ECLESIÁSTICO 37 - Guarani Bible with DC

Ñochëi reta jare oporomboarakuaa vae reta

1Opaete ñochëi reta jei: “Che jae ko nechëi”,

ërei oime ñochëi reta jeegüeño vae.

2¡Täta jasɨkatu

metei ñochëi ete vae oyeapo tovaichorä yave!

3Teko kavimbae, ¿maera pa reyeapo?

¡Reyeapo, ɨvɨ remotɨnɨe vaerä apu reta pe!

4Ñochëi ikavimbae mesa reño ko omae,

ërei mbae oata oï ndeve yave, matɨñota ko oï.

5Ñochëi kavi oñorarota ko nderovaicho ndive

jare ndereepɨta kia opoko nderé vae reta güi.

6Agüɨye neakañɨ neïru güi ñoraro yave,

jare agüɨye eeya remonoo repɨ̈rogüe yave.

7Opaete oporomboarakuaa vae reta oechauka tape,

ërei amogüe oporomboarakuaa iyeupeguarä aeño.

8Eyeandu oporomboarakuaa vae güi;

tenonde eparandu chupe mbae ra ko oipota vae.

Echa jae iyeí ko oyemongeta

jare kërai mbae güɨnoe vaerä jókuae teko güi.

9Jayave jeita ndeve: “Jaekavi yae reo”,

joko güi oñemoatata ojo omae oï nderé kërai reñererokomegua rei vae.

10Agüɨye eiporu arakuaa nderovaicho pe,

jare agüɨye ndeyemongeta emombeu kia nemotareɨ vae reta pe.

11Agüɨye metei kuña pe eiporu yemboarakuaa nderovaicho regua;

ani ramo kia mbae ñoraro pe oñepɨ̈rogüe, oeka vae pe;

ani ramo metei omaemee vae pe, ogua vaerä re;

ani ramo metei ombaegua vae pe, mbae oñemee vae regua;

ani ramo metei jeko kavimbae pe, mbɨakavi regua;

ani ramo metei ipɨapïrimbae pe, mboroaɨu regua;

ani ramo iyakɨ vae pe, mbaravɨkɨ regua;

ani ramo kia omaeäro vae pe, mbaarivo regua.

12Eiporu yemboarakuaa kia Tumpa omboeteñoi oiko vae pe,

reikuaa mborookuai oyapo oiko vae pe

jare nde ndeyemongeta rami oiko vae pe,

jayave ko, regüɨapi yave, oiporarata vi ndépɨri.

13Kia ndemboarakuaa ndeyemongeta ae re vae eyeapɨsaka,

echa mbaetɨ yé ma chugüi má rerovia katu vae.

14Kuimbae iyemongeta rupiño ko ou mbae má oikuaa vaerä

jókuae chiu ɨvate oporoäro ñogüɨnoi vae reta güi.

15Jare opaete jókuae reta güi, eiporu Tumpa pe

nderereko avei vaerä añetegüe rupi.

Arakuaa añetegüe

16Ndei oipotagüe mbae reyapo mbove, emae kavi räri jese;

opaete mbae ndei oyeapo mbove, eyemongeta jese.

17Kɨ̈reɨ ko jae opaete mbae yaiparavo vae iyɨpɨ.

Joko güi ko oë irundɨ jäka reta:

18Ikavi vae jare pɨ̈chɨi vae, tekove jare mano,

jare opaete ko oï ñanekü jeigüe vae rupi.

19Oime amogüe reta iyarakuaa katu ïru vae reta pe vae,

ërei iyeupegua aeño iyarakuaa etei reta;

20jare oime vi iyarakuaa vae iñee reño kia güɨröɨro vae,

jae ko pea arete pe opareambae chupe reta vae.

22Oime amogüe reta iyarakuaa katu iyeupe vae;

iyemongeta iyeupegua michi aeño ko;

23jare oime ïru vae reta iyarakuaa katu tëta reta pegua vae,

jare iyemongeta rupi oiko ïru vae reta re.

24Kia ñavo iyeupegua aeño iyarakuaa vae, ovɨakatuta ko oiko;

opaete kia oecha vae reta, omboyeroviata.

25-26Kia ñavo tëta peguarä iyarakuaa vae, omboeteta ko vae;

jee jërakua vae oikota ko oiko.

Kuimbae mbaetɨ ko oikopuku;

ërei Israel ko güɨnoi tekove iyapɨ mbae vae.

Ñemokïrii

27Cheraɨ michi, eechauka ndekaru rupi ndeyé ae ko reiko vae,

jare embosɨrɨ mbae pɨ̈chɨi ndeve vae,

28echa opaeteä ko mbae ikavi opaete pe,

jare opaeteä ko tembíu ikavi opaete vae pe.

29Agüɨye eyeaporai opaete mbae má reipota vae re,

jare agüɨye eñeñono opa reu vaerä opaete jee ngatu vae.

30Echa jeta ko tembíu jee ngatu vae reta rupi oï mbaerasɨ,

jare mbae jeta yau vae oporombopɨavaete ko.

31Oyeopia mbae rupi, jeta ko omano vae;

ërei oyangareko iyé vae oikopukuta ko.