SALMOS 73 - Guarani Bible with DC

SALMO 73Tumpa ipɨakavi regua

1¡Añetete Tumpa ipɨakavi yae ko Israel kotɨ,

ipɨa pe mbaetɨ güɨnoi ikavimbae vae reta kotɨ!

2Ërei che, asɨrɨrɨ seri;

michi yae oata asɨrɨrɨ ete vaerä.

3Añemoägüɨro ramo jókuae ipɨayembotuicha vae reta re,

aecha ramboeve kërai yogüɨreko kavi iyoa vae reta.

4Jae reta mbaetɨ etei oyemongeta mano re,

oikove katu ñogüɨnoi vae jeko pegua.

5Mbaetɨ mbae oiporara reta ïru kuimbae reta rami,

mbaetɨ vi yogüɨrekoasɨ katu ïru kuimbae reta rami.

6Jáeramo, ipɨapochɨño ombotenonde reta,

oyemonde rami reta pɨarai pe.

7Ikɨra yae güi jesäɨ oë potaecha,

oasa ete ye güɨnoi ipɨa jemimbotaño.

8Opuka pukaño oyemongeta reta ikavimbae oyapo vaerä,

imiari reta ipɨarai re oyembotuicha reve.

9Jei reta mbae ikavimbae ara kotɨ,

jare jei reta mbae ikavimbae ɨvɨ pegua reta kotɨ.

10Jáeramo, Tumpa güeru yeta imbae vae reta kuae pe,

jare ɨ jetagüe oimeta chupe reta.

11Jare jei ipɨapochɨ vae reta: “¿Këraita pa oikuaa Tumpa?

¿Oikuaata yera Tuichagüe yae ete vae?”

12¡Mase kuae iyoa vae reta!

Yemboavaimbae reve güɨnoi reta jeta mbaeyekou.

13¡Chepɨa aitɨoiño ma,

mbaetɨ mbaerä ikavi cheve,

aitɨoño ma chepo opaete mbae ikavimbae güi!

14Echa añenupa avei,

aiporara ndeimbove ñavo.

15Che jae yave: “Tachemiari jae reta rami”,

ambotavɨta tëi ko ndembae vae reta cheTumpa.

16Ayemongeta kuae regua aikuaa vaerä yave,

yavai yae cheveguarä.

17Ërei aike ndero mbaemboetea pegua pe yave,

aikuaa këraita ko jae reta iyapɨ vae;

18reñono reta iïchɨi yaea pe;

reitɨ reta kañɨtei pe.

19¡Aramoete pegua opa okañɨtei reta!

¡Kɨɨye ndive opa okañɨtei reta!

20Ipaɨu güi opa vae rami,

jökorai, nde cheYa, reporojäa yave,

reröɨrota jókuae añete vae nunga oyekuaa vae.

21Mbɨatɨtɨ jasɨ katu vae rupi aiko,

chepɨa pe etei ayandu jasɨ,

22echa mbaetɨ che chearakuaa,

mbaetɨ aikuaa mbae;

¡metei mɨmba rami che nderóvai!

23Ërei jeseve, che aiko avei nde ndive;

nde chepoko cheakatu kotɨ.

24Chereroata ndeporomboarakuaa rupi,

jare cherekove iyapɨ pe chemboresiveta ikavi rupi.

25¿Oime ra kia yé cheve ara pe?

¡Mbaetɨ! ¡Jaeño nde!

Mbaetɨ ye mbae aipota kuae ɨvɨ pe.

26Chesoo jare chepɨa ikangɨ,

ërei nde cheRu Tumpa,

jae ko chepɨa iñepɨ̈roa jare chembaeyekou opambae.

27Echa, oyembosɨrɨ ndegüi vae reta, omanota;

nde remokañɨteita opaete oyembosɨrɨ ndegüi vae reta.

28Ërei cheve ikavi yae vae ko,

köiño aï ndegüi vae,

cheYa Tumpa, ndereño anoi cheporoäro,

amoërakua vaerä opaete nde reyapogüe.