1Tamboete cheYa, opaete chepɨa ndive;
tamboete opaete chepɨa ndive cheYa jee ikɨambae.
2Tamboete cheYa, opaete chepɨa ndive;
agüɨye tacheakañɨ metei iporerekua güi ave.
3Iñɨ̈ro ko cheve opaete cheyoa reta re,
jae ko chembogüera opaete chembaerasɨ güi,
4jae ko oepɨ cherekove tɨvɨa güi,
jare chemboyekou mbaembae re jare iporoparareko re,
5jae ko chemoangapɨɨ ikavigüe pe,
jare chembotaɨrusu avei güɨraké rami.
6YandeYa ko oporojäa jupi rupi,
oyapo jupi rupi, oiporara vae reta peguarä.
7Jae oikuaauka jemimbota Moisés pe,
jare opaete jembiapo reta Israel iñemuña reta pe.
8YandeYa, iporoparareko yae vae ko jare oyeaeä yae vae ko;
jae mbaetɨ iyarasɨ raivi vae ko jare iporoparareko yae vae.
9Mbaetɨ ko oñeengata avei yandeve,
mbaetɨ vi iyarasɨ avei;
10mbaetɨ vi oiporarauka yandeve,
yandeyoa reta jare ikavimbae vae yayapogüe oï rupi;
11echa ara ipɨguasu yae rami ko
tuicha iporoparareko, chugüi oipoɨu vae reta kotɨ.
12Kuaraɨ oëa, matɨ yae oï kuaraɨ oikea vae güi rami
matɨ omondo yandepɨapochɨ reta yandegüi.
13Michia re tu oiparareko omae rami ko,
yandeYa oiparareko omae oipoɨu chugüi vae reta re;
14echa, jae oikuaa kërai ko yande vae,
oikuaa ko ɨvɨkuiño yande vae.
15Kuimbae jekove ñana ramiño ko,
ipotɨ kaa rupigua ñana rami:
16Oasa ɨvɨtuakuvo jupi yave opa ipiru,
jare mbaetɨ ye kia imaendúa jendagüe re.
17Ërei yandeYa iporoparareko,
opambae vae ko, oipoɨu chugüi vae reta re;
imbaejupi jekuae kuae rupi vae ko,
18Tumpa iporogüɨrökuavee päve oyapo vae reta re,
jare iporookuai re imaendúa oyapo vaerä vae reta re.
19YandeYa oñono iguapɨa ara pe,
jare iporookuaía oï opaete re.
20¡Pemboete yandeYa, opaete pe iaraɨgua reta!
Pe pembaepuere yae vae, peyapo jae iporookuai reta vae.
21¡Pemboete yandeYa, opaete pe iaraɨgua reta!
¡Pe jembiokuai reta peyapo avei jemimbota vae!
22¡Pemboete yandeYa, opaete pe jembiapo reta,
opaete jae iporookuaía oïa rupi!
¡Tamboete cheYa opaete chepɨa ndive!
Who We AreWhat We EelieveWhat We Do
2025 by iamachristian.org,Inc All rights reserved.
