TOBIT 3 - Guarani Bible with DC

Tobit iyerure

1Che apoko chepɨatɨtɨ, cheä-yekɨi jare ayaeo; jare chepɨayekɨi reve amboɨpɨ ayerure körai:

2“Ndeko jae jupi vae, cheYa; opaete mbae reyapogüe jupigüe ko, nde jaeñoi ko mboroaɨu. Ndeño ko jae kuae ɨvɨ pe reporojäa vae.

3Añave cheYa nemaendúa cheré, emae cheré. Agüɨye eiporarauka cheve cheyoa jeko pegua jare che mbaeyavɨ jeko pegua jaeramiño vi che tenondegua reta oikuaambae reve ombaeyavɨ vae re, oreyoa ndekotɨ.

4Mbaetɨ royapo ndeporookuai. Jókuae jeko pegua oremee tembiokuairä roiko vaerä, jare roiporara roiko vaerä romano regua, jare opaete tëta reta oremondoa rupi remee oipotagüe imiari kaviä vaerä orekotɨ jare orekura.

5Jare che arovia ko opaete mbae reyapogüe jupi rupi ko reyapo, reiporarauka vaerä cheve mbaeyoa jeko pegua. Mbaetɨ royapo ndeporookuai, mbaetɨ royembojupi nderóvai.

6Eyapo nde reipota vae che ndive. Eekɨ cherekove chegüi, chemokañɨ mo kuae ɨvɨ güi jare cheapo ye ɨvɨrä. Aipota amano cheäteɨ ma aikove aiko. Jeta ma aiporara ñeeasɨ jare ndaye reta, jare täta chepɨatɨtɨ aï. ¡CheYa, cheyora kuae mbɨatɨtɨ güi! Emee mo cheve aja vaerä aputuu. CheYa, agüɨye eyerova chegüi. Aipota ma amano kuae mbɨatɨtɨ güi jeta ma aendu mbae jupimbae vae.”

Sara oiporara vae jare Iyerure

7Jókuae ara etei vi metei kuña Sara jee vae, Ragüel imembɨ kuña, oikose Ecbatana pe, Media ɨvɨ pe, jae oiporara vi ñee nguru reta metei kuña tu jembiokuai güi.

8Ko yepe Sara chiu vese ma oipota tëi omenda oiko, ërei Asmodeo, jae ko metei aña, jae yepe oyuka ñoi chugüi imerä vae omendata yave.

Jaema tu jembiokuai jei chupe: “¡Ndeko reyuka reiko ndeyeugüi neme! Chiu ma neme tëi, jare mbaetɨ etei metei yepe jeeyoapɨpe reñeenɨi.

9Jaema neme omano jeko pegua mbaetɨ ko jupi reiporarauka vaerä reiko oreve. ¡Maera pa remanoa jae reta ndive, echa mbaetɨ ma ko nemembɨ reiko!”

10Jaema Sara opoko täta ipɨatɨtɨ jare omboɨpɨ oyaeo. Joko güi oyeupi tu jo ɨvate pegua pe, jare oipota ma oyeyuvɨ. Ërei oyemongeta ye, jare jei ipɨa pe: “Metei ñemomaraita ko cheru pe jei reta yave chupe: ‘Tayɨ jaevaeño vae jare jembiau vae oyeyuvɨ chugüi oiporara oiko jeko pegua.’ Jare jókuae ipuereta oyuka cheru. Jayave agüɨye tayeyuvɨ, ërei taeka cheYa pe omee vaerä cheve mano, agüɨye vaerä mo aendu aiko ñee pochɨ.”

11Jaema ombopuku iyɨva ventana kotɨ jare jei: “Mbaemboete toiko Tumpa pe, Tumpa iporoaɨu vae, mbaemboete toiko nde ndive opaete ara rupi, opaete nderembiapo reta tandemboete opambae reve.

12Ndekotɨ amondo cheñee, jare ndekotɨ amae.

13Emee yeyora cheve kuae ɨvɨ güi, agüɨye aramo aendu aiko ñeenguru reta.

14Nde cheYa, nde, reikuaa reï chekuña ikɨambae aiko vae, mbaetɨ mbɨa opoko cheré vae.

15Cheree mbaetɨ amongɨa aiko vae, jare cheru jee, kuae tëta aikoa pe. Che jae cheru tayɨ jae vaeño vae, mbaetɨ yé ma ko ïru tayɨ, ani cherëtara ete reta jae areko vaerä. Echa chiu ma ko omano chegüi cheme reta. ¿Jaema maera pa che aikoveñota aiko? Ërei nde mbaetɨ ko reipota amano yave emae cheré; jare eiparareko cheré, jare emee cheve agüɨye vaerä mo aendu aiko ñeenguru reta.”

16Jare jayave voi Tobit jare Sara iyerure ojo oväe Tumpa pe jare oendu.

17Jare ombou jembiokuai araɨgua Rafael oipoano vaerä mókoi reve Tobit oipoano jesa jäve güi, ipuere vaerä omae kavi ye oecha vaerä ye tembipe, jare Sara Ragüel tayɨ oepɨ vaerä, Asmodeo, aña jeko pɨ̈chɨi vae güi, jare omee vaerä Tobías jembirekorä, jae ko Tobit taɨ. Jare Tobías imbaepuere yae, güɨreko jókuae kuña, ïru vae reta güi, jayave Tobit voi oï ikatu pe vae. Oike ou jo pe, jare Sara ogüeyɨ ou jo ɨvate güi.