ECLESIÁSTICO 51 - Guarani Bible with DC

Salmo mbaemboete pegua

1Che romboete, Tumpa, chemboasa vae,

ayapo yasoropai ndeve, cheTumpa jare cheRu.

Amoërakua nderé,

2cherekove jenda,

echa mano güi chemboasayepe,

echa cherete reroasayepe tɨvɨa güi,

echa mbaetɨ remaeño oa vaerä mano oïa pe.

Chemboasa ñee pɨ̈chɨi vae güi,

iyapu vae reta iporoangao güi.

3Ndeporoaɨu tuicha vae pe chemborɨ,

nde reï cheɨpɨ pe cherovaicho reta güi,

cherekove oekɨ vae reta kotɨ.

Mbɨatɨtɨ tuicha vae güi chemboasayepe,

4mbaerasɨ reta tata rami chemama,

tataendɨ ipuere yembae ogüe vae,

5mbae oasavi vae japɨpe güi,

yuru ikavimbae vae jare apu tɨnɨe vae,

6apu güi uvɨ nunga oë vae.

Che jaema köiño ma mano güi aï tei,

jare cherekove oasavi vae japɨpe seri ma oï tëi;

7amae cheɨke rupi, jare aecha mbaetɨ etei kia chemborɨ vaerä,

aeka yemborɨ yave, ërei mbaetɨ.

8Jayave ma chemaendúa Tumpa iporoparareko re

jare iporoaɨu, opambae vae ko re.

Tumpa güɨroasayepe kia oyemboya ikotɨ vae,

jare güɨroasayepe oipotagüe pɨ̈chɨi vae güi.

9Cheräse ɨvɨ güive,

asapúkai tɨvɨa jöke güive,

10jare ayerure: “Tumpa, nde ko jae cheRu,

nde ko oime renoi mbaepuere chemboasayepe vaerä;

agüɨye chereeya teko ikavimbae oï reve,

kɨɨye yavaetegüe oï reve jare mbɨatɨtɨ.

Toromboete avei taiko

jare roekata cheyerure rupi.”

11Jaema jayave Tumpa oendu chesapúkai,

oendu cheyerure

jare chemboasa opaete pɨ̈chɨi vae güi;

chemboasayepe teko pɨ̈chɨi oï vae güi.

12Jókuae ramo ayapo chupe yasoropai,

jare amboete ambotuicha reve Tumpa jee.

12aPemee yasoropai Tumpa pe, echa jae ko ipɨakavi vae,

echa jae iporoaɨu opambae vae ko.

12bPemee yasoropai Tumpa yemboete pegua pe,

echa iporoaɨu opambae vae ko.

12cPemee yasoropai Israel iyeopiaka pe,

echa iporoaɨu opambae vae ko.

12dPemee yasoropai opaete mbae iYapoa pe,

echa iporoaɨu opambae vae ko.

12ePemee yasoropai Israel güɨroasayepe vae pe,

echa iporoaɨu opambae vae ko.

12fPemee yasoropai Israel-ɨgua reta oñemoai vae opa ye omboatɨ vae pe,

echa iporoaɨu opambae vae ko.

12gPemee yasoropai tëta guasu jare tupao omopüa ye vae pe,

echa iporoaɨu opambae vae ko.

12hPemee yasoropai David iñemuñagüe reta imbaepuere omopüa ye vae pe,

echa iporoaɨu opambae vae ko.

12iPemee yasoropai Sadoc iñemuña reta güi oiparavo sacerdote oiko vaerä vae pe,

echa iporoaɨu opambae vae ko.

12jPemee yasoropai Abraham iyeopiaka pe,

echa iporoaɨu opambae vae ko.

12kPemee yasoropai Israel oñepɨ̈ro jese vae pe,

echa iporoaɨu opambae vae ko.

12lPemee yasoropai Jacob iTumpa imbaepuere yae vae pe,

echa iporoaɨu opambae vae ko.

12mPemee yasoropai Sión oiparavo vae pe,

echa iporoaɨu opambae vae ko.

12nPemee yasoropai opaete mburuvicha guasu reta juvicha guasu pe,

echa iporoaɨu opambae vae ko.

12o¡Jae ko omee mbaepuere jeta ipo reta pe!

Opaete jupi rupi yogüɨreko jese vae reta omboete vae ko,

Israel-ɨgua reta, tëta ipo reta köiño oiko chugüi vae.

¡Mbaemboete toiko Tumpa pe!

Arakuaa oyeeka vae

13Che chetaɨrusu yave, ndei aja mbove aguata opaete ɨvɨ rupi,

oasa ete aipota chearakuaa vaerä.

14Jare jae ou cheve opaete ikavigüe vae reve;

che aja aeka aväe regua.

15Jaema jenda pe oï vae, metei uva iɨ yagüɨye ma oï rami,

jare jaema chepɨa oyerovia opɨta jese.

Jare aja jupi rupi jae jape rupi,

echa chemichi güive ma aikuaa.

16Ndei ɨma ayeapɨsaka aiko jese mbove,

jeta yae ma mbae aikuaa.

17Aiko vaerä jae jeia re chevegua metei yemboete ko,

jókuae ramo ayapo yasoropai jókuae oikuaauka cheve vae pe.

18Añeñono aupitɨ vaerä mbae ikavi vae,

jare agüɨyeta aipoepɨ mbae aväegüe ndive.

19Aipota amae jese,

jare jese eteiño ma amae.

Aipea jeta jöke

aiküava vaerä jare amae vaerä jese.

20Ayúe opaete cherete reve,

jare aväe chupe ikɨambae reve.

Iyɨpɨ güive aipota amae jese,

jare jókuae ramo mbaetɨ yeta ma aeya,

ngaraa ye ma asɨrɨ chugüi.

21Chepɨa horno jaku vae rami ko amae aï jese yave,

jókuae ramo aekɨ, ¡mbaeyekou tuichagüe vae!

22Tumpa etei ko omee cheve aeka chupe vae,

jókuae ramo asapúkai eteita ko yasoropai ayapo chupe.

23Kia iyarakuaambae vae reta: Peyu che kotɨ

jare peiko cheporomboe renda pe.

24¿Kërai regua pa ko peikota opaete kuae mbae

jare jekuaeñoi peiporara vaerä peiko jókuae ɨuve yavaetegüe vae?

25Kuae jae peve arakuaa regua vae:

Peeka penoi vaerä jepɨmbae reve,

26peiko jae jeia re,

peyapo mbae omee peyapo vaerä vae.

Jae köiño ko oï kia ñavo oeka vae güi;

kia ñavo oyemoambeko vae, oväeta ko.

27Pemae peresa ae pe michi yae ko aparavɨkɨ vae re

jare mbutuu tuichagüe vae ko aväe chupe vae re.

28Peyeapɨsaka opaete chetaɨrusu pe aikuaagüe re,

jare jökorai anoi oro jare korepoti.

29¡Peyerovia katu cheporomboe renda pe!

¡Agüɨye pemara cheporomboe güi!

30Peiko teko isɨmbigüe rupi

jaema Tumpa güɨramoiño pemboekopota ko.

¡Mbaemboete opambae toiko Tumpa pe,

jare jee toyemboete toiko opaete ara reta rupi!