PROVERBIOS 24 - Guarani Bible with DC

- 19 -

1Agüɨye ndeakatúä kuimbae jeko kavimbae reta re,

agüɨye ave neïru pota jese reta,

2echa jae reta ipɨa pe oyemongeta omaeñomi vaeräño,

jaeño imiari reta oyapo vaerä ikavimbae.

- 20 -

3Arakuaa katu ndive oñemopüa metei o,

arakuaa katu ndive oñeñono o iguapɨka;

4arakuaa kavi rupi o opa oyemboipo, opaete mbaembae jepɨ vae pe jare mbae ikavigüe pe.

- 21 -

5Kuimbae yarakuaa vae, jëia yae ko,

imbaepuere yae ko yarakuaa yae vae,

6echa ñeraro oyeapo yemongeta kavi rupi,

jare jeta oyemboarakuaa vae rupi, oporomoamɨrita.- 22 -

7Yarakuaambae pe tuicha yae ko arakuaa,

morojäa renda pe ngaraa oväe iñeerä.

- 23 -

8Ikavimbaeño oyemongeta oyapo vae,

oenɨi reta “ikavimbae iyapoa” pe.

9Yarakuaambae iyemongeta ko, mbaeyoaño;

oporoyóyai yóyai vae, ikaviä yae ko kuimbae reta pe.

- 24 -

10Mbaemboavai iara pe reyemboakɨ yave,

ngaraa ko ndepuere.

- 25 -

11Eroasayepe kuimbae oyeyuka vaerä ma ñogüɨnoi vae;

eepɨ mano peguarä ma ñogüɨnoi vae.

12Echa rere yave: “Mbaetɨ etei ko aikuaa kuae re”,

teko reta ojäa vae oikuaata ko;

oikuaa kavita ko omae oï nderé vae,

omboekovia teko reta oï rupi vae.- 26 -

13Cheraɨ, jeu ei, echa ikavi yae ko;

jëe kavi yaeta ko ndeve.

14Jökoraita ko ndeve, reikuaa yave arakuaa;

jókuae reväe yave, reiko kavi yaeta,

jare mbaembae reäro vae ngaraai oyemboai ndegüi.- 27 -

15Iyoa vae, agüɨye emomburu jupi vae jo,

agüɨye emboai chugüi iputuu renda,

16echa jupi vae,

yepe tëi ogüɨapi mbovɨ ye, opüa yeta ko;

ërei iyoa vae, oata susere pe.

- 28 -

17Nderovaicho osusere yave, agüɨye eyerovia,

jare ipɨ̈sa-yeyuka yave ave, agüɨye eyerovia

18echa yandeYa, ngaraa oyerovia omae kuae re,

jare iyarasɨta ndekotɨ.

- 29 -

19Agüɨye eyemoinge jeko kavimbae reta ipɨte pe,

agüɨye ndeakatúä iyoa vae reta re.

20Echa jeko kavimbae reta,

ngaraa yogüɨreko kavi, ngaraa yogüɨreko puku iyoa vae reta.

- 30 -

21Cheraɨ, eipoɨu yandeYa güi jare mburuvicha guasu güi;

agüɨye eyemoinge tovaicho reta ipɨte pe,

22echa güɨramoiño opata okañɨtei reta,

jare mbaetɨ kia ave oikuaa Tumpa jare mburuvicha guasu iporonupa kërai yave ra vae.

Ïru ñee reta arakuaa pegua

23Kuae reta, jae vi ko yarakuaa vae reta iñee arakuaa pegua:

Ñeapoa pe oporojäa vae reta oporoparavoño yave, mbaetɨ etei ko jaekavi.

24Jeko vae pe “mbaetɨ ko ndereko” jei vae re,

tëta pegua reta oyepopeyuta,

jare tëtaguasu pegua reta omotareɨta;

25ërei jókuae oinupa vae reta, yogüɨreko kavita,

jare yogüɨrekota mborerekua rupi.

26Oyeyurupɨteukata ko, ikavi ñee omboyevɨ vae.

27Eñono kavi ndeparavɨkɨ reta,

eparavɨkɨ ndeko pe,

jaɨkue rupi ndepuere reyapo nderorä.

28Agüɨye emboekoiño nderapicha jekombae reve, ñeapoa pe,

agüɨye mbae jupimbae ave ere ikotɨ.

29Agüɨye ere: “Jae oyapo cheve rami tayapo vi chupe,

tamboekovia jókuae kuimbae pe, oyapo cheve rami.”

30Aasa kuimbae iyakɨ vae iko ikupe rupi,

jare kuimbae mbaetɨ iyarakuaa vae iuvarupa ikupe rupi;

31aecha opaetei jókuae ko rupi okuakuaa yuu,

jare käpeati yepeai;

ikësea reta ita pegua ave opa ma osururu.

32Kuae aecha yave opɨta chepɨa pe,

aecha yave opɨta metei yemboe rami cheve, jae ko:

33Nde reke ramboeve, ndekeapara para ramboeve,

reñeküava ramboeve reke kavi vaerä michi pegua ye,

34jökorai mboriau oväeta ndeve oguataiño vae rami,

jare mbaravete out a ndeve kuimbae oporepeña rami.