SALMOS 62 - Guarani Bible with DC

SALMO 62Tumpaño ko jae ñepɨ̈roa

1Tumpa reño aiko pɨagüive,

chugüiño ou cheve yereroasayepe.

2Jaeño ko ita guasu cheñepɨ̈roa

jare chereroasayepe vae,

ngaraa agüɨapi, echa jae ko cheñepɨ̈roa.

3¿Kërai yave regua pa yemongeta ikavimbae peyapota peiko chekotɨ?

Echa opaete pe reta peipota chereitɨ,

ovapetea oa rami ani kesemba opa oa rami.

4Peporomokañɨtei vaerä reteiño peyemongeta,

peaɨu apu;

pemiari ñee kavi, ërei pepɨa pe peyepopeyu.

5Tumpa reño aiko pɨagüive,

chugüiño ou cheve yereroasayepe.

6Jaeño ko, ita guasu cheñepɨ̈roa jare chereroasayepe vae,

ngaraa agüɨapi, echa jae ko cheñepɨ̈roa.

7Tumpa re oï cheyereroasayepe jare cheyemboetea,

jae ko ita guasu cheñepɨ̈roa jëguambae jare cheñemía ikavigüe.

8¡Cherëtaɨgua reta! Jeseño peyeko;

pemee pepɨa chupe,

Tumpa jae ko yandeveguarä ñaneñemía.

9Añetete, kuimbae reta mbaeä etei ko,

paravete vae ani oikokatu vae;

mbaejäaka pe oñejäa reta yave,

mbaetɨ etei oñejäa ramiñota ko.

10Agüɨye eyeko ndepɨarai re,

jare repɨ̈rogüe rupi remboatɨ vae re;

reikokatu yae ma yave,

agüɨye ndepɨa jeseiño.

11Mbovɨ ye aendu Tumpa jei,

jae imbae ko mbaepuere vae.

12CheYa Tumpa mboroparareko ndembae ko,

echa nde remboekoviata metei ñavo vae pe jembiapo oï rupi.