SABIDURÍA 15 - Guarani Bible with DC

Israel mbaetɨ omboete tumpa-raanga

1Nde, ore Tumpa, jupi vae ko nde jare ndepɨakavi vae,

ndepɨaguasu yae ko jare opaete re reyangareko ndeporoparareko reve.

2Yepe oreyoa, ndembae ko roiko jare roikuaa ndembaepuere vae ko nde;

jare ngaraa ma royapo mbaeyoa, echa ko roikuaa nde ndembae ko roiko vae.

3Rokuaa vaerä nde jae ko jupi vae,

jare roikuaa nde mbaepuere ko yae ko vae yave jae ko mano mbaetɨta ipuere jese vae.

4Echa mbaetɨ romaeño royembotavɨuka

jókuae tumpa-raanga kuimbae ipoki mbae oyapo vae jembiapogüe pe

jare imboyɨguaa reta jembiapo añetegüe vae rami vae pe,

5jae reta imae omokɨ̈reɨ kuimbae iyarakuaa mbae reta

oipotauka vaerä chupe reta mbae iä tumpa-raanga rami oï oikove mbae oï vae.

6Jókuae tumpa-raanga iyapoa reta

jare oaɨu reve omboete vae reta reve,

oipota omae ñogüɨnoi ikavimbae re

jare mbaetɨ eteita oäro reta mbae ikavigüe.

Ñaeu-apoa re oyembojaanga vae

7Yambojaanga, oñaeu-apo vae pe,

oikaambi ete kavi tuyuapo ichuumbi vae

jare opoko oyapo mbaerɨru yaipota potagüe;

jare jókuae tuyuapo güiño vi oyapo

oiporu vaerä tuicha vae reta

jare ïru mbaerä oyeporu poruiño vaerä vae;

jaema jae ko, jökorai, jei

kia ko jae kuae pe oyeporu vaerä ko jare pea pe oyeporu vaerä vae.

8Jupiveiño, opoko vi oyapo mbae oñereröɨro vae,

jókuae tuyuapo güi yeño oyapo metei tumpa raanga iä;

metei kuimbae kárumbo ramo oë ɨvɨ güi vae

jare jarembaeño ojo yeta ɨvɨ pe jókuae oyeekɨa güi vae pe,

omee ye ma iya pe tekove oiporugüe yave.

9Oyemongeta vaerägüe jae omanota ko vae pe

jare jekove yapúa ko vae pe,

opoko oyoapɨraa raa oro jare korepoti pe oparavɨkɨ vae reta ndive,

oyemboe jiero iyu vae iyavɨkɨa reta re

jare oyemboete mbae jaanga jaanga reta oyapo vae pe.

10Ipɨa tanimbu rami ko,

jare iporoäro, ma ete ko ikaviä ɨvɨ güi,

jekove tuyuapo jepɨ ave ko oupitɨa,

11echa ko mbaetɨ Tumpa ombotenonde, jae iyapoa vae,

oñono jese metei tekove tätagüe vae

jare omee chupe pɨ̈túe tekove pegua.

12Ñaeu-apo regua oyemongeta tekove yuvangaño ko vae

jare yaikove yaiko vae, metei maemee renda mbae ñanoigüe yambotuicha vaeräño ko.

Jare jei: “Oipotagüe, ikavimbae ave,

yayapota ko korepoti ñanoi vaerä.”

13Kuae kuimbae, jókuae tuyuapo güiño oyapo

tumpa-raanga jare mbaerɨru reta oyekata vae,

jae oikuaa katu ko opaete güi jaekavimbae oyapo oï vae.

Egiptoɨgua reta imbaeyavɨ

14Ërei jókuae ma iyarakuaa mbae ete

michia reta oyapɨraa ye yarakuaambae vae reta

jae ko tovaicho reta nerëta ipo reta re oyuvanga vae reta,

15echa güɨreko reta tumpa rami

opaete tumpa-raanga reta ïru tëtaguasu reta rupi,

tumpa-raanga reta oime jesa, ërei mbaetɨ omae vae,

oime itï, ërei mbaetɨ ipɨ̈túe,

oime iyapɨsa, ërei mbaetɨ oendu,

oime ipoäka, ërei mbaetɨ opoko mbae re,

oime ipɨ, ërei mbaetɨ oguata.

16Tumpa-raanga reta kuimbae reta oyapogüe,

kia oikove tekove oiporugüe ndive oiko vae oyapogüe,

echa ngaraa kia nunga kuimbae ipuere oyapo metei tumpa jae rami etei vae;

17omano vaerä aeño oiko vae, ipo reta mbaeyoa pegua vae

oyapota vi ko mbae oikovembae vae;

jaema ko jepɨ jókuae mbaembae reta omboete vae güi,

echa jae oime vɨteriño güɨnoi tekove,

ërei jókuae reta ko mbaetɨ oikove.

18Egiptoɨgua reta omboete ye vi,

mɨmba yavaete katu vae reta,

jaema, yamboyovake yave ïru vae reta ndive,

ñamae jese reta yarakuaa etei ko vae;

19mbaetɨ etei mbae ipöragüe güɨnoi ombokavi nunga michi vaerä,

oime amogüe mɨmba güɨnoi rami vae;

jókuae reta jae ko mɨmba reta

Tumpa etei oyapokavi mbae jare oyerovia omae jese vae.