ISAÍAS 62 - Guarani Bible with DC

1Sión, nde roaɨu jeko pegua ngaraa chekïrii;

Jerusalén nde roaɨu jeko pegua mbaetɨta aputuu,

oyekuaa kavi regua jupi vae, köembipe jembipe oyekuaa rami,

jare iporogüɨroasayepe mechero jendɨ omoembipe rami.

2Jayave jeta vae reta oechata ndeporogüɨroasayepe,

jare opaete mburuvicha guasu reta oechata ndeyemboetea.

Jayave ndembojee pɨauta, tee ipɨau pe,

yandeYa etei ndembojeeta.

3Jare äka-regua yemboetearä peikota,

äka-regua mborookuaía pegua neTumpa ipo pe.

4Ngaraa ye ma ndembojee reta “Oyeeyagüe pe”,

ngaraa ye ma jei reta ndeɨvɨ pe “Oyemboai vae”,

ërei ndembojee retata Hefzi-bá pe

jare ndeɨvɨ oyembojeeta Beula,

echa yandeYa iporoaɨu oï nde ndive,

jare jae oikota ndeve, ndeɨvɨ ndive omenda rami.

5Echa kunumi omenda kuñatai, mbaetɨ kuimbae ndive oasa vae rami,

jökorai Tumpa omendata nde ndive.

Kuimbae oyerovia katu jembireko ndive rami,

jökorai neTumpa oyerovia katuta nde ndive.

6Jerusalén, nekësea reta re añono omae vae,

ara pe jare pɨ̈tu yave ngaraa etei kïrii, jei retata:

“Agüɨye tikïrii yandeYa omboete vae.

7Agüɨye etei pekuérai chugüi, omopüa pɨau ye regua Jerusalén,

opaete ɨvɨ pegua reta pe omboeteuka regua.”

8YandeYa jei iyé aeño, oupi reve iyɨva iyakatu kotɨgua imbaepuere yae vae:

“Ngaraa ye ma amaeño nderovaicho reta jou ndetrigo

ani ketɨgua reta jou vino

reparavɨkɨ jese vae;

9ërei opaete pearɨvo jare pemboɨrugüe peuta

jare pemboeteta che peYa Tumpa;

peipoota uva reta jare peuta vino,

peuta chero oñeñono tee vae joka pe.”

10Peasa, peasa öke reta rupi,

peipea tape chembae vae reta peguarä.

Peñono kavi tape oyeguata jupi vae,

pembosɨrɨ tape güi ita reta,

peupi bandera, oecha vaerä opaete vae tëtaguasu reta.

11Mase, yandeYa omoërakuauka opaete ɨvɨ iyapɨ rupi ave körai:

“Pere tëta guasu Sión pegua reta pe,

ou ma oväe Jeroasayepea.

YandeYa güeru imbae vae reta,

opa opɨ̈ro güire.”

12Israel iñemuña reta pe jei retata: “Tëta oñeñono tee vae.”

“IYa Tumpa oepɨgüe.”

Nde ndembojee retata: “Tëta guasu ipotaa yae vae.”

“Tëta guasu mbaetɨ oyeeya vae.”