2 SAMUEL 15 - Guarani Bible with DC

Absalón oñemopüa David re

1Kuae jaɨkue rupi Absalón ogua iyeupe käretou ñeraro pegua jare kavayu reta, jare cincuenta kuimbae reta, oyangareko jese vaerä.

2Jare ndeimbove ñavo opüa jare ojo oñeñono tape jembeɨ pe, tëta guasu jöke pe; jare oipotagüe ou oñeapo mburuvicha guasu pe yave, Absalón oenɨi jare oparandu chupe kia pegua ra ko vae, jare jókuae omombeu yave chupe kia ñemuña Israel pegua ko yave,

3Absalón jei yepi chupe: “Jókuae neñeapo jupi ko, ërei mbaetɨ mburuvicha guasu oñono kia oyeapɨsaka vaerä nderé.”

4Jare jei yepi: “¡Kia cheñono yave mburuvicha oporojäa vaerä, yogüeru oñeapo cheve yave, che ayapo kavita ko jupi rupi chupe!”

5Jare kia oya itindɨ vaerä jóvai yave, jae oipɨɨ jare oovapɨte yepi.

6Körai oyapo opaete Israel iñemuña reta yogüɨraja oñeapo mburuvicha guasu pe vae; jökorai oyeaɨuka ojo oiko opaete Israel iñemuña reta pe.

7Irundɨ añoa pe Absalón jei mburuvicha guasu pe:

—Romoñera remaeño vaerä aja Hebrón pe, ajata ambopo ñererökuavee ayapo yandeYa pe vae.

8Che nderembiokuai aiko Gesur pe Siria pe yave ayapo metei ñererökuavee yandeYa pe, jae reve: “CheYa chereraja ye Jerusalén pe yave, tamee mbaemboete ndeve.”

9Jare mburuvicha guasu jei chupe:

—Ekua mbɨakatu ndive.

Jare Absalón opüa jare ojo Hebrón pe.

10Jayave Absalón omondo ñee jerajaa reta opaete Israel iñemuña reta pe jei reve: “Peendu mimbɨguasu oñee yave, pemoërakua Absalón oyeparavo ko mburuvicha guasurä Hebrón pe vae.”

11Jare oparea vi dosciento kuimbae Jerusalén pegua reta pe, jae reta yogüɨraja jupíe oikuaambae reve teko.

12Jare Absalón omee ramboeve mɨmba oyeyukagüe, omondo oenɨiuka tëta Gilo güi Ahitofel, jae ko metei David imboarakuaa. Jayave teko jeiete oyeapo ojo oiko, jare jeta ma Absalón jupiegua reta.

David otekuarai Jerusalén güi

13Jare ou metei imiari David pe, jei reve: “Opaete Israel iñemuña reta ipɨa oï ma Absalón kotɨ.”

14Jayave David jei opaete imborɨa reta ñogüɨnoi jae ndive vae pe:

—¡Yatekuarai aramoete voi, güɨramoi mbaetɨta yajayepe Absalón güi! ¡Peandeko, güɨramoi yanderupitɨ kuae peño yave, opata ko yandeyuka jare opaete kuae tëta pegua vi!

15Jayave jae reta jei chupe:

—Mase, ore roïndaivi roï, royapo vaerä opaete nde oreokuai vae.

16Jare mburuvicha guasu oë joko güi opaete jo pegua reta ndive. Jaeño ma oeya payandepo kuña güɨrekoiño vae, oyangareko reta vaerä o re.

17Jare oë mburuvicha guasu opaete jupiegua reta ndive, ërei oyemboɨ reta tëta guasu jembeɨ pe.

18Jare opaete imborɨa reta oyemboɨ iyɨpɨ pe, jare vi cereteo reta jare peleteo reta, jare seisciento kuimbae Gat pegua yogüeru jupíe vae oasa reta jae jenonde.

19Jayave mburuvicha guasu jei Itai pe, jae ko Gat pegua:

—¿Nde maera pa reyu orerupíe? Epɨtaño mburuvicha guasu ipɨau vae ndive, echa nde ko ketɨgua, iɨvɨ güi oyemombouka vae.

