PROVERBIOS 30 - Guarani Bible with DC

Agur iñee reta

1Agur, Jaqué taɨ iñee reta; jei Itiel pe jare Ucal pe vae:

2Che ko yarakuaambae opaete güi vae,

mbaetɨ etei chearakuaa.

3Che, mbaetɨ ayemboe arakuaa re,

mbaetɨ ave aikuaa Iyoambae vae regua.

4¿Kia pa oyeupi ara kotɨ jare ogüeyɨ ye?

¿Kia pa ipuere oipɨɨ ɨvɨtu?

¿Kia pa ipuere ɨ oyapɨkua?

¿Kia pa opa oñono kavi ɨvɨ jembeɨ reta?

¿Mbae pa jee, jare mbae pa taɨ jee? ¡Ere cheve reikuaa yave!

5Opaete Tumpa iñee, ikɨambae ko,

jae ko yeopiaka, opaete jese güɨ rovia vae reta peguarä.

6Agüɨye emoïru Tumpa iñee reta,

agüɨye vaerä omboeta ndeve, agüɨye vaerä ndeapu.

7Mókoi mbae re ayerure ndeve cheTumpa;

emee cheve ndei amano mbove; jae ko:

8Pɨayembotuicha jare apu embosɨrɨ chegüi,

agüɨye tacheparavete ani taikokatu;

jaeño agüɨ ye emboata cheve tembíu,

9güɨramoi cherɨ̈vɨata ete yave rokuaku jare jae:

“¿Kia pa jae YandeYa?”

Ani cheparavete ete yave, amanaro,

jare cheñeenguru ndekotɨ.

10Agüɨye tembiokuai emboeko iya jóvai,

echa ipuere oyepopeyu nderé, javoi reiporara reiko.

11Oime amogüe oyepopeyu tu re vae,

jare mbaetɨ iñee kavi ichɨ pe vae.

12Oime amogüe, mbaetɨ etei jeko omae iyé vae,

ërei mbaetɨ ave yepe oyetɨo oï iyoa güi.

13Oime amogüe ipɨayemboete yae vae,

jare omae ïru vae re oyembotuicha reve.

14Oime amogüe jäi, kɨsepuku rami,

jare jäi-rugua, kɨse rami,

omboai vaerä paravete vae reta tëta guasu güi.

15Jevoipe güɨnoi mókoi imemɨkuña,

jaeño oikuaa reta mbae jou vaerä.

Oime mboapɨ mbaembae mbaetɨi yangapɨɨ vae,

jare irundɨa mbaetɨi ma: “Joko peño mo” jei.

Jae reta ko:

16Tɨvɨa,

kuña imembɨmbae,

ɨvɨ mbaetɨ ɨ re yangapɨɨ vae,

jare tata mbaetɨi: “Joko peño mo” jei vae.

17Tu güɨnoti vae ichɨ iporomboe güɨröɨro vae,

jupi ko omanoasɨ katu vaerä,

jare chucha reta opa vaerä jou.

18Oime mboapɨ mbaembae mbaetɨ chepuere aikuaa vae,

jare irundɨa mbaetɨ chepuere aikuaa. Jae ko:

19Güɨraké jaɨkuere ɨvate rupi oveve vae,

mboi jaɨkuere ɨ̈vavira rupi oguata vae,

barco jaɨkuere ɨguasu rupi oguata vae

jare kuimbae kuñatai ndive oasa vae.

20Kuña menda re oyuvanga vae körai ko oiko:

Okaru jare oyoe iyuru, jare jei: “Mbaetɨ ko ayapo mbae ikavimbae.”

21Mboapɨ mbaembae ombokepegua ɨvɨ pegua reta,

jare irundɨa, mbaetɨ ipuere güɨropɨa reta, jae ko:

22Tembiokuai oï mburuvicharä yave,

yarakuaambae oyekou tembíu re yave,

23kuña oñereröɨrogüe omenda yave,

jare tembiokuai kuña opɨta iya kuña jekovia pe vae.

24Oime irundɨ mbae michi yae vae kuae ɨvɨ pe,

iyarakuaa katu yae kuimbae reta iyarakuaa katu güi vae; jae ko:

25Tasɨ reta, mbaetɨ tëi imbaepuere,

ërei kuaraɨ guasu iara pe oñovatu reta jembiurä;

26tapiti reta, mbaetɨ tëi ipɨ̈rata,

ërei oyapo reta ikuarä ɨ̈vavira re;

27tuku reta, mbaetɨ tëi juvicha guasu,

ërei oyomboyao yao kavi oveve reta;

28yanduti, ndepo pe reipɨɨ vae,

ërei ojo mburuvicha guasu jo pe oï.

29Oime mboapɨ mbaembae ipöra yae iguata vae,

jare irundɨa, ipöra yae ete oguata; jae ko:

30Yaguapope, ipɨ̈rata yae opaete mɨmba reta güi vae,

mbaetɨ okɨɨye mbae güi vae;

31takareo oyemboete yae vae; jaeramiño vi kavara kuimbae

jare mburuvicha guasu mbaetɨ etei kia ipuere jese vae.

32Ndearakuaambae reve reipota yave reyembotuicha

ani reyemongeta reyapo vaerä ikavimbae yave, ¡eyemongeta kavi mo!

33Neche oipɨguara vae, güɨnoeta guara,

täta ete oyeambɨvo vae, ombojugüɨta itï,

japicha omboarasɨuka vae, oporomoñeraroukata.