ESTER 5 - Guarani Bible with DC

Ester oike mburuvicha guasu oïa pe

1Jare mboapɨa ara pe Ester oyemonde kavi, jare oike mburuvicha guasu jo joka japɨpe pe, oyemboɨ mburuvicha guasu öke re katu oguapɨ oïa jóvai.

2Jare mburuvicha guasu oecha Ester oï oka pe yave, ipɨakatu omae jese; javoi mburuvicha guasu güɨropövee ipopoka oro pegua güɨnoi ipo pe vae Ester kotɨ, jayave Ester ou opoko jókuae popoka iyapɨ re.

3Jare mburuvicha guasu oparandu:

—¿Maratu pa reiko Ester? ¿Mbae pa reipota? Reiporu yave cheve mborookuaía mbɨte rupi, toñemee ndeve.

4Jare Ester jei:

—Mburuvicha guasu pe jaekavi yave; pekua Amán ndive tembíu kavi ayapo ndevea pe.

5Jayave mburuvicha guasu jei:

—Aramoete peeka Amán jare toyeapo Ester oipota rami.

Jare mburuvicha guasu ou Amán ndive, Ester tembíu kavi oyapoa pe.

6Okaru jare jou reta ramboeve vino, mburuvicha guasu jei Ester pe:

—¡Eiporu nde reipota vae jare toñemee ndeve reiporu rupi, yepe tëi mbɨte rupi cheporookuaía!

7Jare Ester jei:

—Aipota jare aiporu vae, jae kuae:

8Mburuvicha guasu ipɨakatu ko cheré yave, jare aiporu vae omee cheve chembopɨakatu vaerä yave, pɨareve eyu Amán ndive tembíu kavi ayapoa pe, jare pɨareve tamombeu ndeve, nde mburuvicha guasu reparandu cheve vae.

Amán oyapo kavi ɨvɨra oeterasauka vaerä jese Mardoqueo

9Amán oyerovia yae oë okarúa güi; ërei oecha yave Mardoqueo mburuvicha guasu jöke pe mbaetɨ ave opüa ani omɨi yepe jenda güi, iyarasɨ yae,

10ërei mbaetɨ omboyekuaa, ou jo pe, jare oenɨiuka ivɨa-ïru reta jare jembireko Zeres.

11Jare imiari chupe reta imbaeyekou tuicha yae vae re jare imichia jeta vae re, jare opaete mburuvicha guasu kërai ombotuicha vae re, jare omboeteuka mburuvicha guasu iyɨvɨrigua reta pe jare tembiokuai reta pe vae.

12Jare Amán jei ye:

—Ester mbaetɨi kia oekauka okaru mburuvicha guasu ndive, jaeño che; jare pɨareve peguarä oparea ye oreve.

13Ërei ngatu opaete kuae reta mbaetɨi chembopɨakatu, aecha ñavo Judáɨgua Mardoqueo oguapɨ oï mburuvicha guasu jöke pe.

14Jayave jembireko Zeres jare opaete ivɨa-ïru reta jei chupe:

—Eyatɨkauka ɨvɨra veintidó metro ɨvate vae, jare pɨareve eiporu mburuvicha guasu pe, Mardoqueo toyeeterasa jese, jökorai ndepɨakatuta reo rekaru mburuvicha guasu ndive.

Amán pe ipöra jókuae yemongeta jare oyapouka jei reta chupe rami.