JOB 5 - Guarani Bible with DC

Elifaz jekuaeñoi omboeta Job pe

1Añave, esapúkai;

¿oime ra kia oendu vaerä neñee?

¿Kia araɨgua re ra reyemboyata?

2Añete, yarakuaambae oyeyukauka arasɨ pe,

jare imbaepotarai vae ñemoägüɨro pe.

3Che aecha yarakuaambae omboɨpɨ oiko kavi,

ërei jarembae omboɨpɨ jo opa oyemboai.

4Taɨ reta mbaetɨ kia omborɨ;

mburuvicha reta mbaetɨ omae kavi jese reta,

jare mbaetɨ kia oepɨ reta vaerä.

5Oarɨvogüe jouta chugüi yɨmbɨaɨ vae reta,

oekɨ retata yuu ipɨte güi ave,

jare imonda vae reta opɨ̈rota imbaeyekou.

6Echa mbɨatɨtɨ mbaetɨ ko oë ɨvɨkúi güi,

yemoambeko ave mbaetɨ jeñɨi ɨvɨ güi.

7Kuimbae jeko pegua ko oime tembiporara,

tatapiriri oyeapo tata güi rami.

8Che yave aekata tëi ko Tumpa chemborɨ vaerä,

jare añonota tëi ko ipo pe maratu aï vae.

9¡Jae oyapo mbaembae tuichagüe, yaikuaa rapembae vae;

jare mɨakañɨ reta oyepapa rapembae vae!

10Ombou ama ɨvɨ iárambo vae;

jae omongɨ ñana reta re.

11Paravete vae reta ombotuicha vae;

jare ipɨatɨtɨ jëtara imano re vae reta ombopɨakatu vae.

12Ipoki ikavimbae oyapo vae reta iyemongeta güɨrokomegua chugüi,

agüɨye vaerä mbae oyapo reta.

13Jae oipɨɨ ipoki vae reta jeko pe aeño;

jare güɨrokomegua ipɨapochɨ vae reta iyemongeta.

14Ara pe ave pɨtumimbi chupe reta,

arambɨte pe ave opovɨvɨ oguata reta pɨ̈tu yave rami.

15Tumpa güɨroasayepe paravete vae jare oikoasɨ katu vae,

jeko pɨ̈chɨi vae reta imbaepuere güi.

16Jeseño paravete vae reta oyeko,

¡jae oyokenda jeko pɨ̈chɨi vae reta iyuru!

17Mase, oyekou ko jókuae kuimbae Tumpa oiporarauka chupe vae.

Jáeramo agüɨye eröɨro Imbaepuere yae ete vae

jae ko oporombopere, ërei jae yeño ko oipoano.

19Ndereroasayepe aveita tembiporara güi,

tembiporara ngaraa etei maratu ndeapo.

20Karuai pe ndereroasayepeta mano güi,

ñeraro pe ndereroasayepeta mano güi.

21Ñeeasɨ katu güi neovatuta,

jare ngaraa rekɨɨye ou yave mbaesusere.

22Repukata karuai jare mbaesusere reta ou tëi yave,

jare ngaraa rekɨɨye mbaeporou reta kaa rupigua güi.

23Ita reta ave ngaraa ndemboavai ndeko pe,

mɨmba reta ñana rupigua ngaraa maratu ndeapo.

24Ndero pe opaete mbaembae ojo kavita ndeve,

reipapa yave nderɨmba reta ngaraa oata ndeve.

25Jaeramiño vi renoita jeta neñemuña reta,

jeta ñana ɨvɨ re rami.

26Ndendechi yae pe remanota,

trigo yagüɨye ma yave oyemboɨru vae rami.

27Mase, jae kuae opaete roikuaagüe, jare añetete ko;

eyeapɨsaka jese jare eikuaa ndeyeupe.