LEVÍTICO 4 - Guarani Bible with DC

Oikuaambae reve iyoa vae regua mbota

1YandeYa jei Moisés pe:

2“Ere Israel iñemuña reta pe: Kia nunga vae oyavɨ oikuaambae reve rupi iyoa yave cheporookuai reta kotɨ, agüɨyeta tëi oyeapo vae güi oyapo yave metei:

3Sacerdote tenondegua etei iyoa yave omboekouka vi ko tëta pegua reta, jökorai yave tomee cheve metei toro taɨrusu jete kavi vae, cheɨ̈ro vaerä mbaeyoa re.

4Togüeru toro taɨrusu vae tupao guakapi pegua ikësea jöke pe, cheróvai, jare toñono ipo toro taɨrusu vae iñäka re, jare toñaseokɨ̈ti cheróvai.

5Javoi toekɨ toro taɨrusu vae jugüɨgüe, jare togüeru tupao guakapi pegua japɨpe;

6jare tomoäkɨ ipoäka jókuae tugüɨ pe, jare toñapiramo pɨpe chiu ye cheróvai, asoya o mbaemboetea imboyaoa kotɨ.

7Jare toipichɨ jókuae tugüɨ guakarätiecha ñogüɨnoi incienso ikäti kavi yae vae oyeapɨ jese vae re, tupao guakapi pegua pe cheróvai oï vae; jare jókuae toro taɨrusu vae jugüɨ jembɨregüe topɨyere mɨmba oyeyuka oyeapɨ jese vae iyɨpɨ re, mɨmba oyeyukagüe opaetei oyeapɨa re, tupao guakapi pegua jöke pe oï vae.

8Jare jókuae toro taɨrusu vae oyeyuka cheɨ̈ro vaerä mbaeyoa re vae güi toekɨ opaetei ikɨragüe; ikɨra oñova ichuri churigüe vae,

9ipɨ̈rɨkɨti reta jare ikɨragüe oñova vae jare ikupepɨte japɨpe ikɨragüe oï vae; jare ipɨ̈rɨkɨti reta ndive toekɨ iyambia oï ipɨa re vae,

10toro taɨrusu vae mɨmba oyeyukagüe yembopɨakatu pegua güi oyeekɨ rami; jare toapɨ mɨmba oyeyuka oyeapɨ jese vae re, mɨmba oyeyukagüe opaetei oyeapɨa pe.

11Ërei ipiregüe, jare opaete isoogüe, iñäkagüe, ipɨgüe reta, ichuri churigüe jare jepotigüe,

12opaetei toñerenoe teyupa güi ikɨambaea pe, tanimbu oyemomboa pe, jare joko pe toapɨ reta tata pe yepea iárambo.

Israel iñemuña reta iyoa regua

13Israel iñemuña reta oyavɨ yave oikuaambae reve, jare mbaetɨ oikuaa ñogüɨnoi oyavɨ ko cheporookuai kotɨ vae; agüɨyeta tëi oyeapo vae oyapo reta vae rupi jeko reta,

14jaɨkue rupi ou oikuaa reta mbaeyoa oyapogüe yave, tomee reta toro taɨrusu vae cheɨ̈ro vaerä mbaeyoa re, togüeru reta tupao guakapi pegua jóvai.

15Jare Israel iñemuña itenondegua reta toñono ipo toro taɨrusu vae iñäka re cheróvai, jare joko pe toñaseokɨ̈ti jókuae toro taɨrusu vae.

16Jare sacerdote tenondegua vae togüɨroike toro taɨrusu vae jugüɨgüe tupao guakapi pegua pe,

17jare tomoäkɨ ipoäka jugüɨgüe pe, jare toñapiramo chiu ye che peYa jóvai tupao guakapi pegua asoya o imboyaoa kotɨ.

18Jare jókuae tugüɨ toipichɨ mɨmba oyeyuka oyeapɨ jese vae re guakarätiecha ñogüɨnoi vae re cheróvai tupao guakapi pegua pe, jare jembɨregüe topɨyere mɨmba oyeyuka oyeapɨ jese vae iyɨpɨ re, mɨmba oyeyukagüe opaetei oyeapɨa re, tupao guakapi pegua jöke pe oï vae.

19Jare toekɨ opaetei toro taɨrusu vae ikɨragüe, jare toapɨ mɨmba oyeyuka oyeapɨ jese vae re.

