SABIDURÍA 12 - Guarani Bible with DC

1echa opaete mbae oikove vae

reta re oime oï nderekove omanombae vae.

2Jókuae ramo, mbaeyoa oyapo vae reta

reinupa jare reyemboeta chupe reta mboki mboki pe,

jare remee chupe jei reta vaerä añete ko ombaeyavɨ reta vae,

jare, osɨrɨ reta ikavimbae güi yave, güɨrovia reta vaerä nderé, Tumpa.

Tumpa ipɨaɨ̈ro Canaán ndive vae

3Arakae ete nde ɨvɨ ikɨambae pe yogüɨreko vae reta

4remotareɨ ikavimbae oyapo reta jeko pegua,

omomora reta aña ndive mbae oyeapo vae jare ïru mbae jaekavimbae oyapo reta vae,

5michia reta ipɨapïrimbae reve oyuka reta jeko pegua

jare iyarete rupi mɨmba imbaembaegüe jou reta jare soo vi jou reta jeko pegua

jare kuimbae jugüɨgüe ave jou reta.

Chupe reta, jókuae mbaemboete oyapo vae reta pe,

6michia tu oporoyuka vae reta,

nde remee opa vaerä oyuka oreñemuñagüe reta,

7jare kuae ɨvɨ, ma ikavi ndeve opaete vae güi vae,

ipuere vaerä opɨta nerëta ipo taɨ reta pe.

8Ërei oime amogüe chugüi reta, kuimbae jeko pegua, reiparareko reta:

nde sundaro reta pe tenonde oguata vaerä,

jare rembou chupe reta karapúa

mboki mboki opa vaerä oyuka reta.

9Ipuere tëi viña, okua etei oyoe ñoraro rupi vae pe,

reñono jupi vae reta ipo pe jókuae jeko kavimbae vae reta

ani ramo metei jeia pe opa viña remokañɨtei

mbae pochɨ vae kaa rupigua reta pe,

ani ramo neñee peño metei jeia pe vae;

10ërei ngatu, remee chupe reta oyembopɨaä vaerä oyapogüe güi,

repoko reinupa reta mboki mboki pe,

reikuaa etei jae ko ipɨapochɨño mai vae reta vae

jare jeko kaviä reta oa güive vae

jare ngaraai ma iyemongeta ikavi reta,

11echa jae ko metei tëtaguasu kugüive jeko kavimbae vae reta ko.

Mbae jeko pegua ko Tumpa ipɨaɨ̈ro vae

Kia güi rekɨɨye güiä ko

mbaetɨ imbaeyoa re reiporarauka chupe reta,

12echa, ¿kia pa oparanduta kuri ndeve mbae reyapogüe re

ani ramo oñeñonota ndearasɨ igüɨ pe?

¿Kia pa ndemboekota kuri tëtaguasu reta

nderembiapogüe opa remboai vae pe?

¿Kia pa opüata nderé

jeko kavimbae reta oepɨ vaerä?

13Echa ko mbaetɨ yé ko ïru Tumpa, ndegüi,

opaete mbae ipo igüɨ pe güɨnoi vae

jare jókuae pe nde reo vaerä kuri mbae remombeu

jupi ra ko mbae reyapo reiko vae ani mbaetɨ ko vae;

14oime yave mburuvicha guasu ani ïru vae mburuvicha oipota oñemopüa nderé

oepɨ vaerä jókuae nde reinupa renoi vae reta.

15Nde ko jae jupigüe vae, opaete mbae re reyangareko reiko jupi rupi vae;

jayave güɨroviaä nde mbaepuere

jare oyuka kia jupimbae reve vae.

16Echa nde mbaepuere jae ko ndembaejupi iyɨpɨ

jare nde ko jae opaete mbae iya,

jayave opaete vae ko nde reiparareko.

17Nde remondota ko nde mbaepuere

pea ndererovia mbae vae reta kotɨ

jare rembojopata pea, oikuaa reve, oikuaa oyeapo vae;

18ërei, jaekavi vi echa nde oime ko renoi mbaepuere tuicha vae,

reyangareko ndepɨakavi reve jare oreokuai ndeporoparareko reve,

echa ndepuere reiporu ndembaepuere güɨramoiño nde rere yave.

Tumpa ipɨaɨ̈ro vae yandemboe vae

19Jökorai reyapo vae rupi, remboe nerëta ipo reta

kuimbae jupi rupi oiko vae iporopararekota ko vae,

jare reñono mbatee jei vae nderaɨ reta ipɨa pe mbae ikavigüe vae re oäro yogüɨreko vaerä,

jare remee chupe reta oyembopɨaä vaerä imbaeyoa re.

20Jätu cananeo reta, jae ko nderaɨ reta jovaicho vae

ikavi tëi omano reta vaerä vae,

täta reiparareko remae jese reta jare rembotenonde,

remee chupe reta oeya vaerä jeko ikavimbae vae,

21jare mboki rupi jekuaeño ojäa nderaɨ reta,

echa nde reyapo ramo ñemoïru iñemuñagüe reta ndive

jare añetegüe rupi rerökuavee chupe reta mbaeyekou jeta rupi.

22Jaema orerovaicho reta pe täta reiporarauka,

jare ore reta orembosɨmbiiño,

oime kërai yave ïru vae roipota rojäa yave oremaendúa vaerä ndepɨakavi re,

ani ramo oime ore roñejäaukata roï yave roäro vaerä ndeporoparareko.

Tumpa iporoparareko jaɨkue rupi, oporojäata tätagüe rupi

23Jókuae ramo, Egiptoɨgua iyarakuaambae reta,

imbaeyuvanga yogüɨreko vae reta,

reiporarauka chupe reta jókuae jae reta omboete yogüɨreko vae peño:

24Täta oyembojopa yogüɨreko jare opa omomoe reta tape jaekavimbae vae,

güɨreko reta vaerä itumparä mbae pɨ̈chɨigüe vae jare yavaete katu vae,

oyembotavɨuka yogüɨreko michia iyarakuaambae rami;

25jaema jókuae ramo, michia ndei iyarakuaa vae rami,

rembou chupe reta tembiporara ipörambae ye vae.

26Jare mbaetɨ oyeapo kavi reta jókuae mbae jasɨ katugüe rupi reñono kavi retata tëi vae ramo,

oiporara reta Tumpa iporonupa jupi rupi.

27Jae reta, oecha ma yave oiporara ñogüɨnoi jókuae mbaemɨmba reta

itumpa güɨrekose vae rupi

jae oiporarauka oï chupe reta vae,

jei reta pea yepe jae Tumpa añete pegua vae

jae ko tenonde yave jae reta mbaetɨ oipota vae.

¡Jare jökorai ou jese reta tembiporara iyapɨ pe!