1¡Chembogüérai ma körai aiko vae!
Cheräseta chepuere rupi,
chemiarita jasɨ katu aiporara aï vae re.
2Jaeta Tumpa pe: Agüɨye chemboeko;
eikuaauka cheve maera ko reyemboyovaicho che ndive vae.
3Nde etei ko cheapo,
¿jaekavi pa ndeve reyuvanga katu jare chemotareɨ vaerä,
jare reë vaerä iyoa vae reta iyemongeta jekovia pe?
4¿Kuimbae reta omae ramiño yera nde remae vi?
5¿Kuimbae reta mbovɨ ara oiko ramiño yera nde reiko vi;
ani kuimbae iaño ramiño vi yera neaño?
6¿Maera pa reeka etei jupimbae ayapo vae,
jare reeka cheyoa?
7Yepe tëi nde reikuaa, che mbaetɨ ko ayapo jupimbae,
jare mbaetɨ kia ipuere chereepɨ vaerä ndegüi.
8Ndembaepuere pe ko cheapo,
javoi añave reipota chemokañɨtei.
9Nemaendúa, cheapo ko tuyuapo güi,
¿chemondo yeta pa añave ɨvɨkuirä?
10Chepɨyereä pa neche oyepɨyere rami
jare chemotäta kesu rami.
11Chemboemimonde chesoo pe jare chepire pe,
jare chekägüe remboya oyoe cherayɨ pe.
12Remee cheve tekove jare cheparareko,
jare ndeporoangareko rupi aikove aiko.
13Ërei oime yepe ndepɨa pe rereko kuae yemongeta,
jókuae yemongeta mbaetɨ kia oikuaa:
14Jae ko, cheyoa yave, nde remae reï cheyoa re,
jare mbaetɨ neɨ̈ro cheve kërai yepe.
15Chereko yave, taiporara,
ërei mbaetɨ chereko yave, ngaraa amopüa cheäka,
echa jeta mbae chemomarai, jare aiporara yae aï.
16Añemopüa ye yave, nde yaguapope rami reyuta cheve,
jare reyapo yeta chekotɨ mɨakañɨ.
17Rembopɨau avei cheré teko reta,
remoïru ye chekotɨ ndearasɨ;
¡sundaro reta oyopoepɨ avei rami!
18¿Maera pa remaeño aa vaerä chesɨ güi?
Ikavi amano voi tëi, jayave ngaraa etei kia chereecha.
19Mbaetɨta ko aikove aiko viña,
chesɨ jɨe güi voi aja yave tɨvɨa pe.
20¿Mbovɨñoä yera cheara reta aikove aiko vaerä?
¡Emaeño mo cheré, tachepɨakatu michi raɨ pegua yepe!
21Ndei aja mbove, ayu yembae vaerä;
ɨvɨ pɨtumimbía pe.
22Mbaetɨ mbae ikavi joko pe,
pɨtumimbi oñova tembipe pe.
Who We AreWhat We EelieveWhat We Do
2025 by iamachristian.org,Inc All rights reserved.
