JEREMÍAS 42 - Guarani Bible with DC

Opaete vae reta oiporu Jeremías oyerure vaerä jese reta

1Opaete sundaro ruvicha reta jare Johanán, Carea taɨ, jare Jezanías, Osaías taɨ jare opaete vae, paravete vae güive oikokatu vae pe,

2yogüeru jei reta Jeremías pe:

—Roiporu ndeve añave, agüɨye neäteɨ oreve: Eyerure ndeYa Tumpa pe oreré, ore mbovɨ ropɨtagüe re. Tenonde yave jeta yae ko roikose, ërei añave mbovɨ yae ropɨta, reecha rami.

3Eyerure ndeYa Tumpa pe, oechauka vaerä oreve kërai roiko vaerä jare mbae ko royapota vae.

4Jare ñemombeúa Jeremías jei chupe reta:

—Jaekavi, ayerureta yandeYa Tumpa pe peré, pe reta peiporu rami, jare amombeuta peve opaete jae jei cheve vae, aikuakumbae reve pegüi kërai yepe.

5Jayave jae reta jei Jeremías pe:

—YandeYa Tumpa jupi vae jare añete vae, jae toï oreve oecha vaerä, mbaetɨ yave royapo opaete jae ndeokuai remombeu oreve vae.

6Güɨramoi, ikavi ani mbaetɨ ikavi oreve jae jei vae, royókuai reyerure vaerä chupe, royapota yandeYa Tumpa jei vae, roiko kavi vaerä.

YandeYa omboyevɨ Jeremías iyerure

7Jare payandepo araa pe yandeYa imiari Jeremías pe,

8javoi jae oenɨi Johanán, Carea taɨ, jare jupiegua sundaro ruvicha reta jare opaete vae reta, paravete vae güive oikokatu vae pe,

9jare jei chupe reta: “YandeYa, Israel iTumpa, pe reta chemondo araja vaerä jóvai peyerure reta vae, jei:

10‘Peipota pepɨta yave kuae ɨvɨ pe, che ameeta peve peiko kavi vaerä; ngaraa pomokañɨtei, ameeta peve peñemoëta kavi vaerä jare ngaraa ma pogüɨnoe, echa chembopɨatɨtɨ ambou peve jókuae susere vae.

11Agüɨye pekɨɨye mburuvicha guasu Babilonia pegua güi, jókuae pekɨɨye yae chugüi vae. Agüɨye pekɨɨye, echa che aï pe ndive poepɨ vaerä jare pogüɨroasayepe vaerä imbaepuere güi. Che peYa ko jae kuae.

12Che popararekota, jare ameeta jae peparareko vaerä jare omaeñota peyerova ye peɨvɨ pe.’

13Ërei ngatu pe reta mbaetɨ peipota pepɨta yave kuae ɨvɨ pe, jare peäteɨ peyapo peYa Tumpa jeigüe

14jare pere: ‘Ikavi ko yaja yaiko Egipto pe, joko pe mbaetɨta yaiko ñeraro rupi ani mimbɨguasu iñee ñeraro pegua ave ngaraa yaendu jare ngaraa yaiporara karuai’,

15jáeramo, peyeapɨsaka pe Judá pe perembɨregüe reta, yandeYa Imbaepuere yae ete vae jei peve vae re: ‘Pekɨ̈reɨñoi peo peiko Egipto pe yave,

16ñeraro jare karuai, pekɨɨye yae chugüi vae perupitɨta joko pe, jare joko pe pemanota.

17Opaete ikɨ̈reɨ ojo oiko Egipto pe vae, omanota joko pe ñeraro rupi, karuai jare mbaerasɨ ovakatu vae rupi. Mbaetɨ eteita kia oikove; mbaetɨ eteita kia oasayepe susere tuicha yae aruta jese reta vae güi.’

18YandeYa Imbaepuere yae ete vae Israel iTumpa, jei: ‘Chearasɨ tuichagüe aitɨ Jerusalén pegua reta re rami, chearasɨ aitɨta vi peré, peo yave Egipto kotɨ. Peikota kia reta iñee kaviä vaerä pekotɨ, okɨɨye vaerä jare omae kaviä vaerä peré, peikota yepopeyurä, yeyóyai yoyairä, jare ngaraa ye ma peyerova kuae peɨvɨ pe.’

19YandeYa jei pe Judá pe perembɨregüe reta pe, agüɨye vaerä peo Egipto kotɨ. Peikuaa kavi añave amombeu kavi voi peve vae.

20¿Maera pa pembaeyavɨ? Echa pe reta etei ko cheokuai aja vaerä ayerure yandeYa Tumpa pe, pere cheve: ‘Eyerure yandeYa Tumpa pe oreré, jare eikuaauka oreve jae jei vae, royapo vaerä.’

21Añave che aikuaauka peve yandeYa Tumpa cheokuai jae vaerä peve vae, ërei pe reta mbaetɨ peipota peyapo.

22Jáeramo peikuaa kavi voi, ñeraro, karuai jare mbaerasɨ ovakatu vae rupi pemanota jókuae ɨvɨ Egipto pe, pekɨ̈reɨ peo peiko pɨpea pe.”