1 MACABEOS 12 - Guarani Bible with DC

Israel oñemoiruye Roma jare Esparta ndive

1Jonatán oecha yave teko iröɨsa ma, oiparavo mbovɨ kuimbae reta jare omondo Roma kotɨ omoañete jare ombopɨau vaerä yemongeta ñomoïru pegua.

2Jökoraiño vi omondo tupapire Esparta kotɨ jare ïru tëta reta rupi.

3Ñee jeroataa reta yogüɨraja Roma kotɨ, jare oike yemboatɨa renda pe yave, jei reta: “Sacerdote juvicha Jonatán, jare judío reta jëta guasu, orembou yambopɨau ye vaerä ñaneñomoïru jare yemongeta tenonde ma yamboyoupíe vae.”

4Romaɨgua reta omee chupe reta tupapire mburuvicha jokoropigua reta peguarä, pɨpe oyókuai agüɨye vaerä ma omoambeko ñee jeroataa reta ojo regua oväe Judea pe.

5Kuae jae jókuae tupapire iñeïru Jonatán oikuatía Esparta pegua reta pe vae:

6“Sacerdote juvicha Jonatán, tëtaɨgua arakuaa iya reta, sacerdote reta jare opaete tëta judío, omondo tamaraeme jëtara Espartaɨgua reta pegua.

7Metei ara mburuvicha guasu Ario, Esparta pegua, omondo ma tupapire sacerdote juvicha Onías pe, añetete oreapo vaerä perëtararä, kuae tupapire ikuatiaapo oime oï kutɨ katu.

8Onías omboasa ipɨakatu reve kuae jerajaa jare ipöra yae chupe jókuae tembikuatía pe yemongeta oï ñomoïru pegua vae.

9Yepe tei oreve mbaetɨ oata kuae kuae reta, echa ko royeko ñee rɨru ikɨambae vae rogüɨnoi vae re,

10roe romondo vaerä pekotɨ ñee jeroataa reta ombopɨau vaerä ñaneñemoïru jare ñañoëtara yaiko vae, agüɨye vaerä yasɨrɨ oyougüi, echa ɨma yae ma oasa pembaekuatía güive oreve.

11Ore jekuae avei oremaendúa pekotɨ arete rogüɨnoi ñavo jare ïru ara reta rupi, rogüɨrökuavee yave mbaeyuka, jare oreyerure rupi echa jupi ko yayapo vaerä kuae ñanerëtara reta re.

12Oremboyerovia perërakua kavi vae.

13Ore rupi, jeta yae ou yemboavai jare ñoraro reta, oreɨ́vɨri rupigua mburuvicha guasu reta iyapɨä okua oreré.

14Ore mbaetɨ orekɨ̈reɨ pomoambeko, pe yepe jare ïru ñaneïru reta kuae ñoraro reta rupi,

15echa ore oremborɨ Imbaepuere vae, jare Tumpa orereepɨ orerovaicho reta güi jare jae opa omoamɨri reta.

16Roiparavo Numenio, Antíoco taɨ jare Antípatro, Jasón taɨ, jare romondo Roma kotɨ rombopɨau vaerä ñomoïru jare kɨ̈reɨ ngatu päve tenonde yave ma royapo Romaɨgua reta ndive vae.

17Royókuai reta vi yogüɨraja vaerä Esparta kotɨ, omee tamaraeme peve jare kuae tupapire, jupi orekɨ̈reɨ yambopɨau ñaneñomoïru.

18Orepɨakatuta ropɨta pemboyevɨ yave orekotɨ peyemongeta jesegua.”

19Kuae tupapire jae ko Onías pe roikuatía vae iñeïru:

20“Ario, mburuvicha guasu Esparta pegua, omondo tamaraeme sacerdote juvicha Onías pe.

21Tupapire aväe chupe vae rupi aecha Espartaɨgua reta jare judío reta, opaete Abraham iñemuña reta, metei tëtara ko yaiko vae.

22Añave oikuaa ma kuae regua ramo, orepɨakatu yaeta pembaekuatía oreve yave jare peikuaauka yave oreve kërai ko peï vae.

23Che jae peve che mbaekuatía rupi: Perɨmba jare pembaembae reta orembae ko, jaeramiño vi orembae reta pembae vi ko, jáeramo, aporookuai omoërakua vaerä peve reta kuae ñee.”

Jonatán iñoraro pɨau reta

24Jonatán pe jërakua Demetrio isundaro ruvicha reta oime ko yogüeru okua vaerä jaese metei ejército tuicha ete yé tenondegua güi vae ndive.

25Jonatán oë Jerusalén güi oñoövaiti vaerä jae reta ndive Hamat iɨvɨ pe, mbaetɨ omaeño opɨ̈ro reta Judá iɨvɨ pe.

26Omondo omae vɨari vaerä reta jeyupa kotɨ, jare opa ye oyerova yave jei chupe oï kavi ma ko ñogüɨnoi jae reta okua vaerä pɨ̈tu yave.

27Kuaraɨ oike rupive, Jonatán omee ñee isundaro reta pe jesaena vaerä ñogüɨnoi jókuae pɨ̈tu jare ipo ñavo rupi güɨnoi vaerä jembiporu, oïndaivita ñogüɨnoi reta ñoraro pegua. Opaetei teyupa iyɨ́vɨri oñono järoa retarä.

28Tovaicho reta oikuaa yave Jonatán isundaro reta oï kavi yae ma ñogüɨnoi ñoraro pegua, okɨɨye reta; okɨɨye rai jeko pegua omoendɨ reta tata jeyupa rupi jare opa otekuarai joko güi.

