NÚMEROS 22 - Guarani Bible with DC

Balac oekauka Balaam

1Opa yogüɨraja Israel iñemuña reta, jare oyembojeyupa reta ɨvɨ Moab pe, Jordán güi kuaraɨ oëa kotɨ, Jericó re katu.

2Jare Balac Zipor taɨ oikuaa opaete Israel iñemuña reta oyapo amorreo reta pe vae.

3Jare tëta Moab pegua reta okɨɨye yae ete Israel iñemuña reta güi, echa jeta yae reta ko; jare ipɨatɨtɨ tëta Moab pegua reta, Israel iñemuña reta jeko pegua.

4Jare tëta Moab pegua reta jei Madián pegua tenondegua reta pe: “Añave kuae reta opata ko omokañɨtei opaete yandeɨ́vɨri ñogüɨnoi vae, güeye jou kapiata vae rami.”

Jare Balac Zipor taɨ, jae ko mburuvicha guasu Moab pegua jayave rupi.

5Jáeramo omondo oekauka Balaam, Beor2 P 2.15-16; Jud 11. taɨ, tëta Petor pe, ɨ̈aka Éufrates jembeɨ pe oï vae, jëtaɨgua reta jëta pe, jei reve körai chupe: “Metei tëta oë Egipto güi, jare omotɨnɨe opaete ɨvɨ, añave ou oï cheróvai.

6Jáeramo, romoñera reyu vaerä reyepopeyu kuae tëta re cheve, echa jëia yae ko chegüi; güɨramoi chepuereta amoamɨri jare amoë amombo kuae ɨvɨ güi, echa aikuaa katu ko nde reyerure mborerekua re jese vae ikavi, ërei reyepopeyu jese vae re oa yepopeyu.”

7Jare Moab pegua jare Madián pegua tenondegua reta güɨraja reta ipo pe imbaekuaa vae pe oyemboepɨ rami, jare opa yogüɨraja oväe Balaam pe, jare jei reta chupe Balac iñee.

8Jare jae jei chupe reta:

—Pepɨta kuae pe kuae pɨ̈tu, jare che ameeta peve ñee yandeYa omombeu cheve rupi.

Jökorai Moab pegua mburuvicha reta opɨta Balaam pɨri.

9Jare Tumpa ou Balaam pɨri, jei chupe:

—¿Kia nunga pa kuae kuimbae reta ñogüɨnoi ndépɨri vae?

10Jare Balaam jei Tumpa pe:

—Mburuvicha guasu Moab pegua, Balac, Zipor taɨ, ombou jei cheve:

11Jókuae tëta Egipto güi oë vae, opa omotɨnɨe kuae ɨvɨ; jáeramo, añave eyu, jare eyepopeyu jese cheve; güɨramoi chepuereta añeraro jae reta ndive jare amombo kuae ɨvɨ güi.

12Jayave Tumpa jei Balaam pe:

—Agüɨye ekua jae reta ndive, jare agüɨye ave eyepopeyu kuae tëta re, echa che cheporerekua jese vae ko.

13Jökorai Balaam opüa ndeimbove yave jare jei Balac iyɨvɨrigua mburuvicha reta pe:

—Peyerova ye peɨvɨ kotɨ, echa yandeYa mbaetɨ oipota chemondo perupíe.

14Jare Moab pegua mburuvicha reta opüa jare yogüeru Balac oïa pe, jare jei reta:

—Balaam ñäteɨ ou orerupíe.

15Jare Balac jekuae omondo ye mbovɨ ete jare mburuvicha tenondegua ete reta, jare imboetea yae ïru reta güi vae reta;

16kuae reta yogüɨraja Balaam oïa pe jare jei reta chupe:

—Körai jei Balac Zipor taɨ: “Romoñera reyuño vaerä chekotɨ;

17echa romboeteta jeta, jare ayapota opaete rere chevegüe; eyu añave voi, eyepopeyu cheve kuae tëta re.”

18Ërei Balaam jei, Balac jembiokuai reta pe:

—Yepe tëi Balac omotɨnɨe jo omee cheve korepoti jare oro, ngaraa chepuere ayavɨ cheYa Tumpa iñee, ayapo vaerä mbae michi vae yepe ani mbae tuicha vae yepe.

19Jayave pomoñera pepɨta vaerä kuae pɨ̈tu kuae pe, aikuaa vaerä mbae ra añave jei yeta yandeYa cheve vae.

20Jare Tumpa ou pɨ̈tu yave Balaam pɨri, jare jei chupe:

—Kuae kuimbae reta yogüeru ko nereenɨi vaerä, ekua katu jayave jae reta ndive; ërei reyapota che jae ndeve vaeño.

