JEREMÍAS 31 - Guarani Bible with DC

Israel iñemuña reta oyerova ye iɨvɨ pe

1YandeYa jei: “Jókuae ara rupi che aikota opaete ñemuña reta Israel pegua iTumparä, jare jae reta yogüɨrekota chembaerä.”

2YandeYa jei:

“Ñuu pe chepɨakavi yae

mano güi oasayepe vae reta pe.

Israel iñemuña reta yogüɨraja yave

ɨvɨ oputuu vaerä vae kotɨ.

3Ɨma yae ma che ayekuaa chupe reta jae reve:

Che roaɨu yae mboroaɨu opambae ndive;

jáeramo jekuae aveiño cheporoparareko pekotɨ.

4Romopüa pɨau yeta, Israel.

Rembopu yeta angúa raɨ,

repɨraeta reyerovia katu reve.

5Renoi yeta uvarupa,

ɨvɨtɨ reta Samaria pegua rupi,

uva oñotɨ vae, oyekou yaeta iagüe re.

6Echa oväeta ara omaeäro vae reta

osapúkai vaerä ɨvɨtɨ Efraín re, jei reve:

‘Peyu, yaja Sión pe, yamboete vaerä yandeYa Tumpa.’ ”

7YandeYa jei:

“Petairari vɨakatu jare yerovia katu pegua tairari

Jacob iñemuña reta re,

echa jae reta ko tenondegua opaete tëtaguasu reta güi vae.

Peenduka pembaemboete, pere:

‘YandeYa oepɨ imbae vae reta,

Israel güi jembɨregüe.’

8Aru reta yeta tëtaguasu ɨvɨtuguasu kotɨgua güi,

jare opata amboatɨ ɨvɨ iyapɨ kotɨ güi.

Yogüeruta jae reta ndive jesambae reta jare iköcho vae reta,

kuña reta ipurúa vae jare imembɨ oa ma vae.

¡Jeta yeyé yogüeruta jupíe reta!

9Yogüeru retata oyaeo reve oyerovia güi jare oyerure reve;

araja retata ɨ katúa rupi,

tape ipe kavía rupi, mbaetɨta oyepɨaka vae rupi.

Echa Israel tu ko che,

Efraín jae ko cheraɨ tenondegua ete.

10Tëtaguasu reta, peyeapɨsaka yandeYa iñee re,

jare pemoërakua mombɨrɨ ɨguasu jembeɨ rupigua reta pe, pere:

‘YandeYa opa omoai moai Israel iñemuña reta,

ërei omboatɨ yeta jare oyangarekota jese,

vecha iyangarekoa, ivecha re oyangareko rami.’

11Echa yandeYa güɨnoe ye Jacob iñemuña reta,

oyora metei tëtaguasu imbaepuere yae ete chugüi reta vae güi.

12Otairari retata jare oyeroviata yogüeru ɨvɨtɨ Sión re,

oyekou retata yandeYa omborɨgüe re, jae ko:

Trigo, vino jare olivo iasaite,

vecha reta jare guaka reta.

Kó raɨ oyemboɨu kavi yae vae ramita,

jare ngaraa ye ma ipɨtu reta.

13Kuñatai reta opɨraeta oyerovia reve,

jökoraiño vi kunumi reta jare ndechi reta.

Che ameeta chupe reta mbɨakatu;

jesaɨ, aipoepɨta vɨakatu pe,

jare ameeta chupe reta yerovia katu,

mbae oiporara vae ipoepɨka pe.

14Ameeta sacerdote reta jeta okaru kavi,

jare chembae vae reta oyekouta chembaeyekou re.

Che ndeYa ko jae kuae.”

15YandeYa jei:

“Ramá pe oyeendu yaeo,

tesaɨ jare yaeo yemboasɨkatu pegua;

Raquel ipɨatɨtɨ oï imembɨ reta re,

jare mbaetɨ oipota oyembopɨakatuka,

echa opa omano reta.”

16Ërei yandeYa jei chupe:

“Emombɨta mo ndeyaeo jare nderesaɨ;

echa jekoviata ndeve ndepɨatɨtɨ vae,

echa nemembɨ reta oyerova yeta

jovaicho reta iɨvɨ güi.

