae kotɨ aï vae, jaema metei ara amboasa ye yave, tätata ko ambopɨatɨtɨ. Jare ïru ye ko jae, Ragüel mbaetɨta omaeño aja. Jare che mbaetɨta chepuere aipɨaavɨ.”

5Jaema Rafael ojo irundɨ tembiokuai reta ndive jare mókoi camello ndive Ragüel Media pe. Ojo oväe reta yave ojo ogüeyɨ Gabael jëta pe, Rafael omee chupe kuatía güɨrajagüe vae jare imiari chupe Tobías, Tobit taɨ omendata oï vae, jare oparea chupe ojo vaerä menda arete pe. Jayave voi Gabael omboɨpɨ oipapa korepoti oñovatu güɨnoi vae, jare ombovoɨta camello reta.

6Pɨareve pe ndei köe mbove, mókoi reve yogüɨraja reta menda kotɨ.

Opa ye ojo oväe Ragüel jëta pe yave, oecha reta Tobías oguapɨ oï mesa iárambo. Jare opüa omee tamaraeme Gabael pe, jae oapïro omboete reve jare jei chupe: “Cheraɨ jaekavi yae ko kuimbae jupi vae, jare ipɨakavi yae vae ko. YandeYa ara pe oï vae tomee ndeve mbaeyekou jare nderembireko pe, nderembireko tu jare ichɨ pe vi. Tuicha ete vae ko Tumpa omee aecha cherëtara Tobit iñemuña.”