JOSUÉ 10 - Guarani Bible with DC

Amorreo reta ñamɨri

1Adonisedec, mburuvicha guasu Jerusalén pegua oendu yave Josué opa opɨ̈ro Hai, jare omboai vae (tenonde yave oyapo Jericó pe jare juvicha guasu pe rami, jökorai oyapo Hai jare juvicha guasu pe), jare Gabaón pegua reta oyapo ñemoïru Israel iñemuña reta ndive vae, jare ñogüɨnoi jae reta ipɨte pe vae,

2ou okɨɨye yae; echa Gabaón tëta guasu mburuvicha jëta nunga ko, jërakua yae jare tuicha yae tëta Hai güi, jare joko pegua reta jëia yae vae ko.

3Kuae jeko pegua Adonisedec, mburuvicha guasu Jerusalén pegua omondo ñee Hoham mburuvicha guasu Hebrón pegua pe, Piream mburuvicha guasu Jarmut pegua pe, Jafía mburuvicha guasu Laquis pegua pe jare Debir mburuvicha guasu Eglón pegua pe, jei:

4“Peyu chemborɨ ñañeraro Gabaón pegua reta ndive, echa oyapo ñemoïru Josué ndive jare Israel iñemuña reta ndive.”

5Jayave jókuae pandepo mburuvicha guasu, amorreo reta juvicha guasu reta: Jerusalén pegua, Hebrón pegua, Jarmut pegua, Laquis pegua jare Eglón pegua oyomboatɨ, jare yogüɨraja opaete isundaro reta ndive jare oyembojeyupa köiño Gabaón güi oñeraro reta vaerä joko pegua reta ndive.

6Jayave Gabaón pegua reta güɨrajauka ñee Josué pe, Gilgal pe teyupa pe: “Agüɨye eñemoäteɨ oremborɨ vaerä. Eyu jarembae pegua oremborɨ jare orereepɨ, echa opaete amorreo reta juvicha guasu reta ɨvɨtɨ re yogüɨreko vae reta oñomoïru oñeraro vaerä ore ndive.”

7Jayave Josué oë Gilgal güi opaete kuimbae ñeraro regua reta ndive,

8jare yandeYa jei Josué pe: “Agüɨye ekɨɨye chugüi reta, echa che amee ndepo pe, metei ave chugüi reta ngaraa ipuere oñeraro nde ndive.”

9Josué oë Gilgal güi jare ojo pɨ̈tu reve oïraro iparanoe amorreo reta.

10Jare yandeYa omongɨɨye yae Israel iñemuña reta güi, jökorai jeta yae oparapiti reta Gabaón pe, jare oporoaɨkuemoña reta Bet-horón kotɨ tape ojo vae rupi, jokoropi jekuae oyuka reta amorreo reta ojoi regua oväe Azeca jare Maceda pe.

11Jare otekuarai yogüɨraja ramboeve Israel iñemuña reta güi, Bet-horón güi yagüeyɨa pe, yandeYa oitɨ jese reta amandau tuichagüe jare oyuka jeta amorreo reta Israel iñemuña reta oyuka vae güi.

12Jókuae ara, yandeYa omee amorreo reta Israel iñemuña reta ipo pe yave, Josué jei yandeYa pe opaete Israel iñemuña reta jovake:

“Kuaraɨ, epɨta Gabaón pe;

yasɨ, epɨta ɨvɨtɨ päu Ajalón pe.”

13Jare kuaraɨ jare yasɨ opɨta,

Israel iñemuña reta omoamɨri regua jovaicho reta.

Körai oyekuatía oï Jaser jembikuatía pe.2 S 1.18. Kuaraɨ opɨta ara mbɨte pe, metei ara seri mbaetɨ osɨrɨ jenda güi.

14Jare mbaetɨ ye jókuae rami tenonde yave ani taɨkue rupi, yandeYa oendu metei kuimbae iñee vae, echa yandeYa oñeraro Israel iñemuña reta jekovia pe.

15Jaɨkue rupi Josué jare opaete Israel iñemuña reta oyerova ye teyupa kotɨ Gilgal pe,

16jare jókuae pandepo mburuvicha guasu otekuarai jare oñemi reta metei ɨvɨkua pe, Maceda pe.

17Ërei taɨkue rupi opa oñeväe jókuae mburuvicha guasu reta ɨvɨkua pe oñemi ñogüɨnoia pe, jare omombeu reta Josué pe.

18Jayave Josué jei: “Pemboyapayere ita tuicha vae reta jókuae ɨvɨkua jöke re, peyokenda jare peñono jöke iyangarekoarä.

19Jare pe reta agüɨye pepɨta joko pe, peaɨkuemoña perovaicho reta, peyuka taɨkue yogüɨraja vae reta. Agüɨye pemaeño toike reta jëta guasu reta pe, echa yandeYa Tumpa omee pepo pe.”

20Josué, Israel iñemuña reta ndive opa omoamɨri amorreo reta, oparapiti jeta yeyé; amorreo reta jembɨregüe oñepɨ̈ro jëta guasu reta oñekëse kavía rupi.

21Ërei Israel iñemuña reta mbaetɨ maratu, oyerova reta ye teyupa kotɨ Maceda pe, Josué oïa pe. Jare mbaetɨ ye kia iñeenguru Israel iñemuña reta kotɨ.

22Jayave Josué jei: “Peipea ɨvɨkua jöke jare penoe jókuae pandepo mburuvicha guasu.”