20Reyu ramo ete ko, ¿maera pa aiporuta reo vaerä ore ndive? Ërei che ajata ketɨ; eyerova yeño, jare eraja nderupíe nerëtaɨgua reta. ¡Tumpa, taperaɨu jare tomae avei peré!

21Jare Itai jei mburuvicha guasu pe:

—Tumpa jee re jare nderé re, mbaetɨta asɨrɨ ndegüi, mano pe yepe ani tekove pe yepe nde reïa rupi che aïta nde ndive.

22Jayave David jei Itai pe:

—Eyu jayave yaja orerupíe.

Jare Itai Gat pegua ojo jupíe, opaete jupiegua reta jare jo pegua reta ndive.

23Opaete vae täta oyaeo; javoi oasa reta ɨ̈aka Cedrón jee vae; javoi oasa vi mburuvicha guasu jare opaete vae oasa jenonde tape ojo ñuu rupi vae rupi.

24Ojo vi jae reta ndive Sadoc jare ïru Leví iñemuña reta Tumpa ikäjou morogüɨrökuavee päve pegua ivoɨa reta ndive. Jare Abiatar ojo vi opaete vae opa ñogüɨnoe yogüɨraja tëta guasu güi yave.

25Ërei mburuvicha guasu jei Sadoc pe:

—Eraja ye Tumpa ikäjou tëta guasu pe. Jare YandeYa ipɨakatu ko chekotɨ yave, jae ko chereroyerova yeta, aecha vaerä kuae Tumpa ikäjou jare tupao guakapi pegua.

26Ërei mbaetɨ ko ipɨakatu chekotɨ yave, ko cherenoi, toyapo cheve jaekavi chupe vae.

27Jare mburuvicha guasu jei ye sacerdote Sadoc pe:

—¡Nde ko jae mbae re oecha voi vae! Pekua kavi ye tëta guasu pe, nde jare nderaɨ Ahimaas ndive, jare Abiatar, taɨ Jonatán ndive.

28Mase, che aïta ñuu rupi tape oasaa rupi, pembou regua pemombeu mbae cheve.

29Jayave Sadoc jare Abiatar güɨraja reta ye Tumpa ikäjou Jerusalén pe, jare opɨta reta joko pe.

30Jare David oyeupi ɨvɨtɨ Olivo re; oyeupi oyaeo reve, iñäka oyasoi jare ipɨgüɨrai. Jare opaete jae ndive yogüɨraja vae reta oyasoi vi iñäka, oyaeo reve vi oyeupi reta.

31Jare omombeu reta David pe, jei reve:

—Ahitofel oï vi Absalón ndive, oyemongeta oñemopüa vaerä vae reta ndive.

Jayave David jei:

—CheYa Tumpa, erokomegua Ahitofel iporomboarakuaa chugüi.

32Jare David ojo ma oväe ɨvɨtɨ iyapɨte re omboete vaerä Tumpa yave, ko ou oövaiti arquita Husai, jemimonde omondoro reve jare ɨvɨ iñäka re ipɨatɨtɨ güi.

33Jare David jei chupe:

—Reñemoïru che ndive yave, chemboavaita ko;

34ërei reyerova ye tëta guasu pe jare rere yave Absalón pe: “Cheruvicha guasu, tayeokuai ndeve nderu pe ayeokuaise rami.” Jökorai chemborɨ ñarokomegua Ahitofel iporomboarakuaa chugüi,

35ñogüɨnoita vi joko pe sacerdote Sadoc jare Abiatar. Jayave, opaete mbaembae reendu mburuvicha guasu jo pe vae, emombeu chupe reta.

36Oime ñogüɨnoi joko pe jae reta ndive taɨ reta; Ahimaas jae ko Sadoc taɨ jare Jonatán jae ko Abiatar taɨ, jae reta ndive embou emombeu cheve opaete mbaembae reendu vae.

37Jare Husai, David ivɨa-ïru ojo tëta Jerusalén pe, Absalón oike ma ou joko pe yave.