1Tumpa iEspíritu ou Azarías, Obed taɨ re
2jare oë oövaiti Asa, jei chupe: “¡Peyeapɨsaka cheré Asa, Judá jare Benjamín pegua reta! YandeYa oïta pe reta ndive pe reta peï yave jae ndive. Pe reta peeka yave peväeta chupe, ërei peeya yave jae pereeyata vi.
3Ɨma Israel iñemuña reta yogüɨreko tumpa añetembae ndive, isacerdotembae omboe vaerä jare mborookuaimbae.
4Ërei tembiporara pɨte pe oyepoepɨ reta jare oeka reta yave yandeYa Israel iTumpa, jae oñeväeuka chupe reta.
5Jókuae ara rupi mbaetɨ mbɨakatu, okɨɨye yae opaete vae ɨvɨ pegua reta.
6Metei tëta omokañɨtei ïru ɨvɨ pegua tëta, jare tëta guasu ïru tëta guasu, echa Tumpa oiporarauka chupe reta oipotagüe mbaesusere rupi.
7Ërei pe reta peñemoäta ngatu, agüɨye peyembopɨtu, echa perembiapo reta oimeta jekovia peve.”
8Asa oendu ñee reta maratuta vae re ñeemombeúa Azarías, Obed taɨ güi yave, oñemoäta ngatu jare omboai tumpa-raanga reta ikavimbae yae vae Judá jare Benjamín iɨvɨ güi, jare tëta guasu reta opɨ̈ro Efraín iɨvɨtɨ re vae güi, jare oñono kavi yandeYa imbae mɨmba oyeyuka oyeapɨ jese vae, tupao guasu jöke pe oï vae.
9Kuae jaɨkue rupi omboatɨ opaete Judá jare Benjamín pegua reta jare ketɨ güi yogüeru yogüɨreko jae reta ndive vae, jae ko: Efraín, Manasés jare Simeón iñemuña pegua reta, echa jeta ɨvɨ Israel pegua reta oasa Asa oïa kotɨ, echa oecha reta yandeYa Tumpa oï jae ndive.
10Oyemboatɨ reta Jerusalén pe, mboapɨ yasɨa pe quince año ma Asa oiko mburuvicha guasurä yave.
11Jare jókuae ara voi omee reta mɨmba oyeyukagüe yandeYa pe jovaicho reta güi opɨ̈rogüe, seteciento toro jare siete mil vecha.
12Jayave oñererökuavee reta oeka vaerä iñemuñagüe reta iYa Tumpa opaete ipɨa ndive jare jekove ndive.
13Jare kia nunga vae mbaetɨ oeka yandeYa Israel iTumpa vae yave omano vaerä, okuakuaa vae ani michia, kuimbae ani kuña.
14Jare osapúkai reve jei reta Tumpa jee re yandeYa pe, mimbɨguasu jare vecha kuimbae-räti omoñee reta reve.
15Jare opaete Judá pegua reta oyerovia kuae jei reta Tumpa jee re vae re, echa opaete ipɨa reve oeka reta yandeYa, jare jae oñeväeka chupe reta, jare yandeYa omee chupe reta mbɨakatu opaete iyɨ́vɨri rupi yogüɨreko vae reta ndive.
16Jaeramiño vi mburuvicha guasu Asa opɨ̈ro iyarɨ Maaca güi tenondeguarä oiko vae, echa jae oyapouka tumpa-raanga Asera iä. Jare Asa omboai jókuae jare opa oyoka oapɨ ɨ̈aka Cedrón jembeɨ pe.
17Kuae oyeapo reve Israel pegua reta mbaetɨ omokañɨ mbaemboete renda ɨvɨtɨ rupigua tumpa-raanga pe vae, ërei Asa oiko avei jupi rupi.
18Jare güeru tupao guasu pe tu jare jae oñono tee Tumpa peguarä vae korepoti, oro jare tembiporu reta.
19Jare mbaetɨ ye oiko ñeraro treinta y cinco año rupi Asa oiko ramboeve mburuvicha guasurä.
Who We AreWhat We EelieveWhat We Do
2025 by iamachristian.org,Inc All rights reserved.