Araɨgua jare Balaam imburika kuña

21Jökorai Balaam opüa ndeimbove yave jare oyokua imburika, jare ojo mburuvicha reta Moab pegua ndive.

22Jare Tumpa iyarasɨ Balaam ojo jeko pegua; jare yandeYa iaraɨgua oñeñono tape pe oyovaicho vaerä jese. Jae opo ojo oiko imburika re jare mókoi jembiokuai ojo jae ndive.

23Jare mburika oecha yandeYa iaraɨgua, ipo pe ikɨsepuku jɨrumbae ndive tape pe oyemboɨ oï; jare mburika opia tape güi, oike ojo ñana rupi. Jayave Balaam oinupa imburika ombou ye vaerä tape kotɨ.

24Ërei yandeYa iaraɨgua ojo ye oñeñono tape oasa uvarupa ipäu rupiä pe, kesemba oï yoyavi tape jembeɨ rupi vae pe.

25Jare mburika oecha yandeYa iaraɨgua yave, oyemboyaasɨ uva ikesemba re jare oumbiri Balaam ipɨ kesemba re; jare jekuae Balaam oinupa ye.

26Jare yandeYa iaraɨgua ojo ye tenonde, jare ojo oñeñono tape ipɨmii yae vae pe, opia rapembaea pe, iyakatu kotɨ ani iyasu kotɨ yepe.

27Jare mburika oecha yandeYa iaraɨgua yave oyapakua Balaam pe; jare Balaam iyarasɨ yae, jare ɨvɨra pe oinupa mburika.

28Jayave yandeYa omee mburika imiari vaerä, jare mburika omoë iñee Balaam pe:

—¿Maratu pa roapo? Mboapɨ ye ma chenupa.

29Jayave Balaam jei mburika pe:

—¡Anoi yave mona kɨsepuku chepo pe, royukata ko añave voi, reyuvanga cheré jeko pegua!

30Ërei mburika jei Balaam pe:

—¿Ndemburikaä pa che? Cheré ko repo opaete ara rupi, nderɨmbarä aiko güive. ¿Jökoraiñoi pa roapo?

Jare Balaam jei:

—Mbaetɨ.

31Jare yandeYa oechauka Balaam pe, jayave ramo oecha yandeYa iaraɨgua oï tape pe, ikɨsepuku jɨrumbae ipo pe güɨnoi. Jare Balaam omboete jare oyetavatɨka itindɨasɨ ɨvɨ re.

32Jare yandeYa iaraɨgua jei chupe:

—¿Maera pa reinupa ma mboapɨ ye ndemburika? Mase, che ko aë tape pe nderovaichorä, echa ikaviä ko cheve kuae reyapo vae.

33Mburika chereecha, jare osɨrɨ chegüi kuae mboapɨ ye ma; ërei ngatu mbaetɨ osɨrɨ yave viña, che royukata tëi ma ko jare mburika amaeñota oikove.

34Jayave Balaam jei yandeYa iaraɨgua pe:

—Cheyoa ko, mbaetɨ ramo aikuaa nde ko reñeñono cheopia vaerä tape pe; ërei añave mbaetɨ ko jae kavi ndeve yave, tayerova ye.

35Jare yandeYa iaraɨgua jei Balaam pe:

—Ekua jókuae kuimbae reta ndive; ërei ñee reta che jaeta ndeve vae, jokuaeño rereta.

Jökorai Balaam ojo Balac iyɨvɨrigua mburuvicha reta ndive.

36Jare Balac oikuaa ma ou Balaam yave, oë oövaiti tëta Ar Moab pegua pe, kuae tëta oï ɨ̈aka Arnón jembeɨ pe, jae ko ɨvɨ Moab jembeɨ kuae.

37Jare jei Balaam pe:

—Amondo roenɨiuka mbovɨ ye; ¿maera pa mbaetɨ reyu chekotɨ? ¿Mbaetɨtaecha pa mbae amee ndeve?

38Jare Balaam jei chupe:

—Ko ayu ma amae nderé; ërei mbaetɨta jaeiño mbae, Tumpa omeeta cheñeerä vaeño jaeta.

39Jare Balaam ojo Balac jupíe Quiriat-huzot pe.

40Jare Balac oyukauka guaka reta jare vecha reta, jare güɨrajauka Balaam jare mburuvicha reta jae ndive ñogüɨnoi vae pe.

Balaam jei ñee kavi Israel iñemuña reta kotɨ

41Pɨareve pe Balac güɨroyeupi Balaam ɨvɨtɨ Bamot-baal re, jare joko güi oecha reta Israel iñemuña reta jeyupa jembeɨ.