EZEQUIEL 19 - Guarani Bible with DC

Mbɨatɨtɨ mburuvicha guasu reta Israel pegua re

1Nde, Ezequiel etairari tairari mbɨatɨtɨ pegua mburuvicha guasu reta Israel pegua re, ere:

2‘Ndesɨ yaguapope kuña,

oikose yaguapope reta ndive.

Oyapo ikuarä jae reta ndive,

jare joko pe ombokuakuaa imembɨ reta.

3Metei ombokuakuaa kavi yae,

oyeapo regua yaguapope.

Oikatu jembiarä oipɨɨ,

jare oyuka jou kuimbae reta.

4Jare ïru tëtaguasu pegua reta oendu jesegua;

oipɨɨ reta metei ñuai pe,

jare ombotɨrɨrɨ reta karena pe güɨraja Egipto pe.

5Jókuae yaguapope kuña oecha yave oäro mbateeiño,

jare oäro vae mbaetɨ oyerova ye jarembae yave,

oipɨɨ ïru imembɨ raɨ

jare ombokuakuaa kavi.

6Tuicha ma yave,

ojo oguata ïru yaguapope reta ndive.

Oikatu jembiarä oipɨɨ,

jare oyuka jou kuimbae reta.

7Omboai mburuvicha guasu jëta reta,

omboai tëta guasu reta jare pɨpegua reta;

iñee pe omongɨɨye opaete vae.

8Jayave oñemopüa jese iyɨvɨrigua tëtaguasu reta;

oñono reta ñuai chupe,

oipɨɨ reta pɨpe.

9Karena pe oñapɨti reta oñono jɨru pe,

jare güɨraja reta mburuvicha guasu Babilonia pegua pe;

joko pe oñono reta tembipɨɨrɨru pe,

agüɨye vaerä ma oyeendu iñee

ɨvɨtɨ reta re Israel pe.’

10‘Ndesɨ, uva rami ko uvarupa pe,

ɨ jembeɨ pe oñeotɨ vae;

jäka jeta jare jeta ia,

ɨ jembeɨ pe oï jeko pegua.

11Jäka reta ipoguasu,

chugüi oyeapo mburuvicha guasu reta ipo peguarä;

okuakuaa ɨvate ïru reta güi,

oyekuaa katu ɨvate jeko pegua

jare jäka jeta jeko pegua.

12Ërei Tumpa arasɨ rupi oapomondorouka,

oyeitɨuka ɨvɨ re,

jare ɨvɨtuakuvo omotini,

osururu chugüi ia,

jäka reta ipoguasu vae yɨpi

jare oyeitɨ tata pe.

13Añave oñeotɨ ñuu pe,

ɨvɨ otini jare ñäkɨmbaea pe.

14Iyɨpɨ güi oë tata,

opa oapɨ jäka jare ia reta,

mbaetɨ etei opɨta jäka ipoguasugüe

mburuvicha guasu reta ipo peguarä.’ ”

Jae kuae tairari yaeo pegua, jare yaeo peguarä toyeporu.