29Jonatán jare isundaro reta pe oimeñoecha jovaicho reta ñogüɨnoi oecha reta ramo tata jendɨ oï, pɨareve pe ramo oikuaa jovaicho reta opa ko ojo joko güi vae.

30Jayave Jonatán oaɨkuemoña reta tëi, ërei mbaetɨ oupitɨ echa oasa reta ma yepe ɨ̈aka Eléutero.

31Jonatán joko güi oporepeña árabe iñemuña zabadeo jee vae reta kotɨ, opa omoamɨri yave opɨ̈ro chugüi reta imbaembae reta.

32Joko güi oupi jeyupa, ojo oväe Damasco pe, jare oguata opaete jókuae ɨvɨ rupi.

33Simón, jae nunga vi, oyapo ataguasu Ascalón kotɨ jare ñepɨ̈roa jokoropigua reta rupi. Joko güi ojo Jope kotɨ jare oike joko pe,

34echa oendu jokuaeɨgua reta ikɨ̈reɨ omboasa ñepɨ̈roa Demetrio iñeïru reta ipo pe. Joko pe oñono sundaro reta järoarä.

35Jonatán oyerova ye yave, oenɨi arakuaa iya jokuaeɨgua reta oyomboatɨ vaerä jae reta ndive, jae reta ndive oyemongeta omopüa vaerä ñepɨ̈roa Judea pe.

36Omboɨvate katu vaerä oguambɨ Jerusalén pegua jare oñono vaerä metei oguambɨ guasu tëta jare tëta mí ipäu pe omboyao vaerä kuae tëta reta, jare jökorai opɨta vaerä tëta mí ïkotɨa, agüɨye vaerä joko pe ñogüɨnoi vae sundaro reta omaemee ani ombaegua yepe.

37Yatɨ reta mbaravɨkɨ re omopüa ye pɨau vaerä. Kuaraɨ oëa kotɨgua oguambɨ guasu, jae ko ɨ̈aka kotɨ oï vae, osururu ma yepe mbovɨ. Oyapo katu reta vi Cafenata kotɨ oï vae.

38Simón ombopɨau ye jare omotïi ye vi Hadid, ñuu güi ɨ́vɨkotɨ opɨta vae, opa omojöke jare omotïi kavi oñono.

Trifón oyeapa Jonatán re

39Trifón ikɨ̈reɨ oiko mburuvicha guasurä Asia pe, jae oyemongeta oyuka vaerä Antíoco jare jae oguapɨ vaerä mburuvicha guasurä.

40Ërei, oipoɨu Jonatán ñäteɨ vaerä chupe jare oñoraro vaerä jae ndive. Joko güi, jae omboɨpɨ oyemongeta kërai oyuka vaerä Jonatán. Jayave omboɨpɨ oguata Bet-seán kotɨ.

41Jonatán oë japerä pe cuarenta mil sundaro oyeparavogüe ndive jare ipoki oñoraro vae reta, jare ojo vi jae Bet-seán kotɨ.

42Trifón oendu yave Jonatán ou ejército tuicha yae vae ndive, okɨɨye opoko jese.

43Jáeramo, oövaiti omboete reve, oikuaauka ivɨaka ïru reta pe, omee chupe mbota jare oyókuai ivɨaka jare isundaro reta oyapo vaerä iporookuai.

44Jayave jei Jonatán pe: “¿Maera pa remoambeko tëtaɨgua reta, yande mbaetɨ ñoraro pe yaiko reve?

45Emaeño tojo reta jëta rupi; eiparavo mbovɨ nemoïru vaerä jare eyu che ndive Tolemaida kotɨ. Che ameeta ndeve jókuae tëta jare iñepɨ̈roa reta, jaeramiño vi ïru sundaro reta juvicha reve reve, jaema joko güi ayerova yeta echa jaerä etei ko ayu.”

46Jonatán güɨrovia, jare oyapo Trifón jei chupe rami: Omboyupavo isundaro reta, jare opa ye yogüeru reta Judea kotɨ.

47Jaeño ma omoembɨre tres mil kuimbae reta, kuae reta güi oeya dos mil Galilea pe, jare mil ndive jae ojo.

48Ërei oike ramo ete Jonatán Tolemaida pe yave, jokuaeɨgua reta oyokenda jöke, oipɨɨ reta jare opa oikutu kɨse pe iguataïru.

49Joko güi Trifón omondo ejército ɨvɨ rupigua jare kavayu regua reta Galilea pe, ñuu oïa kotɨ, oyuka vaerä opaetei Jonatán ikuimbae reta.

50Ërei kuae reta, ipɨa oikuaa yave Jonatán oime ko oyepɨɨuka jare omano japicha reta rami, oñomoäta ngatu jae omboɨpɨ oguata oñesɨro reve, oïndaivi ñoraro pegua.

51Tovaicho oporoaɨkuemoña vae reta oecha yave judío reta oïndaivi yogüeru oñoraro vaerä omano regua, opa ye oyerova.

52Jökorai, opaete judío reta yogüeru oväe Judea pe mbaetɨ reve mbae oasa chupe, joko pe, okɨɨye reve oäpiro reta Jonatán jare iguataïru reta. Opaete Israel pe oyeecha mbɨatɨtɨ tuicha yae vae jókuae ara.

53Joko güive itumpa ambuae vae reta oporopïaro yogüɨreko vae, oeka kërai oyuka vaerä judío reta, echa jei reta: “¡Mbaetɨ ma juvicha oepɨ reta vaerä! ¡Añave yakua jese reta jare agüɨye yé kia timaendúa jese reta!”