2 CRÓNICAS 32 - Guarani Bible with DC

Senaquerib oike ɨvɨ Judá pe(2 R 18.13-37; Is 36.1-22)

1Kuae mbaembae oyeapo güire jare kuae mborogüɨrovia oyekuaa ramboeve, ou Senaquerib, Asiriaɨgua reta juvicha guasu oporepeña ɨvɨ Judá re jare oñova tëta guasu reta oñekëse kavi yae vae, jae oyemongeta opa vaerä opɨ̈ro.

2Ezequías oikuaa yave Senaquerib ou opɨ̈ro vaerä Jerusalén,

3güɨnoi yemongeta mburuvicha imborɨa reta ndive jare isundaro ruvicha reta ndive opa vaerä oñomi ɨ jesaɨ vae reta tëta guasu güi ikatu pe oï vae, jare jae reta ikɨ̈reɨ oyapo jökorai.

4Jayave oyomboatɨ jeta vae, jare oñomi reta opaete ɨ jesaɨ vae reta jare ɨ osɨrɨ jókuae ɨvɨ rupi vae, agüɨye vaerä Asiria pegua mburuvicha guasu ou yave oväe jeta ɨ.

5Ezequías oyeapo katu ikɨ̈reɨ ngatu reve jare oyapouka kavi opaete tëta guasu ikësea oagüe reta, omopüauka sundaro reta imaeka ɨvate vae, jare omopüauka vi ïru ovapetea ɨvate vae tëta guasu ikësea ikatu rupi. Oyapokaviuka vi Milo David Jëta guasu pe, oyapouka vi jeta kɨsepuku jare yeopiaka.

6Jare oñono sundaro ruvicha opaete vae pe ñeraro peguarä, jare omboatɨuka tëta guasu jöke joka guasu pe, jare jei chupe reta omoäta ngatu vaerä:

7“¡Peñemomɨ̈rata jare peñemoäta ngatu! Agüɨye pekɨɨye, agüɨye peñeiämondouka mburuvicha guasu Asiria pegua pe, ani jeta vae jae ndive yogüeru vae reta pe, echa yande ñaï mbaepuere iya ndive chugüi reta.

8Jae ndive oï kuimbae reta imbaepuere, ërei yande ndive oï yandeYa Tumpa yandemborɨ vaerä kuae ñeraro pe.” Jare mburuvicha guasu Ezequías iñee oendu reta yave, oñemoäta ngatu opaete vae.

9Kuae jaɨkue rupi Senaquerib, Asiriaɨgua reta juvicha guasu, tëta Laquis oñova ñogüɨnoi ramboeve opaete isundaro reta ndive, ombou isundaro ruvicha reta Jerusalén pe jei vaerä Ezequías, mburuvicha guasu Judá pegua pe, jare opaete Judá pegua reta Jerusalén pe ñogüɨnoi vae pe:

10“Körai jei Senaquerib, Asiriaɨgua reta juvicha guasu: ‘¿Kia re pa peyerovia jare peñemomɨ̈rata Jerusalén pe peñeova ma peï reve?

11Ezequías jei yave peve peYa Tumpa pereepɨta chepo güi, pembotavɨ ko oï, oipota peyukauka yɨmbɨaɨ pe jare ɨuve pe.

12¿Ezequías, jaeä yera omboai jókuae mbaemboete renda ɨvɨtɨ rupigua reta jare mɨmba oyeyuka oyeapɨ jese vae reta jare oyókuai opaete Judá pegua reta jare Jerusalén pegua reta omboete vaerä jare oapɨ reta vaerä ikäti kavi vae incienso, meteia peño?

13¿Mbaetɨ yera peikuaa che jare cheñemuñagüe reta ndive kërai royapo opaete ɨvɨ pegua reta pe vae? ¿Jókuae tëtaguasu reta itumpa reta oepɨ pa iɨvɨ chupe reta chembaepuere güi?

14¿Cheñemuñagüe reta opa omboai jókuae tëtaguasu reta vae itumpa reta güi, kia nunga vae pa oepɨ iɨvɨ chembaepuere güi? ¿Maera pa peyemongeta peTumpa ipuere ko pereepɨ vae?

15Jáeramo, agüɨye peyembotavɨuka Ezequías pe, agüɨye peyererajauka jae iñee rupi, agüɨye ave perovia, echa metei ave jókuae tëtaguasu reta itumpa mbaetɨ ipuere oepɨ iɨvɨ cheñemuñagüe güi jare chembaepuere güi vae, añave ngaraa etei ko peTumpa ipuere pereepɨ chembaepuere güi.’ ”

16Kuaekuae jare jeta ïru mbaembae jei mburuvicha guasu Asiria pegua isundaro ruvicha reta yandeYa Tumpa kotɨ jare jembiokuai Ezequías kotɨ.

17Senaquerib oikuatía vi tupapire oyangao vaerä yandeYa Israel iTumpa, jei körai: “Tëtaguasu reta itumpa reta mbaetɨ ipuere oepɨ chembaepuere güi iɨvɨ, jökorai Ezequías iTumpa ngaraa ipuere oepɨ chembaepuere güi kuae ɨvɨ pegua reta.”

