2 CRÓNICAS 23 - Guarani Bible with DC

1Chiúa año pe sacerdote Joiada omondo oenɨi sundaro ruvicha reta, jae kuae reta: Azarías, Jeroham taɨ; Ismael, Johanán taɨ; Azarías, Obed taɨ; Maasías, Adaía taɨ; Elisafat, Zicri taɨ; kuae reta pe jei oñemoïru vaerä jae ndive.

2Jae reta opa omboapɨ oguata ɨvɨ Judá rupi, jare omboatɨ reta levita reta opaete tëta guasu reta Judá pegua güi, jare tëtara ñavo vae juvicha reta Israel pe, kuae reta yogüeru opaete Jerusalén pe.

3Jare opaete jókuae yatɨ vae reta oyapo morogüɨrökuavee päve mburuvicha guasu ndive tupao guasu pe.

Jare Joiada jei chupe reta: “¡Mase, ko penoi mburuvicha guasu taɨ! Jae toiko mburuvicha guasurä yandeYa jei David2 S 7.12. iñemuña reta kotɨ rami.

4Añave jae kuae peyapo vaerä: Peyemboyao mboapɨ yemboyao pe; metei yemboyao pegüi reta peäro tupao guasu jöke sacerdote reta jare levita reta ara mbutuu pe oyeokuai vae reta ndive;

5mokoía yemboyao toäro mburuvicha guasu jo iporookuaía pegua; jare mboapɨa yemboyao toäro öke Cimiento jee vae. Jare opaete vae reta toñogüɨnoi yandeYa itupao guasu joka reta rupi.

6Ërei agüɨye kia toike yandeYa itupao guasu pe, jaeño sacerdote reta jare levita reta mbaravɨkɨ oyapo vae, jae retaño ipuere oike, echa oñeñono tee reta ko Tumpa peguarä, jare opaete vae reta peäro yandeYa jóvai pemboete reve.

7Jare levita reta toñova toäro mburuvicha guasu jare metei ñavo togüɨnoi jembiporu ñeraro pegua ipo pe, kia nunga vae oike yave tupao guasu pe, tomano. Peyangareko mburuvicha guasu re, jae ojoa rupi ou ye regua.”

8Jayave levita reta jare opaete vae reta oyapo opaete sacerdote Joiada oyókuai vae. Metei ñavo tenondegua reta oyapo sacerdote jei vae, oike oyeokuai ara mbutuu pe vae ndive jare oë vae reta ndive, echa sacerdote Joiada mbaetɨ omaeño ojo iparavɨkɨ güi oë vae reta.

9Jayave Joiada omee sundaro ruvicha reta pe mii reta, yeopiaka tuicha vae jare michi vae reta mburuvicha guasu David imbae, Tumpa itupao guasu pe oï vae.

10Jare oñono kavi opaete vae reta, metei ñavo güɨnoi kɨsepuku ipo pe, jare ñogüɨnoi reta tupao guasu iyɨ́vɨri iyakatu kotɨ jare iyasu kotɨ jare mɨmba oyeyuka oyeapɨ jese vae rupi tupao guasu jóvai kotɨ, oyangareko reta vaerä mburuvicha guasu re.

11Jayave Joiada güɨnoe mburuvicha guasu taɨ jare oñono jese äka-regua jare omee chupe tembikuatía mborookuai güɨnoi vae, jare omoërakua reta jae ko mburuvicha guasu; jare Joiada taɨ reta ndive opɨyere asaite jese yave, opaete vae reta osapúkai jare oyepopete reta jese.

12Atalía oendu yave jeta vae reta jäsémbai osapúkai, jare osɨi reta omoërakua mburuvicha guasu, jae ojo tupao guasu kotɨ jeta vae reta ñogüɨnoia pe.

13Jare oecha joko pe mburuvicha guasu oyemboɨ oï öke pe okɨta iyɨpɨ pe, jare iyɨke pe ñogüɨnoi mburuvicha reta jare mimbɨguasu imoñeea reta; otairari vae reta jemimbɨ ndive, otairari mbaemboete pegua. Jayave Atalía omondoro jemimonde jare osapúkai jei: “¡Yembotavɨ ko kuae! ¡Yembotavɨ ko kuae!”

14Ërei sacerdote Joiada oyókuai cien sundaro vae juvicha reta, jei chupe reta:

—¡Penoe kuae güi, jare oñemoïru jae ndive vae, peyuka kɨsepuku pe!

Echa sacerdote oyókuai yepe agüɨye vaerä oyuka reta yandeYa jo pe.

15Jayave jae reta oipɨɨ Atalía jare güɨnoe reta öke kavayu reta jöke, mburuvicha guasu jo re katu oï vae rupi, jare joko pe oyuka.

16Jayave Joiada oyapo morogüɨrökuavee päve opaete vae reta ndive jare mburuvicha guasu ndive, jae reta yogüɨreko vaerä yandeYa imbaeräño.

17Kuae jaɨkue rupi opaete yogüɨraja reta oike Baal itupao guasu pe, jare omboai reta mɨmba oyeyuka oyeapɨ jese vae jare tumpa-raanga reta iä. Jare oyuka reta Matán, Baal isacerdote mɨmba oyeyuka oyeapɨ jese vae reta jóvai.

18Javoi Joiada oñono oyangareko tupao guasu re vaerä vae reta, sacerdote reta jare levita reta iporookuai igüɨ pe, David oñono reta rami tupao guasu pe oyeokuai vaerä, omee vaerä yandeYa pe mɨmba oyeyukagüe opaetei oyeapɨ vae, Moisés omee mborookuai vae pe oyekuatía oï rami, jare otairari reta vaerä oyerovia reve David oyókuai reta rami.

19Oñono vi yandeYa itupao guasu jöke järoa reta, agüɨye vaerä kia oike Tumpa jóvai ikɨa oï reve.

20Jaɨkue rupi oenɨi sundaro ruvicha reta, mburuvicha reta, tëta ruvicha reta jare opaete vae, güɨraja reta vaerä mburuvicha guasu tupao guasu güi; oike reta ma öke guasu rupi mburuvicha guasu jo iporookuaía pe yave, omboguapɨ reta mburuvicha guasu iguapɨa pe,

21jare oyerovia opaete vae jókuae ɨvɨ pegua. Jare tëta guasu Jerusalén pe yogüɨreko pɨagüive oyuka reta güire Atalía kɨsepuku pe.