ECLESIÁSTICO 17 - Guarani Bible with DC

1Tumpa oyapo kuimbae ɨvɨ güi,

jare oyapo ɨvɨ pe ojo ye vaerä.

2Oipapaño ara reta oñono chupe,

jare omee chupe mbaepuere opaete mbae oï ɨvɨ iárambo vae re.

3Omee chupe mbaepuere imbae rami vae,

¡oyapo jae iä rami etei!

4Oyapo opaete ïru vae oyeapo vae reta okɨɨye vaerä chugüi,

jare omee chupe mbaepuere mɨmba pochɨ vae regua jare güɨra reta regua.

6Omee chupe mbɨarakuaa, ñee, tesa reta,

apɨsa reta jare äka oikuaa vaerä.

7Omee kuimbae reta pe pɨa arakuaa jare oikuaa vaerä,

jare oechauka chupe reta ikavi vae jare ikavimbae.

8Oikuaauka chupe reta omee vaerä chupe mbaemboete,

jare oechauka chupe reta jembiapo reta tuicha vae,

9kuri jae reta imiari vaerä ïru vae reta pe

10jare omboete reta vaerä jee ikɨambae vae.

11Omee vi chupe reta ipɨarakuaa,

jare oeya chupe reta metei mborookuai tekove omee vae.

12Oyapo metei ñemoïru opambae jae reta ndive,

jare oikuaauka chupe reta iporookuai reta.

13Jae reta oecha Tumpa iyemboetea renda tuicha vae

jare oendu reta iñee täta yae ete vae.

14Jei chupe reta: “Agüɨye mbae ikavimbae peyapo”,

jare oñono chupe reta mborookuai japicha peguarä.

15Kuimbae reta jeko jaeñoi oï Tumpa jóvai,

mbaetɨ oasayepe imae güi.

17Omoai ɨvɨ iárambo tëtaguasu reta yave,

metei ñavo pe oñono juvicharä;

ërei Israel ko Tumpa imbae.

19Opaete kuimbae reta oyapogüe

Tumpa pe jembipe katu ko kuaraɨ rami.

Güɨnoiñoi ko joko pe oyapo retagüe.

20Mbaetɨ ko oñemi pɨ̈chɨi vae oyapo retagüe,

jare oikuaa ko mbaeyoa reta oyapogüe.

22Jae imaenduañoi ko mbota kuimbae omeegüe re,

jare oñovatu jókuae neresäɨkunumi rami ikavi vae oyapogüe.

23Jaɨkue rupi omeeta chupe reta mbota,

metei ñavo ou rupi.

24Jare kia ñavo oyembopɨambuae vae pe omee chupe oyerova ye vaerä ikotɨ,

jare ombopɨa maia kia iporoäro omokañɨ vae.

Mbarea yayerova ye vaerä Tumpa kotɨ

25Eyerova Tumpa kotɨ jare eeya mbaeyoa;

eyerure jóvai jare embogüe ndeporokura reta.

26Eyerova ye ɨvate ete oï vae kotɨ, esɨrɨ ikavimbae güi,

jare emotareɨ opaete ndepɨa reve tumpa-raanga yemboete.

27Mano jeigüe oyeapo vae pe ngaraa kia ipuere omee mbaemboete Tumpa pe,

jaeño ma oikovegüe reta ipuereta omee chupe yasoropai.

28Omano vae, mbaetɨ oiko rami, ipuere potaä omboete;

oikovegüe jare ikavi oï vae jókuae ko ipuereta omboete Tumpa.

29¡Tuicha ete ko Tumpa iporoparareko

jare iñɨ̈ro kia ñavo oyevɨ ikotɨ vae pe!

30Opaeteä ko ipuereta kuimbae peguarä;

metei ave ko kia omano potaä.

31Mbaetɨ ko mbae má jembipe kuaraɨ güi vae,

ërei ngatu kuae oime iñemi.

Jökorai ko kuimbae, soo jare maekägüeño ko,

oikuaa kavi yemongeta pɨ̈chɨi vae.

32Tumpa omae sundaro araɨgua re,

¡ërei kuimbae ko jaeño ma ɨvɨkúi jare tanimbu!