JOB 1 - Guarani Bible with DC

Job isusere reta

1Ɨvɨ Uz pe oiko metei kuimbae JobStg 5.11. jee vae; kuae kuimbae ko jupi, isɨmbi, Tumpa güiño oipoɨu jare oyeandu ikavimbae güi.

2Oa chupe chiu taɨ reta jare mboapɨ tayɨ reta.

3Güɨnoi siete mil vecha, tres mil camello, quiniento yoayu güeye, jare quiniento mburika, jare jeta yeyé jembiokuai reta; jare jókuae kuimbae oikokatu yae ye opaete kuaraɨ oëa kotɨgua reta güi.

4Jare taɨ reta oyomboatɨ avei jëta ñavo pe oyapo arete, ara oiparavo oyoupe vae ñavo pe; jare omondo reta oenɨiuka mboapɨ reve jeindɨ reta, okaru jare jou vaerä vino jae reta ndive.

5Jare opa güire omboasa reta iarete yave, Job omondo oenɨiuka taɨ reta, jare ndeimboveasɨ opüa omee mbota mɨmba oyeyukagüe opaetei oyeapɨ vae, taɨ reta ñavo re; jökorai oyapo chupe reta yetɨo iyoa güi, echa Job jei: “Güɨramoi cheraɨ reta oyapo mbaeyoa ani oyangao reta ipɨa pe Tumpa.” Jökorai avei oyapo Job.

6Metei ara yogüeru araɨgua reta yandeYa jóvai, jae reta ipɨte pe ou vi Satanás.1 Cr 21.1; Zac 3.1; Ap 12.10.

7Jare yandeYa jei Satanás pe:

—¿Ketɨ güi pa reyu?

Jare Satanás jei yandeYa pe:

—Ɨvɨ rupi ayere aguata aikoa kotɨ güi.

8Jare yandeYa jei Satanás pe:

—¿Reikuaa pa cherembiokuai Job, kërai mbaetɨ yé ïru kuimbae kuae ɨvɨ pe jae rami vae, jupi jare jeko sɨmbi vae, oipoɨu chegüi vae jare oyeandu ikavimbae güi vae?

9Satanás jei yandeYa pe:

—¡Aramoiñoä ko Job oipoɨu ndegüi!

10Nde etei ko reñova jae, jo jare opaete mbaembae güɨnoi vae, jare iparavɨkɨ re ndeporerekua; jáeramo, imbaembae reta jeta oñemuña ɨvɨ iárambo.

11Ërei yaecha añave epoko opaete mbaembae reta güɨnoi vae re, jare reechata mbaetɨta ra ndeangao nderova pe etei vae.

12YandeYa jei Satanás pe:

—Mase, ko oï ndepo pe opaete mbaembae reta güɨnoi vae; ërei chupe etei agüɨye mbae eyapo.

Jare Satanás oë ojo yandeYa jóvai güi.

13Jare metei ara Job taɨ reta jare tayɨ reta okaru jare jou reta vino ñogüɨnoi tɨkeɨ tenondegua jo pe yave,

14ou metei kuimbae ñee jerúa Job oïa pe, jare jei chupe:

—Roara roï güeye reta pe, jare joko güi köi mburika reta okaru yogüɨreko.

15Oreparanoe oyekuaa Sabáɨgua reta jare opa oyuka tembiokuai reta kɨsepuku pe; cheño etei atekuarai ayu vaerä chemiari ndeve.

16Kuae imiari vɨteri oï ramboeve ou ïru oväe, jare jei:

—Ama-vera oa ara güi, jare opaetei oapɨ vecha reta jare iyangarekoa reta, jare opaetei omokañɨtei; cheño etei aasayepe ayu vaerä chemiari ndeve.

17Kuae imiari vɨteri oï ramboeve, ou ïru oväe jare jei:

—Caldeaɨgua reta oyeapo mboapɨ yemboyao oporepeña oreré, jare opa oipɨɨ güɨraja camello reta, opa oyuka tembiokuai reta kɨsepuku pe; jare cheño etei atekuarai ayu vaerä chemiari ndeve.

18Jare kuae imiari oï ramboeve ou oväe ïru, jare jei:

—Nderaɨ reta jare nderayɨ reta okaru jare jou vino ñogüɨnoi, tɨkeɨ tenondegua jëta pe;

19jare ou ɨvɨtuai täta yae vae ñuu kotɨ güi, jare omokana irundɨ reve okɨta reta jare oitɨ taɨrusu vae reta re, jare opa omano reta; jare cheño etei aasayepe ayu vaerä chemiari ndeve.

20Jayave Job opüa jare omondoro jemimonde jare opaetei oñeapiasɨ ipɨatɨtɨ güi, jare oyetavatɨka itindɨasɨ ɨvɨ re jare omboete Tumpa,

21jei:

—Chepogüɨrai ko aa chesɨ güi jare chepogüɨrai tamano.Ec 5.15; 1 Ti 6.7. YandeYa ko omee, jare yandeYa ko oekɨ. ¡Toyemboete yandeYa!

22Opaete kuae mbaembae pe Job mbaetɨ iyoa, jare mbaetɨ ave omboeko Tumpa mbae pe ave.