LEVÍTICO 25 - Guarani Bible with DC

Año ɨvɨ oputuu regua jare año yeyora regua

1YandeYa jei Moisés pe ɨvɨtɨ Sinaí re:

2“Ere Israel iñemuña reta pe: Peike ma yave ɨvɨ amee peve vae pe, jókuae ɨvɨ pemombutuu cheve.

3Ova año pemaetɨ jókuae ɨvɨ pe, jare ova año pe peitɨo uva jare pemboɨru pembaagüɨye.

4Ërei chiúa año pe, pemombutuu ɨvɨ cheve, agüɨye pemaetɨ jókuae ɨvɨ pe, agüɨye peitɨo peuva.

5Temitɨ äre reta agüɨye pearɨvo, uva reta ave yepe agüɨye peipoo; toputuu ɨvɨ jókuae año.

6Jókuae año ɨvɨ oputuu vae pe temitɨ äre reta yagüɨye vae, oupitɨta peve peu vaerä, perembiokuai kuimbae reta pe jare perembiokuai kuña reta pe, jare oparavɨkɨ jepɨ re peve vae reta pe jare ketɨgua reta yogüɨreko pepɨte rupi vae pe,

7jare perɨmba reta pe, jare mɨmba ñana rupigua yogüɨreko jókuae ɨvɨ pe vae pe. Opaete jókuae año ɨvɨ omoñemuña vae peu vaerä toyogüɨreko.

8Peipapa semana pe chiu ara vae, chiu año rami, jayave jókuae chiu año vae peipapa chiu vese, jae ko cuarenta y nueve año,

9chiúa yasɨ pe, payandepo ara pe, mɨmba oyeyukagüe cheɨ̈ro vaerä mbaeyoa re vae iara pe, pemoñeeuka täta temimbɨ vecha kuimbae-räti pegua opaete peɨvɨ rupi.

10Jare año cincuenta peñono tee Tumpa peguarä, año yeyora pegua ko jare pemoërakua yeyora opaete jókuae ɨvɨ pe yogüɨreko vae reta pe. Toyogüɨraja ye metei ñavo iɨvɨ ae pe, jare metei ñavo tojo jëtara pɨri.

11Jókuae año cincuenta toiko peve año yeyora pegua; agüɨye pemaetɨ, agüɨye temitɨ äre reta pearɨvo, agüɨye peitɨo peuva jare agüɨye vi peipoo.

12Echa año yeyora pegua ko; toiko tee peveguarä. Peiko temitɨ äre reta iagüe re jókuae año.

13Jókuae año yeyora pegua pe, toyogüɨraja ye metei ñavo iɨvɨ ae pe.

14Pemee yave mbae perapicha pe ani pegua yave mbae chugüi, agüɨye pembotavɨ perapicha.

15Kia nunga vae ogua yave ɨvɨ tomboepɨ jókuae mbovɨ año oyeparavɨkɨta pɨpe vae, año yeyora pegua güire, ani kia nunga vae omee yave iɨvɨ, toipapa oyeparavɨkɨta pɨpe vae jare temitɨ reta oñemuñata pɨpe vae reve:

16Jeta año vɨteri oyeparavɨkɨta pɨpe yave, toyeupi jepɨ, ërei mbovɨ añoño ma oyeparavɨkɨta pɨpe yave, togüeyɨ jepɨ; mbae oñemee vae, toñemee año reta oyeparavɨkɨta pɨpe rupi.

17Agüɨye kia nunga vae tombotavɨ japicha, peipoɨu peTumpa güi, echa che ko peYa Tumpa.

18Peyapo cheporookuai reta, jare peñovatu pepɨa pe. Peyapo yave peiko pɨagüiveta jókuae ɨvɨ pe;

19yagüɨye kavita peremitɨ reta, jeta mbae penoita peu vaerä, jare peiko pɨagüiveta jókuae ɨvɨ pe.

20Ërei pere yave: ‘¿Mbae ra yauta chiúa año re, echa mbaetɨta ñamaetɨ, jare mbaetɨta yamboɨru mbaagüɨye reta?’

21Jayave che, cheporerekuata peré ovaa año re, jare jókuae año pemboɨruta mbaagüɨye mboapɨ año peguarä;

22jare juría año pe pemaetɨ; jare peu pembaagüɨye oarasagüe chaúa año regua, oime regua mbaagüɨyepɨau.

23Ɨvɨ agüɨye toñemee jekuae avei pegua, echa chembae ko; pe reta peguataiño peiko vae ko, ketɨgua ko pe reta chevegua jókuae ɨvɨ pe.

