SAN MATEO 14 - Guarani Bible with DC

Juan imano regua(Mc 6.14-29; Lc 9.7-9)

1Jókuae ara reta rupi mburuvicha guasu Herodes oendu Jesús jërakua yae vae regua.

2Jare jei jembiokuai reta pe: “Jae ko Juan oporombobautisase vae. Oikove ye omanogüe reta ipɨte güi. Jáeramo ko güɨnoi kuae mbaepuere reta.”

3Echa Herodes yepe oipɨɨuka Juan, oipokuauka karena pe, jare oñoñauka tembipɨɨrɨru pe, Herodías jeko pegua. Echa Herodías jae ko Herodes tɨvɨ Felipe jembireko.

4Echa tenonde yave Juan jei Herodes pe: “Mbaetɨ ko kavi rereko vaerä nderɨvɨ jembireko.”Lc 3.19-20. Lv 18.16; 20.21.

5Jáeramo Herodes oipota tëi oyukauka Juan. Ërei okɨɨye opaete vae reta güi. Echa jae reta güɨrovia Juan jae ko metei ñeemombeúa.

6Ërei Herodes iara iaño oupitɨ ye vae omboaretea pe, Herodías imemɨkuña ou opɨrae mbɨtea pe, jare omboyerovia yae Herodes.

7Jókuae jeko pegua Herodes oñererökuavee Tumpa jee re omee vaerä jókuae kuñatai pe oipotagüe mbae oiporu chupe vae.

8Jare ichɨ omboemboe ma tenonde voi ramo, jei:

—Emee cheve kuaeñae pe Juan oporombobautisa vae iñäkagüe pe.

9Jayave mburuvicha guasu ipɨatɨtɨ. Ërei oñererökuavee Tumpa jee re chupe ramo, jare mesa pe ñogüɨnoi jae ndive vae reta oendu ramo, oporookuai oñemee vaerä chupe.

10Jayave oyókuai sundaro reta oñäka-sɨa vaerä Juan tembipɨɨrɨru pe.

11Jare güeru iñäkagüe metei ñae pe omee kuñatai pe. Jare jae güɨraja omee ichɨ pe.

12Jayave Juan jemimboe reta yogüeru güɨraja jetegüe jare oñotɨ reta. Javoi yogüɨraja omombeu Jesús pe.

Jesús omongaru cinco mil vae reta(Mc 6.30-44; Lc 9.10-17; Jn 6.1-14)

13Jesús kuae oendu yave, ojo metei barco raɨ pe kïrii ngatúa pe. Ërei jeta vae reta oikuaa yave, yogüɨraja ɨvɨ rupi tëta guasu reta güi Jesús oïa pe.

14Jare Jesús ogüeyɨ barco raɨ güi yave, oecha jeta yae vae, jare oiparareko omae jese reta. Ombogüera imbaerasɨ vae reta jae reta ndive ñogüɨnoi vae.

15Kaaruasɨ ma yave, Jesús jemimboe reta yogüeru jei chupe:

—Kuae rupi mbaetɨ kia ave oiko, jare kaaruasɨ yae ma. Emondo kuae jeta vae reta, ogua vaerä mbae jou reta tëta raɨ reta rupi.

16Ërei Jesús jei chupe reta:

—Agüɨye toyogüɨraja. Pe reta pemee tokaru.

17Jae reta jei:

—Jaeño rogüɨnoi pandepo mbɨyape jare mókoi jevae ɨ rupigua.

18Jesús jei chupe reta:

—Peru cheve kuae pe.

19Jayave Jesús oyókuai jókuae jeta vae reta oguapɨ vaerä kapiata re. Jayave oipɨɨ jókuae pandepo mbɨyape jare mókoi jevae ɨ rupigua, jare omae reve ara kotɨ omee yasoropai Tumpa pe jese. Jayave opɨ̈saa mbɨyape, jare omee jemimboe reta pe, jare jae reta omee vaerä jeta vae reta pe.

20Opareve okaru, jare yangapɨɨ reta. Jayave Jesús jemimboe reta omboatɨ doce kanata mbɨyape jembɨregüe.

21Okaru vae reta oupitɨ cinco mil kuimbae reta, oyepapambae reve kuña reta jare michia reta.

Jesús oguata ɨguasu iárambo(Mc 6.45-52; Jn 6.16-21)

22Jupiveiño Jesús oyókuai jemimboe reta oyeupi vaerä barco raɨ pe, yogüɨraja vaerä jenonde ɨguasu jovaicho pe, jae omboyupavo omondo ramboeve jeta vae reta.

23Jare opa ma omondo reta yave, Jesús oyeupi jaeño ɨvɨtɨ guasu re oyerure vaerä Tumpa pe. Jare pɨ̈tu yave, jaeño etei Jesús oï joko pe.

24Ërei barco raɨ ojo ma oväe ɨguasu mbɨte pe yave, echa ɨ tuicha oyemboɨaparúa jare ɨvɨtu täta oövaiti reta.

25Jare köeta ma yave, Jesús oguata ou ikotɨ reta ɨguasu iárambo.

26Jare Jesús jemimboe reta oecha oguata ou ɨ iárambo rupi yave, okɨɨye yae reve jei reta:

—¡Mbae iä ko kuae!

Jare jäse reta okɨɨye güi.

27Ërei jupiveiño Jesús ombou iñee chupe reta jei reve:

—¡Agüɨye pekɨɨye, che ko!

28Jayave Pedro jei chupe:

—CheYa, nde ko yave, ere aguata vaerä aja ndekotɨ ɨ iárambo rupi.

29Jare Jesús jei chupe:

—¡Eyu!

Jayave Pedro ogüeyɨ barco raɨ güi, jare omboɨpɨ oguata ɨ iárambo rupi ojo vaerä Jesús kotɨ.

30Ërei oecha yave ɨvɨtu täta yae, okɨɨye jare omboɨpɨ ojo ɨ́vɨkotɨ, jare osapúkai reve jei:

—¡CheYa, chemborɨ!

31Jupiveiño Jesús omondo ipo jare oipɨɨ Pedro. Jayave jei chupe:

—Michi yae ndeporogüɨrovia. ¿Maera pa mbaetɨ rerovia ete cheré?

32Jare oyeupi reta yave barco raɨ pe, opɨta ɨvɨtu.

33Jare barco raɨ pe ñogüɨnoi vae reta oya Jesús re. Jare omboete reta jei reve:

—¡Añetete yepe, nde jae Tumpa Taɨ!

Jesús ombogüera Genesaret pe imbaerasɨ vae reta(Mc 6.53-56)

34Opa oasa reta ɨguasu, jare yogüɨraja oväe ɨvɨ Genesaret pe.

35Jare joko pegua reta oikuaa Jesús. Jáeramo jae reta oikuaauka opaete vae pe jókuae ɨvɨ pe, jare güeru Jesús oïa pe imbaerasɨ vae reta.

36Jare omoñera reta Jesús omaeño vaerä imbaerasɨ vae reta opoko jemimonde jembeɨ re yepe. Jare opaete jemimonde re opoko vae reta okuera.