EZEQUIEL 38 - Guarani Bible with DC

Mburuvicha Gog maratuta vae regua

1YandeYa jei cheve:

2“Nde kuimbae, emae ɨvɨ Magog kotɨ, jare emoërakua maratuta vae Gog kotɨ,Ap 20.8. tëta Mesec jare tëta Tubal juvicha kotɨ.

3Ere chupe: ‘CheYa Tumpa jei körai: Mase, che ayovaicho ndekotɨ Gog, tëta Mesec jare tëta Tubal juvicha.

4Romoamɨrita, añonota tɨ̈ai peyuru pe, jare rogüɨnoeta nde jare opaete ndesundaro reta, kavayu reta, kavayu regua reta, opaete oyemboemimonde kavi ñeraro pegua jare yeopiaka pe vae reta, opaete jae reta güɨnoi kɨsepuku.

5Jare tëtaguasu Persia, Cus jare Fut ñogüɨnoi jae reta ndive; opaete jae reta ñogüɨnoi yeopiaka jare äka-ɨru jiero pegua ñeraro pegua reve reve;

6jare opaete sundaro reta Gomer pegua; opaete sundaro reta Togarma pegua, mombɨrɨ ɨvɨtuguasu kotɨ yogüɨreko vae, jare jeta tëta oñemoïru nde ndive vae.

7Eyeapo katu jeta vae reta oñemoïru nde ndive vae ndive; jare nde eï jae reta juvicharä.

8Kuae güire ɨma pe Tumpa ndeokuaita reporepeña vaerä ɨvɨ ñeraro güi oasayepe vae re, ketɨ ketɨ ïru ɨvɨ güi oyereru vae reta re, ɨvɨtɨ reta Israel pegua re ñogüɨnoi vae, tëta oyemboai avei vae; ërei oñerenoeuka tëtaguasu reta güi, jare opaete jae reta yogüɨreko pɨagüive vae re.

9Reyuta nde ama ɨvɨtuai reve vae rami, amapɨtu ɨvɨ oyasoi ramita reñova ɨvɨ opaete ndesundaro reta ndive jare jeta oñemoïru nde ndive vae reta ndive.’

10CheYa Tumpa jei körai: Jókuae ara reyemongeta pɨ̈chɨi yaeta mbae reyapo vaerä.

11Rereta: Taporepeña kuae ɨvɨ oyeepɨ rapembae vae re, oyeandumbae yogüɨreko vae reta re; opaete yogüɨreko jëta guasu ikëseambae pe jare jökembae pe.

12Repɨ̈ro jare reñomi vaerä imbaembae, repüa vaerä jókuae ɨvɨ ipombae oikose vae re, yogüeru ye ïru tëtaguasu reta kotɨ güi vae re, güɨnoi mɨmba reta jare ɨvɨ vae reta re, yogüɨreko mbɨte pe tëtaguasu reta pe vae.

13Sabá jare Dedán pegua reta jare omaemee vae reta Tarsis pegua jare opaete juvicha reta jeita ndeve: ‘¿Reyu pa repɨ̈ro orembaembae? ¿Remboatɨ pa jeta vae reta repɨ̈ro vaerä jare reyemombae vaerä jeta korepoti, oro, orerɨmba reta jare oreɨvɨ reta re?’

14Jáeramo, nde kuimbae emoërakua maratuta vae, ere Gog pe: ‘CheYa Tumpa jei körai: Jókuae ara chembae vae reta Israel yogüɨreko pɨagüive ma yave, ¿ngaraa pa reikuaa nde?

15Reyuta reïa güi, ɨvɨtuguasu kotɨ güi, jeta oñemoïru nde ndive vae reta ndive; opaete jae reta kavayu re, jetagüe sundaro reta imbaepuere yae vae.

16Reporepeñata chembae vae reta Israel re, amapɨtu oyasoi ɨvɨ ramita reñova ɨvɨ. Köraita oiko ara iyapɨ rupi: Rogüeruta reporepeña cheɨvɨ re, tëtaguasu reta chekuaa vaerä, ayemboyekuaa ma yave nderupi Gog.’

17‘Che Tumpa jae körai: ¿Ndereä pa ko chemiari ara oasagüe pe cherembiokuai ñeemombeúa reta Israel pegua rupi, jae reta omoërakua, maratuta vae; kërai jókuae ara rupi che rogüeruta reporepeña jese reta vae?’

Gog oiporara vae regua

18‘CheYa Tumpa jei: Jókuae ara Gog oporepeña Israel pegua reta re yave, chearasɨ yaeta.

19Echa cherägüɨro jare chearasɨ yae reve jae: Jókuae ara oimeta ɨvɨkana ɨvɨ Israel pe.

20Jevae reta ɨ rupigua, güɨra reta, mɨmba reta ñana rupigua, mboi reta jare opaete kuimbae reta ñogüɨnoi ɨvɨ iárambo vae, orɨrɨita cheróvai; ɨvɨtɨ reta osururuta, ɨ̈vavira reta osururuta jare opaete tëtaguasu reta ikësea osururuta.

21Opaete cheɨvɨtɨ reta re aenɨita ñeraro Gog kotɨ, che Tumpa jae kuae; oyoupii aeño oñoraro retata.

22Che aiporaraukata chupe reta mbaerasɨ ovakatu vae, manoɨvɨ, jare amongɨta jese jare isundaro reta re ama ɨvɨtuai reve, amandau, tata azufre ndive vae.

23Jökorai ayembotuichaukata jare ayemboeteukata, jare opaete tëtaguasu reta oikuaata che ko jae Tumpa vae.’ ”