ECLESIÁSTICO 47 - Guarani Bible with DC

Natán jare David

1Jae jaɨkue rupi ou Natán,

ou oyemboɨ David jóvai.

2David ikavigüe yae ko Israel pe,

mbaekɨra ikavigüe

oyeapɨ vae rami ko.

3Oyuvanga yaguapope reta ndive kavararaɨ ramiño oyapo,

jare tamiguasu reta ndive vecha reta ramiño oyapo.

4Itaɨrusu vɨteriño oiko yave, oyuka kuimbae puku vae

jare opa omboai tëta iñemomarai.

Ipo pe ombovava itamamboka

jare oipɨaka oñono Goliat iyembotuicha.

5Echa jae oiko Tumpa ɨvate ete pe oï vae re,

jae ko omee mɨ̈rata iyɨva pe

oyuka vaerä jókuae ñoraro regua vae

jare jeta reta oporomoamɨri vaerä.

6Jókuae ramo kuñatai reta oyemongoi chupe

omboete reta diez mil ma oporoyuka vae re.

Jare mburuvicha guasurä ma oiko yave, oyapo ñoraro

7jare opa omoamɨri jovaicho reta iyɨpɨ rupi ñogüɨnoi vae reta,

omopüa ñepɨ̈roka reta filisteo reta ipɨte rupi,

jare opa ombogüe chugüi reta imbaepuere joko añave yogüɨreko vaerä.

8Opaete mbae oyapogüe rupi

omee yasoropai jare mbaemboete Tumpa ɨvate ete pe oï vae pe.

Opaete ipɨa reve oaɨu iYapoa,

jare ara ñavo oyemongoi chupe salmo rupi.

9Jae omboɨpɨ oyembopu vaerä tembiporu iïcha vae tairari pegua reta mɨmba oyeyuka oyeapɨ jese vae jóvai,

jare oñono oiko vaerä yemongoi salmo rupi jare oyembopu vaerä arpa ndive.

10Omopöra pɨpe arete reta

jare oñono oyemboarete vaerä año,

Tumpa jee oyemboete yave

yemongoi reta pe tupao pe köe rupive.

11Jökorai vi Tumpa iñɨ̈ro chupe imbaeyavɨ reta re

jare omee chupe mbaepuere opambae vae,

omee chupe oiko vaerä mburuvicha guasurä

jare oñono iporookuaía Jerusalén pe.

Salomón

12Yasoropai David pe, oeya jekovia pe taɨ iyarakuaa katugüe vae

oiko pɨagüive.

13Salomón oiko mburuvicha guasurä ikavigüe vae pe,

jare Tumpa omee chupe oiko kavi vaerä iyɨpɨ rupigua reta ndive;

jae omopüa metei tupao Tumpa peguarä

jare oyapo metei tupao oiko vae.

14¡Täta ndearakuaa katu reiko, Salomón, ndetaɨrusu pe:

Ndeporomboe opa oporoapɨraa Nilo rami!

15Remonɨe ɨvɨ ndearakuaa pe

jare ara ndeyemongoi mbaemboete pegua pe.

16Nerërakuagüe ojo oväe matɨ rupi,

jare ndepɨaguasu jeko pegua reyeaɨuuka.

17Ndeyemongoi reta pe, ñee arakuaa pegua reta, mbae yavai yae vae reta, jare ñee reta pe

remopɨakañɨ reeya tëta reta.

18“Tumpa jembiaɨu” jei reta ndeve,

tee tuichagüe vae oiko Israel pe vae.

Oro remboatɨ jiero rami

jare reyapo korepoti jeta vae plomo rami.

19Ërei reñemee kuña reta pe

jare remee nderete pe jae jeigüe oiko vaerä.

20Reñono mbae ikɨa vae ndeyemboete vae re

jare nderupa vi remongɨa,

rembouuka vi tembiporara neñemuña reta iárambo

jare susere nerëtara reta kotɨ.

21Jare jökorai tëta guasu reta oyeapo mókoi yemboyao,

Efraín oiko vaerä metei ɨvɨ jekopochɨ vae pegua.

22Ërei ngatu, Tumpa mbaetɨ iporoaɨu oekɨ

jare mbaetɨ oyapombae chupe reta güɨrökuaveegüe vae.

Jókuae ramo mbaetɨ opa oyuka jembiparavo reta iñemuña

jare mbaetɨ vi opa omokañɨtei jembiaɨu vae reta iñemuña,

jaema Jacob pe oeya mbovɨ,

jare David iñemuña reta mbovɨ oyepota ramogüe.

23Salomón indechi pe pe omano,

oeya jekovia pe metei taɨ

tuicha arakuaambae pe vae jare paravete yemongeta pe vae:

Roboam, iporomboarakuaa pɨ̈chɨi vae rupi

güɨraja tëta reta ikavimbae rupi.

24Joko güi ou Jeroboam, Nabat taɨ

(agüɨye kia timaendúa jese),

jae oyapo mbaeyoa jare Israel pe vi oyapouka mbaeyoa,

jökorai Efraín pegua reta opa oitɨuka

jare opa oyemombouka reta iɨvɨ güi.

Elías

25Jae reta imbaeyoa tuicha yae ko,

jare opaete oñemee reta oipotagüe ikavimbae pe,