24Jáeramo, opaete ɨvɨ penoi vae, pemee iya tenondegua pe ipuere vaerä ogua ye.

25Perëtara omee yave iɨvɨ paravete güi, jayave jëtara köiño chugüi vae ipuere ogua ye jókuae jëtara omeegüe.

26Mbaetɨ yave güɨnoi jëtara ogua ye vaerä chupe iɨvɨ omeegüe, ërei oupitɨ chupe ogua ye vaerä yave,

27toipapa año reta omee güire, jare año reta oata oupitɨ vaerä año yeyora pegua vae, jokuaeño tomboepɨ, jökorai topɨta ye iya ipo pe.

28Ërei mbaetɨ yave ipuere ogua ye, topɨta jókuae kuimbae ogua vae ipo pe, oupitɨ regua año yeyora pegua; jayave jókuae año ɨvɨ topɨta ye iya ipo pe.

29Kia nunga vae omee yave jo tëta guasu oñekësegüe pe, omee güire ipuere ogua ye ndei metei año mbove.

30Ërei mbaetɨ yave ipuere ogua metei añoa pe, jókuae o topɨta ogua vae ipo pe jare iñemuña reta ipo pe jekuae avei pegua. Año yeyora pegua pe ngaraa ma opɨta ye jókuae iyagüe ipo pe.

31Ërei o reta tëta raɨ oñekësembaea rupi ñogüɨnoi vae, toñemee ɨvɨ oñemee ramiño; ipuere oyegua ye jare año yeyora pegua pe, ipuere opɨta ye iya ipo pe.

32Ërei Leví iñemuña reta ipuere ogua ye jo oipotagüe ara tëta guasu rupi, jae reta yogüɨrekoa rupi.

33Leví iñemuña reta güi ombaegua vae toë jókuae o ani tëta guasu güi, año yeyora pegua pe, echa Leví iñemuña reta jaeño ko güɨnoi jo Israel iñemuña reta ipɨte pe.

34Jare jëta guasu iyɨ́vɨri oï ɨvɨ mɨmba ikarúa renda vae, mbaetɨta oñemee, echa jókuae ɨvɨ jae reta imbae ko jekuae avei pegua.

35Kia nunga vae perëtara iparavete opɨta yave, jare ou pekotɨ pemborɨ vaerä, pemborɨ ketɨgua rami, jare toiko pe ndive pero pe.

36Agüɨye imbae pepɨ̈ro chugüi, agüɨye vi pekovara chupe pemborɨ vae re, peipoɨu peTumpa güi, toiko jókuae perëtara pe ndive.

37Agüɨye korepoti peiporuka chupe vae re, pemoïru ye pekovara yave, agüɨye vi tembíu reta jepɨ peupi chupe.

47Ketɨgua ani mboupa oyemboikokatu yave peɨvɨ pe, jare perëtara iparavete opɨta iyɨke pe yave, jare oñemee jókuae ketɨgua pe ani jëtara pe yave,

48jókuae oñemee vae ipuere kia nunga vae ogua. Metei jëtara ipuere ogua,

49ani itutɨ, ani itutɨ taɨ ipuere ogua, ani jëtara köiño vae ipuere ogua, ani jae etei vi ipuere oyemboepɨ oime yave mbae güɨnoi,

50toipapa año reta oñemee güire, jare mbovɨ año ra oata año yeyora pegua vae, tomboepɨ jókuae año reta oata oupitɨ año yeyora pegua vae, jare toyemboepɨ metei oparavɨkɨ vae pe oyemboepɨ rami.

51Ërei jeta año vɨteri oata yave oupitɨ vaerä año yeyora pegua, jayave toyemboepɨ jókuae korepoti oñemee repɨ güi, jókuae kuimbae iguaa pe.

52Ërei mbovɨ añoño ma oata yave año yeyora pegua, jókuae ogua vae tomboepɨ año reta oata vaeño.

53Jare jókuae ogua vae tomae kavi jese año rupi oparavɨkɨ vae re rami, agüɨye pemaeño toyokuaiasɨ katu.

54Mbaetɨ yave kia nunga vae ipuere ogua, jayave toyeyora año yeyora pegua pe ramo, jae jare taɨ reta,

55echa cherembiokuai reta ko Israel iñemuña reta; cherembiokuai aeño ko. Che ko anoe reta ɨvɨ Egipto güi. Che ko peYa Tumpa.