JUECES 13 - Guarani Bible with DC

Sansón oa

1Israel iñemuña reta jekuae oyapo ye ikavimbae yandeYa jesa róvai, jare yandeYa omee filisteo reta ipo pe cuarenta año rupi.

2Zora pe oiko metei kuimbae Manoa jee vae Dan iñemuña pegua; jembireko mbaetɨ imembɨ, echa imembɨmbae ko.

3Ërei yandeYa iaraɨgua oyekuaa chupe, jei reve: “Mbaetɨ nemembɨ, echa nde imembɨmbae ko. Ërei añave ndepuruata jare oata nemembɨ kuimbae.

4Añave güive agüɨye jeu vino ani mbae oporombosavaɨpo vae, ani tembíu peumbae vaerä pereko vae reta,

5jare jókuae nemembɨ renoita vae mbaetɨta reñapi, echa ndei oa güive voi Tumpa pe oñeñono tee vae ko, nasareoräNm 6.1-5. ko, jae omboɨpɨta oepɨ Israel iñemuña reta filisteo reta ipo güi.”

6Jare kuña ojo imiari ime pe, jei chupe: “Metei kuimbae Tumpa jembiokuai ou chépɨri, jare chemongɨɨye yae, echa jova Tumpa iaraɨguaecha. Mbaetɨ aparandu chupe ketɨ güi ko ou vae ani kia ko vae, jae ave mbaetɨ oyemombeu cheve.

7Jae jei cheve: ‘Ndepuruata jare oata nemembɨ kuimbae; jáeramo añave güive agüɨyeta reu vino ani mbae oporombosavaɨpo vae ani tembíu peumbae vaerä pereko vae reta, echa michia raɨ Tumpa pe oñeñono tee vae ko nasareorä ko ndei oa güive voi, omano regua.’ ”

8Jayave Manoa oyerure yandeYa pe jei: “CheYa, romoñera rembou ye vaerä jókuae kuimbae rembou vae, oremboe vaerä kërai rogüɨreko jókuae michia raɨ oata vae.”

9Jare Tumpa oendu Manoa iyerure, araɨgua oyekuaa ye kuña pe, ko pe oï yave. Ërei ime Manoa mbaetɨ oï jae ndive ramo,

10jae osɨi ojo omombeu ime pe, jei:

—¡Mase, jókuae kuimbae oyekuaa cheve vae oyekuaa ye ma cheve!

11Manoa opüa ojo jembireko ndive jókuae kuimbae oïa pe, jare jei chupe:

—¿Jae pa nde ïru ara nemiari cherembireko ndive vae?

Araɨgua jei chupe:

—Jae ko che.

12Jayave Manoa jei:

—Jókuae remombeu vae oyembopo yave, ¿këraita pa rombokuakuaa jókuae michia raɨ? ¿Këraita pa rogüɨreko?

13YandeYa iaraɨgua jei Manoa pe:

—Nderembireko toyapo opaete jae chupe vae:

14Agüɨye tou uva güi mbae oyeapogüe, agüɨye tou vino ani mbae oporombosavaɨpo vae, ani tembíu peumbae vaerä pereko vae reta. Toyapo opaete jaegüe.

15-16Manoa mbaetɨ ave oikuaa jókuae kuimbae jae ko yandeYa iaraɨgua, jei chupe:

—Romoñera repɨta vaerä ore ndive rekaru, romboyɨta kavara kuimbae raɨ ndeve.

Ërei araɨgua jei chupe:

—Yepe tëi chemombɨta, ngaraa jau pe ndive tembíu. Ërei pepuere pemee jókuae kavara kuimbae raɨ yandeYa pe mɨmba oyeyukagüe opaetei oyeapɨ vae.

17Jayave Manoa jei araɨgua pe:

—¿Mbae pa nderee? Oremaendúa vaerä nderé romboete reve, oyembopo ma yave kuae remombeu vae.

18Ërei araɨgua jei chupe:

—¿Maera pa reipota reikuaa cheree? Oporomopɨakañɨ yae vae ko.

19Manoa oipɨɨ kavara kuimbae raɨ jare mbota temitɨ jäɨgüe, jare oñono ita guasu iárambo jare omee mɨmba oyeyukagüe opaetei oyeapɨ vae yandeYa pe. Jayave araɨgua oyapo mɨakañɨ Manoa jare jembireko jóvai;

20tata jendɨ opüa ɨvate yave, Manoa jare jembireko oecha reta jókuae Tumpa iaraɨgua ojo ara kotɨ tata jendɨ opüa vae rupi. Jayave oyetavatɨka itindɨasɨ reta ɨvɨ re.

21YandeYa iaraɨgua mbaetɨ ye oyekuaa Manoa pe ani jembireko pe. Jayave Manoa oikuaa jae ko yandeYa iaraɨgua vae,

22jare jei jembireko pe:

—Ñamanota ko, echa Tumpa yaecha.

23Ërei kuña jei:

—YandeYa oipota yandeyuka yave, ngaraa tëi omae mɨmba oyeyukagüe opaetei oyeapɨ vae re, jare temitɨ jäɨgüe re, jare ngaraa oechauka yandeve opaete kuae mbaembae, ngaraa vi opa mbae omombeu yandeve.

24Jare jókuae kuña imembɨ oa metei kuimbae raɨ, ombojee Sansón.Heb 11.32. Okuakuaa michia raɨ jare yandeYa iporerekua jese.

25Jare metei ara Sansón oï Dan iñemuña reta jeyupa pe Zora jare Estaol ipäu pe yave. YandeYa iEspíritu omboɨpɨ oparavɨkɨ jese.