1 CRÓNICAS 13 - Guarani Bible with DC

David oyemongeta güɨroyakavo vaerä Tumpa ikäjou Jerusalén pe

1Jayave David oparandu sundaro ruvicha reta pe, jeta vae reta juvicha reta pe jare opaete tenondegua reta pe,

2javoi jei vi opaete vae Israel iñemuña reta pe: “Jaekavi ko peve yave, jare yandeYa Tumpa jemimbota ko yave, yamondo ñee opaete ɨvɨ Israel pe oñemoai ñogüɨnoi ñanerëtara vae reta pe, jare vi sacerdote reta jare levita reta ñogüɨnoi jëta rupi jare mɨmba ikarúa rupi jae reta ndive vae pe, yaparea oñemoïru vaerä yande ndive,

3yaru vaerä yandeRu Tumpa ikäjou yandeyeupe, echa Saúl oiko yave güive ma ñaneakañɨ yaiko chugüi.”

4Jare opaete vae reta jei oyeapo vaerä jökorai, echa jaekavi chupe reta.

David güɨraja tëi Tumpa ikäjou(2 S 6.1-11)

5Jayave David omboatɨ opaete Israel iñemuña reta Sihor güive jae ko Egipto jembeɨ, Hamat pe yaikea kotɨgua reta, oyereraja vaerä Quiriat-jearim güi Tumpa ikäjou,