1 SAMUEL 8 - Guarani Bible with DC

Israel iñemuña reta oiporu juvicha guasurä

1Samuel indechi ma yave, oñono taɨ reta mburuvicharä Israel iñemuña reta re.

2Taɨrɨpɨ jee Joel, jare mokoía jee Abías; mókoi reve yogüɨreko mburuvicha oporojäa vaerä Beerseba pe.

3Ërei mbaetɨ omomoe reta tu jeko, imbae potarai yae reta, korepoti oipɨɨ vɨari reta, güɨrokomegua reta teko jupi vae.

4Jayave opaete Israel iñemuña reta itenondegua reta oyomboatɨ jare yogüeru reta Ramá pe, omomiari reta vaerä Samuel,

5jei reta chupe: “Mase, nde rekuakuaa ma, jare nderaɨ reta mbaetɨ yogüɨreko nde rami; jáeramo, añave eñono oreve metei mburuvicha guasu orejäa vaerä, opaete ïru tëtaguasu reta yogüɨreko rami.”

6Ërei Samuel pe mbaetɨ jaekavi jókuae mburuvicha jae reta oiporu vae. Jare Samuel oyerure yandeYa pe.

7Jare yandeYa jei Samuel pe: “Eendu opaete vae reta jei ndeve vae; echa ndeä ko nereröɨro reta, che ko chereröɨro reta, agüɨye vaerä ma aiko jae reta juvicharä.

8Egipto güi anoe reta güive oyapo reta opaete mbaembae añave rupi rami, chereeya reta jare omboete reta tumpa ambuae reta, jökorai etei vi ko ndeapo reta añave.

9Añave eendu iñee; ërei eechauka kavi voi chupe reta këraita ko jókuae mburuvicha guasu jeko ikotɨ reta kuri vae.”

10Jayave Samuel omombeu yandeYa iñee opaete vae pe; mburuvicha guasu oiporu chupe vae reta pe.

11Jei chupe reta:

—Kuae ko oyapota jókuae peruvicha guasurä oïta vae: Güɨrajata peraɨ reta, jare oñonota käretou pe ñeraro regua retarä, jare kavayu regua retarä, jare jae järoarä.

12Jare oñonota mil vae sundaro reta juvicharä, cincuenta vae juvicharä; jaeramiño vi oñono retata oparavɨkɨ reta vaerä iko rupi, jare ombaarɨvo reta vaerä, jare oyapoukata chupe reta tembiporu ñeraro pegua, jare ikäretou ñeraro pegua reta reguarä.

13Jökoraiño vi perayɨ reta güɨrajata jembiokuairä: Mbae ikäti kavi vae iyapoarä, oñemimo vaerä, jare mbɨyape iyapoarä.

14Jae ramiño vi peɨvɨ kavi reta opata opɨ̈ro pegüi, peuvarupa, peolivorupa, jare oñonota imborɨa reta ipo pe.

15Peremitɨ jäɨgüe jare uva iagüe güi oekata peve pediezmo reta, omee vaerä iyɨvɨrigua pe jare jembiokuai reta pe.

16Güɨrajata omombaravɨkɨ vaerä perembiokuai kuimbae jare perembiokuai kuña reta, petaɨrusu reta oikove katu vae, jare pemburika reta.

17Perɨmba reta güi oekɨta vi pediezmo jare pe ave peyeokuaita vi chupe.

18Jare metei ara jókuae peruvicha guasu peiparavogüe jeko peroäse ma yave, yandeYa mbaetɨta oyeapɨsaka peré.

19Ërei opaete vae mbaetɨ oipota oendu Samuel iñee, jei reta:

—Roipotañoi rogüɨnoi oreruvicha guasurä,

20roiko vaerä vi ïru ɨvɨ pegua tëtaguasu reta rami, oreruvicha guasu toyangareko oreré, jae toguata oreve ñeraroa pe.

21Jare Samuel omombeu yandeYa pe opaete kuae ñee reta oendugüe;

22jare yandeYa jei Samuel pe:

—Eendu jae reta jei vae, eñono mburuvicha guasu chupe reta.

Jayave Samuel jei kuimbae Israel iñemuña reta pe:

—Pekua metei ñavo perëta ae kotɨ.