Che ndeYa ko jae kuae.

17Oime mbae ikavi vae nderenonde kotɨ, jae ko:

Nemembɨ reta yogüeru yeta iɨvɨ ae pe.

Che ndeYa ko jae kuae.

18Aendu tëta Efraín oyaeo jasɨ katu reve jei:

‘Che, metei toro taɨrusu imasombae rami yepi,

ërei nde chenupa jare chemomaso;

chemboyerova ye ndekotɨ,

echa nde jae cheYa Tumpa.

19Che asɨrɨ ndegüi,

ërei añave ayembopɨambuae chereko güi;

aikuaa cheyoa ko

jare akua cheu re chepɨatɨtɨ güi;

chemomarai yae cheyoa reta chetaɨrusu pegua.’

20Tëta Efraín, jae ko cheraɨ aaɨu yae vae,

jae ko cheraɨ chepɨa oyerovia yae jese vae.

Añeengata chupe tëi reve,

mbaetɨi cheakañɨ chugüi;

chepɨa pe chemaendúa avei jese

jare aiparareko yae.

Che ndeYa ko jae kuae.

21Israel, emokañɨmaa tape

yavaimbae reve reväe ye vaerä.

¡Israel, emae kavi jese,

eyerova ye jokoropi;

eyerova ye nerëta guasu reta kotɨ!

22¿Kërai yave regua pa reikota,

kuñatai iñeereendumbae rami?

Che ndeYa, ayapota mbae ambuaeyee vae kuae ɨvɨ pe, jae ko:

Kuñai oyangarekota kuimbae re vae rami vae.”

Israel oï kavi yeta vae regua

23YandeYa Imbaepuere yae ete vae Israel iTumpa jei: “Aru ye ma Judá pegua reta tembipɨɨ güi iɨvɨ pe, jare yogüɨreko ye ma pɨpe yave, jei retata kuae ñee: ‘¡YandeYa tiporerekua kuae ɨvɨtɨ oñeñono tee jare jupigüe oyeapo pɨpe vae re!’

24Judá pe jare tëta guasu reta rupi yogüɨreko yeta, kó pe oparavɨkɨ vae reta jare mɨmba iyangarekoa reta.

25Echa ameeta jeta okaru kavi jare oɨu, ikangɨ jare ipɨtu vae reta.”

26Jökorai yave apa jare amae. Chepaɨu ikavi yae cheve.

Morogüɨrökuavee päve ipɨau vae

27YandeYa jei: “Mase, oväeta ara amoñemuña vaerä jeta Israel pegua reta jare Judá pegua reta jare jeta mɨmba reta.

28Aïndaivi aapomondoro vaerä jare ambosururu vaerä; ambojopa vaerä jare amokañɨ vaerä; jare ambopɨatɨtɨ vaerä: Jökorai vi aïndaivi amopüa ye vaerä jare ambopɨau ye vaerä.

29Jókuae ara rupi ngaraa ye ma jei reta: ‘Tu reta jou uva jayasɨgüe jare taɨ reta jäi iyeɨ.’

31YandeYa jei: “Mase, oväeta ara ayapo vaerä morogüɨrökuavee päve

Che peYa ko jae kuae.

37Metei ara oñejäa yave ara,

jare oñemae ɨvɨ iguapɨka re yave,

jókuae ara aröɨrota cheyeugüi Israel iñemuña reta

opaete oyapogüe re.

Che peYa ko jae kuae.”

38YandeYa jei: “Oväeta ara cherëta guasu oñemopüa pɨau ye vaerä, oɨvate Hananeel jee vae güive Öke Jugua jee vae pe.

39Jembeɨ isɨmbita ojo joko güi Gareb iɨvɨtɨ re, javoi oyere Goa kotɨ.

40Opaete ɨvɨtɨ päu ipe kavi vae omanogüe oñeotɨ pɨpe vae jare tanimbu oyemomboa, jare opaete ɨvɨtɨ päu ipe kavi vae oï ɨ̈aka Cedrón iárambo vae güive Kavayu Röke jee vae iekina pe, kuaraɨ oëa kotɨ, oñeñono tee chevegüarä. Jare kuae tëta guasu ngaraa ye ma oyemboai.”