1CheYa Tumpa, emboɨke ndeapɨsa jare eyeapɨsaka cheré,
echa chepɨatɨtɨ yae jare cheparavete aï;
2cheövatu, echa jupi rupi ko aiko nderóvai.
Nde ko cheTumpa;
¡che nderembiokuai ayeko nderé vae, chereroasayepe!
3CheYa Tumpa, cheparareko,
echa ara ñavo ayerure avei ko ndeve.
4CheYa Tumpa,
che nderembiokuai, chemboyerovia,
echa ayerure ko ndeve.
5Echa nde cheYa, ndepɨakavi jare neɨ̈ro vae ko;
ndeporoparareko tuicha yae ko nereenɨi vae reta kotɨ.
6CheYa Tumpa,
eyeapɨsaka cheyerure re,
¡eïndaivi eï cheñee amoëta romoñera reve vae re!
7Chepɨatɨtɨ aï yave roenɨi,
echa nde reendu cheve vae ko.
8CheYa Tumpa,
¡mbaetɨ tumpa-raanga reta güi metei ave nde rami vae!
¡Nderembiapo ave mbaetɨ omboyovake vae!
9Opaete tëtaguasu reta nde ko reyapo,
yogüeruta omee mbaemboete ndeve cheYa,
jare omboete yae retata nderee.
10Echa nde ko Tumpa tuicha yae ete vae,
¡mɨakañɨ iyapoa!
Mbaetɨ yé ïru Tumpa.
11CheYa Tumpa, chemboe aguata vaerä nderemimbota rupi,
aiko vaerä jupi rupi nderóvai;
eñono kavi chepɨa, amboete vaerä nderee.
12CheYa Tumpa,
toromboete opaete chepɨa ndive,
tamboete nderee jekuae avei rupi.
13Echa ndeporoparareko tuicha yae ko chekotɨ,
¡reroasayepe cherekove omanogüe reta ñogüɨnoia pe aja vaerägüe!
14CheRu Tumpa,
ipɨapochɨ vae reta oñemopüa chekotɨ,
oyomboatɨ oyemongeta reta cheyuka vaerä,
mbaetɨ etei oipoɨu reta ndegüi.
15Ërei nde cheYa,
Tumpa iporoparareko yae vae,
mbaetɨ iyarasɨ raivi vae,
tuicha iporoparareko jare añete vae ko.
16Emae cheré, ¡cheparareko!
¡Emee mbaepuere che nderembiokuai pe!
¡Cheövatu, che nderembiokuai kuña imembɨraɨe!
17Eyapo che ndive kañɨmaa ikavigüe vae,
toecha chemotareɨ vae reta jare timara reta,
echa, ¡nde ko cheYa Tumpa, chemborɨ jare chembopɨakatu!
Who We AreWhat We EelieveWhat We Do
2025 by iamachristian.org,Inc All rights reserved.
