JEREMÍAS 29 - Guarani Bible with DC

Jeremías omondo tupapire tembipɨɨ reta pe

1Kuae ko jae tupapire pe ñee reta oyekuatía oï vae, ñeemombeúa Jeremías omondo Jerusalén güi tenondegua reta opa oyereraja vae güi oimeño vae reta pe, sacerdote reta, ñeemombeúa reta jare opaete vae reta, Nabucodonosor güɨraja tembipɨɨrä Jerusalén güi Babilonia kotɨ vae reta pe.2 R 24.12-16; 2 Cr 36.10.

2Mburuvicha guasu Jeconías oë güire jare ichɨ, mburuvicha guasu jo pegua reta, Judá jare Jerusalén pegua mburuvicha reta, jare Jerusalén pe ipoki ombaeapo vae reta jare ïru ipoki yae vae reta.

3Sedequías mburuvicha guasu Judá pegua omondo Elasa, Safán taɨ jare Gemarías, Hilcías taɨ, Nabucodonosor mburuvicha guasu Babilonia pegua pɨri yave, Jeremías omondo kuae tupapire jae reta ndive. Jókuae tupapire pe oyekuatía oï vae jei:

4Körai jei Imbaepuere yae ete vae, Israel iTumpa, opaete güɨrajauka tembipɨɨrä Jerusalén güi Babilonia kotɨ vae reta pe:

5“Pemopüa perorä jare peiko pɨpe; peñotɨ ɨvɨra reta ia vae jare peu ia.

6Pemenda, oime vaerä peraɨ reta jare perayɨ reta, jare jae reta tomenda vi togüɨnoi vi taɨ reta. Peñemuña jeta joko pe, agüɨye tijagüe peñemuña reta.

7Peiko kavi jókuae tëta guasu pogüɨrajauka pɨpea pe, jare peyerure cheve jese, echa ikavi oiko yave, pe reta peiko kavita vi.

8Che peYa Imbaepuere yae ete vae Israel iTumpa, amombeu peve kuae: Agüɨye peyembotavɨuka ñeemombeúa reta ani maratuta vae imombeúa reta pepɨte pe yogüɨreko vae pe; agüɨye peyapo jae reta ipaɨu omombeugüe.

9Echa jae reta omombeu cheree re peve vae apu ko. Che mbaetɨ ko ayókuai reta. Che ndeYa ko jae kuae.”

10“YandeYa jei körai: ‘Babilonia imbaepuere iyapɨ ma yave setenta añoa pe,2 Cr 36.21; Jer 25.11; Dn 9.2; Zac 1.12. che ayuta pomborɨ, ambopo vaerä cheñee, pomboyerova ye vaerä kuae ɨvɨ pe.

11Echa che aikuaa yemongeta reta anoi pekotɨ vae: Yemongeta mbɨakatu pegua, mbaetɨ ikavimbae pegua, amee vaerä peve peäro peiko vae.

12Jayave pe reta chereenɨita jare peyerureta cheve, jare che aenduta peve;

13pe reta chereekata jare cheväeta, echa chereekata opaete pepɨa ndive.Dt 4.29.

14Jare pe reta cheväeta chupe, jare pogüɨroyerova yeta tembipɨɨ güi, pomboatɨta opaete tëtaguasu reta güi, opaete che pomoai moaia güi; jare jókuae opa pogüɨrajaukaa kotɨ güi, opa yeta pogüeru kuae pe. Che peYa ko jae kuae.’

15Ërei pe reta pere: ‘YandeYa omee yandeve ñeemombeúa reta kuae Babilonia pe.’

16(YandeYa jei mburuvicha guasu oguapɨ David iguapɨa pe vae regua, jare opaete kuae tëta guasu pegua reta regua, perëtara reta mbaetɨ oyereraja tembipɨɨrä pe ndive vae reta kotɨ:

17‘Che, peYa Imbaepuere yae ete vae jae: Ambouta peve ñeraro, karuai jare mbaerasɨ ovakatu vae. Poapota ɨva ichuumbigüe ikaviä etei oyeu vaerä vae rami.