23Jare Israel iñemuña reta oyapo jökorai, güɨnoe reta ɨvɨkua güi jókuae pandepo mburuvicha guasu: Jerusalén pegua, Hebrón pegua, Jarmut pegua, Laquis pegua jare Eglón pegua.

24Jare güeru reta Josué pe yave, jae oenɨi opaete Israel iñemuña reta, jare jei mburuvicha ñeraro regua reta jae ndive yogüeru vae reta pe: “Peyu kuae kotɨ jare peñono pepɨ kuae mburuvicha guasu reta iyaseo re.” Jare jókuae mburuvicha reta jökorai oyapo.

25Jayave Josué jei chupe reta: “Agüɨye pekɨɨye, agüɨye vi peyembopɨtu; peñemomɨ̈rata, peñemoäta ngatu, echa körai eteita vi yandeYa oyapo opaete perovaicho reta.”

26Jaɨkue rupi Josué oyuka jókuae mburuvicha guasu reta, jare ombosagüɨuuka metei ñavo ɨvɨra re, joko pe oeya reta kaaruasɨ regua.

27Jare kuaraɨ oiketa ma ojo yave Josué ombogüeyɨuka ɨvɨra güi jare oñonouka ɨvɨkua pe, jókuae jae reta oñemía pe. Jaɨkue rupi oñono reta ita tuicha vae reta jókuae ɨvɨkua jöke re, jökorai oimeño añave rupi joko pe.

28Jökorai jókuae ara Josué opɨ̈ro Maceda, jare opaetei omboai, oyuka kɨsepuku pe opaete joko pe yogüɨreko vae, oeyambae reve metei ave. Oyapo mburuvicha guasu Maceda pegua pe, mburuvicha guasu Jericó pegua pe oyapo rami.

29Maceda güi Josué, Israel iñemuña reta ndive yogüɨraja tëta guasu Libna kotɨ, jare oñeraro reta joko pegua reta ndive.

30YandeYa omee Israel iñemuña reta ipo pe, kuae tëta guasu joko pegua mburuvicha guasu ndive, jare oyuka reta kɨsepuku pe opaete joko pe yogüɨreko vae reta, oeyambae reve metei ave, jare oyapo mburuvicha guasu Libna pegua pe, jare Jericó pegua pe oyapo rami.

31Jaɨkue rupi Josué jare Israel iñemuña reta yogüɨraja Libna güi Laquis kotɨ, jare oyembojeyupa köiño tëta guasu güi, jare oñeraro reta joko pegua reta ndive.

32Jare yandeYa omee Israel iñemuña reta ipo pe tëta guasu Laquis, jare opɨ̈ro reta pɨareve pe, oyuka reta kɨsepuku pe opaete joko pe yogüɨreko vae reta jare jɨmba reta, Libna pe oyapo rami.

33Jayave Horam, mburuvicha guasu Gezer pegua oë isundaro reta ndive omborɨ Laquis, ërei Josué omoamɨri Horam opaete isundaro reta ndive, oeyambae reve metei ave.

34Laquis güi Josué, Israel iñemuña reta ndive yogüɨraja Eglón kotɨ jare oyembojeyupa reta köiño tëta guasu güi, jare oñeraro reta joko pegua reta ndive,

35jókuae ara voi opɨ̈ro reta, jare oyuka reta kɨsepuku pe, joko pe yogüɨreko vae reta, Laquis pe oyapo reta rami.

36Javoi Eglón güi Josué, Israel iñemuña reta ndive yogüɨraja HebrónJos 15.13; Jue 1.10. kotɨ, jare oñeraro reta joko pegua reta ndive.

37Opɨ̈ro reta yave, opaetei oyuka reta kɨsepuku pe, mburuvicha guasu ipɨau vae jare opaete jókuae tëta guasu pegua reta jare mɨmba reta joko pe yogüɨreko vae, oeyambae reve metei ave, Eglón pe oyapo reta rami, jökorai omboai reta jókuae tëta guasu opaete joko pe yogüɨreko vae reta ndive.

38Joko güi Josué jare Israel iñemuña reta yogüɨraja oporepeña tëta guasu DebirJos 15.15; Jue 1.11. re, jare oñeraro reta joko pegua reta ndive,

39oyuka reta kɨsepuku pe mburuvicha guasu jare opaete joko pe yogüɨreko vae reta, oeyambae reve metei ave; opaetei oyuka reta Hebrón pe, Libna pe jare juvicha guasu reta pe oyapo rami.

40Jökorai Josué opɨ̈ro opaete ɨvɨ. Omoamɨri mburuvicha guasu reta ɨvɨtɨ guasu reta rupi oñemoëta vae, Neguev pegua reta, ɨvɨpe kavi rupi jëta vae reta, ɨvɨtɨ ikúaJue 1.9. rupi jëta vae reta jare opaete juvicha guasu reta, oeyambae reve metei ave; opaetei oyuka, yandeYa Israel iTumpa oyókuai rami.

41Josué oyuka jovaicho reta, Cades-barnea güive oväe regua Gaza pe, jare opaete ɨvɨ Gosén güive Gabaón kotɨ.

42Opaete kuae mburuvicha guasu reta, jare iɨvɨ reta Josué opɨ̈ro opaete voi, echa yandeYa Israel iTumpa oñeraro Israel iñemuña reta jekovia pe.

43Javoi Josué jare opaete Israel iñemuña reta oyerova ye teyupa kotɨ Gilgal pe.