JEREMÍAS 9 - Guarani Bible with DC

1¡Mbae mona cheäka ɨkua rami,

jare cheresa ɨesaɨ rami,

aäpiro vaerä ara rupi jare pɨ̈tu rupi

cherëtaɨgua reta omano vae!

2¡Kia mona omee cheve ñuu pe teyupa aputuu vaerä,

aja vaerä mombɨrɨ aï cherëtaɨgua reta güi!

Echa opaete jae reta jupimbae ko,

ipɨapochɨ vae reta ko.

3Oïndaivi iyapu reta vaerä,

uvɨ oñemoïndaivi oñejäa vaerä vae rami.

Kuae ɨvɨ pe jeiete apu, mbaetɨ añetete vae;

jeiete yae ikavimbae vae oyapo reta;

yandeYa jei:

“Mbaetɨ oipota oikuaa reta cheregua.”

4Ivɨa-ïru ndive ave mbaetɨ oyogüɨrovia katu;

oñoëtara vae ndive ave mbaetɨ oyogüɨrovia katu,

echa oñoëtara vae reta oyombotavɨ,

jare oyoangao reta ivɨa-ïru ndive.

5Metei ñavo ombotavɨ ivɨa-ïru,

mbaetɨ etei kia ave jei añetete vae.

Oyepokuaa reta iyapu;

ikavimbae yae reta ko,

yavai yae oyepoepɨ reta vaerä.

6YandeYa jei:

“¡Apu renda pe yogüɨreko, jupimbae jeiete!

Chembae vae reta mbaetɨ oipota oikuaa cheregua.

7Jáeramo che, peYa Imbaepuere yae ete vae, jae:

Mbaetɨ ye mbae ayapo vaerä tëta chembae vae ndive,

jaeño tata pe añonota ambokavi vaerä.

8Uvɨ jakuarovi rami ko iñee reta;

apuño imiari reta;

imiari kavi reta iñeïru ndive mbɨakatu re,

ërei ipɨa pe oporopïaro reta.

9Kuae jeko pegua ¿amaeñota ra jese reta?

Metei tëtaguasu kuae nunga oyapo yave,

¿mbaetɨ ra jupi aiporarauka vaerä chupe jeko?

Che ndeYa jae kuae.

10Peäpiro peräse reve ɨvɨtɨ reta,

peäpiro ñuu kapii jenda reta,

echa opaetei oyemboai opɨta,

mbaetɨ ye kia oasa jokoropi;

guaka iñee ave mbaetɨ oyeendu,

güɨra jare mɨmba pochɨ

vae reta ave opa yogüɨraja.

11Jerusalén tëtagüerä ayapota,

opɨtata aguarayaɨmba reta jëtarä;

jare tëta guasu reta Judá pegua opɨtata ipombae,

mbaetɨta kia ave oiko pɨpe.”

12¿Oime pa kia yarakuaa yae kuae oikuaa vaerä? ¿YandeYa omee pa kia oikuaa vaerä kuae mbaembae reta jare omombeu vaerä ïru vae reta pe? ¿Mbae jeko pegua pa tëtaguasu opa oyemboai, ñuu otini vae rupi mbaetɨ kia oasa vae rami opɨta regua?

13YandeYa jei: “Opaete kuaekuae oasa, echa oeya reta cheporookuai reta amee chupe reta vae; mbaetɨ oendu jare mbaetɨ oyapo reta.

14Oyapo reta ipɨa jemimbotaño jare omboete reta tumpa-raanga Baal reta, tu reta omboe jese rami.

15Jáeramo, che peYa Imbaepuere yae ete vae, Israel iTumpa, jae: Ameeta jou reta mbae iro yae vae jare ameeta oɨu reta ɨ oyemombayachigüe re.