18Pogüɨrekota ñeraro rupi, karuai rupi jare mbaerasɨ ovakatu vae rupi. Poapota opaete tëtaguasu reta omae kaviä vaerä peré, peikota yepopeyurä, yeyóyai yóyai rupi, opaete jókuae tëtaguasu reta pomoai moaia rupi.

19Echa mbaetɨ peyapo amombeu peve iyɨpɨ güive voi cherembiokuai ñeemombeúa reta rupi vae, amondo yave peve, mbaetɨ peyeapɨsaka jese reta. Che peYa ko jae kuae.

20Peendu mo cheñee, opaete pe reta pogüɨrajauka Jerusalén güi Babilonia kotɨ vae reta.’)

21YandeYa Imbaepuere yae ete vae, Israel iTumpa jei Acab, Colaías taɨ regua, jare Sedequías, Maasías taɨ regua, kërai jae reta omombeu peve añetembae yandeYa jee re. YandeYa jei körai: ‘Ameeta oa reta vaerä Nabucodonosor, mburuvicha guasu Babilonia pegua ipo pe, jare jae oyuka retata perovakei.

22Jökorai, opaete Judá güi oyereraja Babilonia pe vae reta oipota oyepopeyu yave kia re, jeita: YandeYa toyapo nde ndive Sedequías jare Acab ndive oyapo rami, echa mburuvicha guasu Babilonia pegua oapɨ reta tata pe.

23Echa ɨvɨ Israel pe oyapo reta ikavimbae: Yogüɨreko aguasa rupi japicha reta jembireko ndive jare jei reta cheree re añetembae, che mbaetɨ ayókuai tëi jei vaerä reve. Che peYa jae kuae.’ ”

Ñee Semaías peguarä

24YandeYa oyókuai Jeremías jei vaerä Semaías, Nehelam pegua pe:

25“YandeYa Imbaepuere yae ete vae Israel iTumpa jei: ‘Nde rembou tupapire nderee re opaete vae pe Jerusalén pe yogüɨreko vae pe, jare sacerdote Sofonías, Maasías taɨ pe, jare ïru sacerdote reta pe. Jókuae tupapire pe oyekuatía ñee vae jei Sofonías pe:

26YandeYa neñono sacerdoterä sacerdote Joiada jekovia pe, reyangareko vaerä tupao pe. Oime yave oyekuaa imbokere vae jare omboɨpɨ imiari ñeemombeúa rami yave, nde reipɨɨta reñono tembipɨɨrɨru pe ɨvɨrakua pe.

27¿Maera pa jayave mbaetɨ reipɨɨ Jeremías, Anatot pegua, jae oñeñono peve ñeemombeuarä vae?

28Ombou yeti oreve tupapire Babilonia pe, jei: Ɨma yaeta ko peiko tembipɨɨ peyereraja vae; pemopüa perorä jare peiko pɨpe, peñotɨ ɨvɨra reta ia vae jare peu ia.’ ”

29Sacerdote Sofonías omongeta jókuae tupapire Jeremías pe.

30Jayave yandeYa jei Jeremías pe:

31“Emondo ere opaete tembipɨɨrä ñogüɨnoi ïru ɨvɨ pe vae reta pe, che peYa jae: Semaías, Nehelam pegua imiari ma peve cheree re che ayokuaimbae reve, jare güɨroviauka peve añetembae vae,

32jáeramo che, peYa jae, aiporaraukata Semaías pe jare iñemuña reta pe. Ngaraa oime iñemuña reta chembae vae reta ipɨte pe, ngaraa oecha mbae ikavigüe ayapota chembae vae reta pe vae, echa iñee rupi oporombopɨapochɨuka chekotɨ. Che peYa jae kuae.”