18Senaquerib isundaro reta osapúkai täta ñee hebreo pe Jerusalén pegua reta ñogüɨnoi tëta guasu ikësea iárambo vae pe, omongɨɨye vaerä jare oiämondo yae vaerä, jökorai ipuere vaerä opɨ̈ro reta jókuae tëta guasu.

19Jei reta ñee ikavimbae Jerusalén pegua reta iTumpa kotɨ, ïru tëtaguasu reta itumpa kotɨ jei reta rami, jókuae tumpa reta kuimbae reta oyapogüe kotɨ.

YandeYa oepɨ Ezequías jovaicho reta güi(2 R 19.1-37; Is 37.1-38)

20Ërei ngatu mburuvicha guasu Ezequías jare ñeemombeúa Isaías, Amoz taɨ oyerure reta kuae re, jare oeka reta yemborɨ Tumpa pe.

21Jayave yandeYa ombou metei araɨgua opa oyuka opaete sundaro jëia vae reta, sundaro ruvicha reta, jare metei äpɨta vae juvicha reta, mburuvicha guasu Asiria pegua jeyupa pe. Jare jae imara yae reve oyerova ye ojo iɨvɨ kotɨ. Jare oike yave itumpa itupao pe, joko pe jae taɨ reta aeño oyuka kɨsepuku pe.

22Körai yandeYa oepɨ Ezequías jare Jerusalén pegua reta, Senaquerib mburuvicha guasu Asiria pegua imbaepuere güi jare opaete ïru reta ipo güi, jare omee mbɨakatu rupi yogüɨreko vaerä opaete iyɨvɨrigua reta ndive.

23Jare jeta güeru reta Jerusalén pe mbota yandeYa pe vae, jare vi mbota jepɨ vae Ezequías mburuvicha guasu Judá pegua pe. Jókuae güire Ezequías jërakua yae opaete ïru tëtaguasu rupi.

Ezequías imbaerasɨ jare iñepoano(2 R 20.1-11; Is 38.1-22)

24Jókuae ara rupi Ezequías imbaerasɨ yae ete, oyuka vaerä güɨnoi; ërei oyerure yandeYa pe jare jae omboyevɨ chupe metei mɨakañɨ rupi.

25Ërei Ezequías mbaetɨ omee yasoropai jókuae yemborɨ omboresive vae re, jaeño ipɨayemboete yae, jókuae jeko pegua yandeYa iyarasɨ ikotɨ, Judá kotɨ jare Jerusalén kotɨ.

26Ërei Ezequías ipɨayemboete güire, oñemomichi Tumpa kotɨ, jökorai vi oyapo Jerusalén pegua reta, jare yandeYa mbaetɨ ombou iyarasɨ ikotɨ reta Ezequías oikove oiko ramboeve.

Ezequías omboresive Babilonia güi yogüerugüe(2 R 20.12-19; Is 39.1-8)

27Ezequías oikokatu yae jare imboetea yae, güɨnoi jeta korepoti, oro, ita ipöra vae, ikäti kavi vae, yeopiaka jare oipotagüe mbaembae jepɨ vae.

28Oyapo vi temitɨ reta jäɨgüe jɨrurä, vino jare asaite jɨrurä, jare oyapo oipotagüe mɨmba reta ikarúa rendarä, jare vi jókai retarä.

29Oyapouka vi tëta guasu reta, jare güɨnoi jeta vecha jare jeta yae guaka, echa Tumpa omee chupe oikokatu yae vaerä.

30Ezequías vi ko omombiauka ɨvɨgüɨ rupi ɨ jesaɨ vae reta Gihón ɨvate kotɨgua güi jare ombogüeyɨ David Jëta guasu güi kuaraɨ oëa kotɨ rupi. Jökorai Ezequías pe oë kavi yae opaete oyapogüe.

31Ërei Babilonia pegua mburuvicha reta ombou ñee jerajaa reta opou vaerä ípɨri yave jare oikuaa reta vaerä mɨakañɨ oasa jókuae ɨvɨ pe vae re yave, Tumpa omaeño Ezequías re, ojäa vaerä jare oikuaauka vaerä kërai ko ipɨa pe yemongeta güɨnoi vae.

Ezequías imano(2 R 20.20-21)

32Ïru mbaembae Ezequías regua jare iporoparareko regua oyekuatía oï opaete ñeemombeúa Isaías, Amoz taɨ jembikuatía pe, jare tembikuatía mburuvicha guasu reta Judá pegua jare Israel pegua regua oyekuatía oïa pe.

33Ezequías omano yave oñotɨ reta David iñemuña reta jɨvɨa ɨvate kotɨ oïa pe. Opaete Judá pegua jare Jerusalén pegua reta oyapo reta chupe mboromboete omano yave; jare taɨ Manasés oguapɨ jekovia pe mburuvicha guasurä.