20Jare jókuae toro taɨrusu vae toyapo, jókuae ïru toro taɨrusu vae oñemee Tumpa iñɨ̈ro vaerä mbaeyoa re rami; jökorai etei toyapo sacerdote, jae reta iyoa re cheɨ̈ro vaerä; jare cheɨ̈rota chupe reta.

21Jare togüɨnoe toro taɨrusu teyupa güi, jare toapɨ tenonde toro taɨrusu oapɨ rami; cheɨ̈ro vaerä Israel iñemuña reta iyoa re.

Mburuvicha guasu jare iyɨvɨrigua reta iyoa regua

22Metei mburuvicha oyavɨ yave oikuaambae reve che peYa Tumpa iporookuai reta kotɨ, agüɨyeta tëi oyeapo vae güi oyapo yave, iyoa ko.

23Javoi ou oikuaa yave mbaeyoa oyapogüe re, tomee mbotarä kavara kuimbae jete kavi vae.

24Toñono ipo kavara kuimbae iñäka re, jare toñaseokɨ̈ti mɨmba oyeyukagüe opaetei oyeapɨ vae oñeaseokɨ̈tía pe cheróvai, cheɨ̈ro vaerä mbaeyoa re vae ko.

25Jare sacerdote tomopöe ipoäka jókuae mɨmba jugüɨgüe pe jare toipichɨ mɨmba oyeyuka oyeapɨ jese vae re guakarätiecha ñogüɨnoi vae re mɨmba oyeyukagüe opaetei oyeapɨa pe, jare jugüɨ jembɨregüe topɨyere iyɨpɨ re.

26Jare opaete ikɨragüe toapɨ mɨmba oyeyuka oyeapɨ jese vae re, mbota yembopɨakatu pegua ikɨragüe rami; jökorai toyapo sacerdote jókuae mburuvicha iyoa re, cheɨ̈ro vaerä iyoa re, jare cheɨ̈rota chupe.

Oipotagüe iyoa vae regua

27Kia nunga vae kuae tëta pegua oyavɨ yave oikuaambae reve che peYa iporookuai reta kotɨ, agüɨyeta tëi oyeapo vae güi oyapo yave, iyoa ko,

28javoi ou oikuaa yave mbaeyoa oyapogüe re, togüeru mbotarä metei kavara kuña jete kavi vae iyoa re.

29Jare toñono ipo jókuae mɨmba iñäka re, cheɨ̈ro vaerä iyoa re, jare toñaseokɨ̈ti mɨmba oyeyukagüe opaetei oyeapɨa pe.

30Javoi sacerdote tomopöe ipoäka jugüɨgüe pe jare toipichɨ mɨmba oyeyuka oyeapɨ jese vae re guakarätiecha ñogüɨnoi vae re, mɨmba oyeyukagüe opaetei oyeapɨa pe, jare jugüɨ jembɨregüe topɨyere iyɨpɨ re.

31Jare toekɨ chugüi, opaetei ikɨragüe mɨmba oyeyukagüe yembopɨakatu pegua ikɨragüe oyeekɨ rami, jare sacerdote toapɨ mɨmba oyeyuka oyeapɨ jese vae re, ipiche katu vaerä cheve, jökorai sacerdote toyapo chupe, cheɨ̈ro vaerä iyoa re, jare cheɨ̈rota chupe.

32Ërei güeru yave vecha mbaeyoa re, togüeru vecha kuña jete kavi vae.

33Jare toñono ipo jókuae mɨmba iñäka re, jare toñaseokɨ̈ti cheɨ̈ro vaerä iyoa re, mɨmba oyeyukagüe opaetei oyeapɨ vae oñeaseokɨ̈tía pe.

34Jaɨkue rupi sacerdote tomopöe ipoäka jókuae mɨmba jugüɨgüe pe, jare toipichɨ mɨmba oyeyuka oyeapɨ jese vae re guakarätiecha ñogüɨnoi vae re, mɨmba oyeyukagüe opaetei oyeapɨa pe, jare jembɨregüe topɨyere iyɨpɨ re.

35Jare toekɨ chugüi opaetei ikɨragüe mɨmba oyeyukagüe yembopɨakatu pegua ikɨragüe oyeekɨ rami, jare sacerdote toapɨ mɨmba oyeyuka oyeapɨ jese vae re mbota oyeapɨ vae ndive cheve, jökorai sacerdote toyapo chupe cheɨ̈ro vaerä iyoa re, jare tacheɨ̈ro chupe.