SALMOS 49 - Guarani Bible with DC

SALMO 49Mbaeyekou reño yayeko vae mbaetɨ ikavi

1Peendu kuae, opaete tëta pegua reta;

peyeapɨsaka, opaete ɨvɨ pegua reta,

2iyemboetea vae reta jare iyemboeteambae reta,

oikokatu vae reta jare paravete vae reta.

3Chemiarita arakuaa katu,

aendukata chearakuaa katu.

4Ayeapɨsakata ñee arakuaa katu pegua re;

arpa ipu ndive jaeta,

mbae yavai yae yaikuaa vae.

5¿Maera pa akɨɨyeta yemboavai reta iara pe,

cheöva yave ikavimbae vae pe iyoa vae reta?

6Imbaembae reño oyeko vae reta,

jare jeta yae imbaeyekou re oyemboete vae reta,

7metei ave chugüi reta, ngaraa oepɨ jëtara vae,

Tumpa pe ave ngaraa oyemboepɨ oyereroasayepe vaerä.

8¡Echa jekove oyegua ye vaerä jepɨ yae ete ko;

jare ngaraai ipuere oyemboepɨ,

9oikove oiko vaerä jekuae avei,

jare agüɨye vaerä omano!

10Echa, yarakuaa katu vae reta ave ko omano,

okañɨtei vi iyarakuaambae reta rami;

jare oeya reta imbaeyekou ïru reta pe.

11Oyemongeta jo oiko aveita,

jare oikoa jekuae aveita oiko;

jee pe ombojee reta iɨvɨ.

12Ërei ngatu kuimbae ngaraa imboetea avei oiko;

mɨmba reta ramiño vi ko okañɨtei.

13Kuae oikogüe mbaeä etei ko;

ërei jeseve, iñemuña reta güɨrovia katu jae reta iñee.

14Vecha reta oyereraja mbaeyukaa pe rami,

mano pe oyererajauka reta omanogüe reta ñogüɨnoia pe;

jare köe yave, jupi vae reta güɨnoita mbaepuere jese reta;

jare opata okañɨ chugüi reta oiko kavi vae,

omanogüe reta ñogüɨnoia pe ko oikota.

15Ërei ngatu Tumpa chereepɨta omanogüe reta ñogüɨnoia imbaepuere güi.

Echa jae chererajata jupíe.

16Agüɨye eyemoambeko kia oyemboikokatu yave,

jare jo pe jeta mbaembae ikavigüe güɨnoi yave.

17Echa omano yave ngaraa mbae ave güɨraja,

mbaembae ikavigüe ave ngaraa güɨraja jupíe.

18Yepe tëi oikove oiko ramboeve, oyerovia katu,

jare imbaeyekou jeko pegua omboete yae vae.

19Ërei oväeta ara omano vaerä,

jare ngaraa ye ma oecha tembipe.

20Ërei kuimbae imboetea yae re oyekou vae, mbaetɨ oikuaa yave,

mɨmba reta ramiño vi ko okañɨtei.