JOB 37 - Guarani Bible with DC

1Jáeramo chepɨa orɨrɨi,

jare oïa jenda pe.

2Peyeapɨsaka Tumpa iñee jɨapu vae re,

jɨapu oë iyuru güi vae.

3Jae omokana opaete ara,

jare iama-vera oesape opaete ɨvɨ iyapɨ rupi.

4Kuae jaɨkue rupi oyeendu jɨapu,

jɨapu täta yae,

oyeendu ma yave jɨapu, jae omokïrii.

5Tumpa iñee jɨapu vae rupi oporomopɨakañɨ yae,

oyapo mbae tuicha vae, mbaetɨ yandepuere yaikuaa.

6Echa iroɨ pe jei: “Egüeyɨ ɨvɨ pe”,

jaeramiño vi ama ɨvɨtuai ndive vae pe.

7Jökorai kuimbae reta omombɨta jo rupi,

oikuaauka vaerä jae ko oyapo vae.

8Mɨmba reta oike oñemi,

jare joko pe ñogüɨnoi.

9Arayevɨ kotɨ güi ou kusumirou,

jare iroɨ ou ɨvɨtuguasu kotɨ güi.

10Tumpa oipeyu ɨvɨtu pe jare opa oñemotäta

ɨ reta opa vi oñemotäta.

11Jae omotɨnɨe amapɨtu ɨ pe

jare iama-vera pe omoai ɨ̈vɨti.

12Ama-vera oyekuaa ojo oipota rupi ara re,

jökorai oyapo Tumpa oyókuai rami,

opaete ɨvɨ iárambo rupi.

13Opaete kuae reta rupi Tumpa oiporarauka ɨvɨ pe,

ani oechauka vaerä ipɨakavi.

14Ndepɨaguasuño Job, jare eyeapɨsaka,

jare eyemongeta Tumpa iparavɨkɨ ñanemopɨakañɨ vae re.

15¿Reikuaa pa kërai Tumpa oñono kuae reta,

jare kërai jembipe ama-vera amapɨtu re?

16¿Reikuaa pa nde kërai amapɨtu ovevɨi ɨvɨtu re,

oporomopɨakañɨ yae arakuaa pe vae?

17¿Maera pa nderemimonde jaku,

ara kïrii ngatu yave,

arayevɨ jeko pegua?

18¿Reipɨso pa jae ndive ara,

jare reeya metei jiero iyu vae oyemboipe kavi rami?

19Oremboe mbae roe vaerä Tumpa pe,

echa mbaetɨ orepuere mbae roe mbaetɨ roikuaa jeko pegua.

20Che mbaetɨ eteita chepuere jae chupe chemiari vaerä jae ndive,

echa jökorai yave jae ko aipota chemokañɨtei rami.

21Mbaetɨ yandepuere yaecha kuaraɨ oesape vae,

amapɨtu oyasoi oï yave;

ërei ɨvɨtu oipeyu yave ara oyepea.

22Ɨvɨtuguasu kotɨ güi oyekuaa ou jembipe iyu vae,

Tumpa oñeovauka tembipe yavaetegüe pe.

23Imbaepuere yae ete vae regua mbaetɨ yandepuere opa yaikuaa,

jae ko tuicha imbaepuere pe vae jare jupi vae;

jae mbaetɨ oporogüɨrekoasɨ katu.

24Jáeramo kuimbae reta oipoɨu chugüi,

chupegua mbaeä etei yarakuaa katu oyeapo vae reta.