1Kuae reta jae vi ko ñee reta arakuaa pegua Salomón jei vae, Ezequías mburuvicha guasu, Judá pegua imborɨa reta omboasa kuatía ïru tupapire pe vae:
2Tumpa iyemboetea jae ko mbae yaikuaambae vae,
ërei mburuvicha guasu iyemboetea jae ko oyemboe vaerä jese.
3Ara ɨvate yae vae,
ɨvɨ iyɨvɨte,
jare mburuvicha guasu reta iyemongeta,
jae ko mbaetɨ yandepuere yaikuaa vae.
4Eikɨa yoe korepoti,
jare korepoti imondɨkuía oyapota jókuae güi mbae ipöra vae;
5embosɨrɨ mburuvicha guasu güi iyoa vae,
jayave jupi vae rupi oñemomɨ̈rata mborookuaía.
6Agüɨye eyembotuicha mburuvicha guasu jóvai,
agüɨye eike güɨraveño mburuvicha jóvai;
7oparea ndeve vae ko ikavi yae,
reñemomichiuka jókuae mburuvicha jóvai vae güi.
8Agüɨye eñeapo voi voi,
agüɨye vaerä reñemomaraiuka
nderapicha ndembojopa ma yave.
9Peñomomiari räri oyoupii jókuae teko re,
jare agüɨye nemiari jókuae teko re ambuae vae pe;
10echa jókuae nemiari chupe vae, ngaraa ma ndemboete,
jare ngaraa ye ma nerërakua kavi.
11Ñee kavi, iara pe kavi yae vae,
manzana ia iä oro pegua, korepoti pe oñemopöra vae rami ko.
12Moäka-vera ani mboɨ oro yepeai vae rami ko,
oyemboeta yave, yarakuaa vae iñeereendu katu vae pe.
13Iroɨ ikavi yae araku iara pe,
jökorai ko, ñee jerajaa jupi vae jókuae imondoa pe,
omboyerovia yae ko iya.
14Amapɨtu ɨvɨtu reve vae okɨä,
jökorai ko kuimbae, oyemboete reve güɨrökuavee mbae omee vaerä vae,
ërei mbaetɨi omee.
15Mbɨaguasu omoröɨsa mburuvicha iyarasɨ; ñee yeaeä omoröɨsa arasɨ.
16Ei reväe chupe yave, agüɨye jeta ete jeu,
agüɨye vaerä jeta ete reu yave nemogüëe.
17Agüɨye eapeko nerëta-ɨpɨ pegua reta, agüɨye vaerä rembogüérai yave nemotareɨ.
18Martillo, kɨse jare uvɨ jakuaroviasɨ vae,
¡jökorai ko apu reve omboeko japicha vae!
19Oporombotavɨ vae re yarovia katu mbɨatɨtɨ pe ñaï yave,
yandepɨ opuru reve yaguata vae rami ko,
ani ramo ñaneräi ñañopu yakaru yave vae rami ko.
20Ipɨatɨtɨ vae pe yatairari vae,
yukɨ ñañono iperea re rami ko,
ani ramo iroɨ pe yamboi jemimonde chugüi rami ko.
21Nemotareɨ vae yɨmbɨaɨ yave, emee tokaru;
jare iɨuve yave, emee toɨu;
22echa jökorai yave, jova pɨ̈tata ko remomarai güi,
jare yandeYa omboekoviata ndeve.
23Ɨvɨtuguasu kotɨgua ɨvɨtu omaeñoä okɨ;
jökorai ko indaye pota vae re, jova arasɨ omae vae.
24O ipɨmii vae pe yaiko vae ikaviño,
o ipɨguasu vae pe kuña iñe rarose vae ndive yaiko vae güi.
25Ɨ iröɨsa kavi vae, ikavi yae iɨuve yae vae pe rami ko,
mombɨrɨ güi mbae jërakua kavi vae.
26Ɨ juúmbai jare ɨ jesaɨ oikomegua rami,
jökorai ko jupi vae oa yave jupimbae reta ipo pe.
27Ei jeta ete yau vaerä mbaetɨ ko ikavi,
jare yande aeño yayemboete vae, yemboeteä ko.
28Tëta guasu opa oyemboai vae, mbaetɨ ikësea vae rami ko,
kuimbae mbaetɨ oyembopɨaguasu vae.
Who We AreWhat We EelieveWhat We Do
2025 by iamachristian.org,Inc All rights reserved.
