1Jaɨkue rupi aendu Tumpa täta yae osapúkai reve jei cheve: “¡Yogüeru ma oväe tëta guasu pe oiporaraukata vae reta, metei ñavo güeru ipo pe tembiporu oporomokañɨtei vaerä pɨpe!”
2Jayave aecha, ova kuimbae oike öke ɨvɨtuguasu kotɨ oï vae rupi, jare metei ñavo güeru ipo pe tembiporu oporomokañɨtei vaerä pɨpe. Jae reta ipɨte pe ou metei kuimbae jemimonde tïiasɨ lino pegua vae; kuae güeru ikúa re jembiporu ombaekuatía pɨpe vae. Oike reta, jare yogüeru oyemboɨ mɨmba oyeyuka oyeapɨ jese vae jiero iyu vae pegua iyɨpɨ pe.
3Jare Israel iTumpa iyemboetea oyemboɨvate jókuae araɨgua querubín iárambo güi, jare ojo tupao pe yaikea pe. YandeYa oenɨi jókuae kuimbae jemimonde tïiasɨ lino pegua vae, ikúa re güɨraja jembiporu ombaekuatía pɨpe vae.
4Jare yandeYa jei chupe: “Emboapɨ eguata tëta guasu Jerusalén rupi, jare opaete ipɨatɨtɨ jare oyembopɨaä mbaeyoa oyeapogüe re jókuae tëta guasu pe vae, emokañɨmaa jesɨva pe.”Ap 7.2-3; 9.4; 14.1.
5-6Jare ïru kuimbae reta pe jei: “Pekua kuae kuimbae jaɨkue peguata tëta guasu rupi, jare pemboɨpɨ chetupao güive peyuka peipararekombae reve ndechi reta, kunumi reta, kuñatai reta, michia reta jare kuña reta. Ërei agüɨye pepoko oñemokañɨmaa ñogüɨnoi vae reta re.” Jayave jae reta omboɨpɨ oyuka kuimbae ndechi reta güive tupao jóvai ñogüɨnoi vae.
7Jare jei chupe reta: “Pekua tupao pe jare pemongɨa tugüɨ pe, pemotɨnɨe tëogüe pe tupao joka.”
Oë reta jare omboɨpɨ oyuka tëta guasu pegua reta.
8Jae reta omboɨpɨ oporoyuka yave, apɨta cheño. Jayave ayetavatɨka chetindɨasɨ reve ɨvɨ re jare cheräse reve jae: “¡CheYa Tumpa! ¿Opata pa remokañɨtei Israel iñemuña reta jembɨregüe, reitɨ ramboeve ndearasɨ Jerusalén re?”
9YandeYa jei cheve: “Mbaeyoa oyapo Israel pegua jare Judá pegua reta vae ikaviä yae ko. Kuae ɨvɨ pe jeta yae oyoyuka vae; jare kuae tëta guasu pe jeta jupimbae. Echa jei reta: ‘YandeYa oeya ma ko kuae ɨvɨ, ngaraa oecha yayapogüe.’
10Jáeramo ngaraa cheɨ̈ro chupe reta, ngaraa aiparareko amae jese reta, aiporaraukata chupe reta, opaete jeko reta re.”
11Jare jókuae kuimbae jemimonde tïiasɨ lino pegua vae, ikúa re güɨraja ombaekuatiata pɨpe vae, ou ye jei: “Opa ma ayapo nde cheokuai vae.”
Who We AreWhat We EelieveWhat We Do
2025 by iamachristian.org,Inc All rights reserved.
