ECLESIÁSTICO 39 - Guarani Bible with DC

1¡Ambuaeyee ete kavi ko

Tumpa ɨvate ete pe oï vae iporookuai re oyemboe vae,

arakae pegua reta iyarakuaa re opoko oparandu

jare oyemoambeko vi ñee reta mbae oikota vae re jeigüe re!

2Eyemboe kuimbae jërakua yae vae reta jeigüe re

jare oeka vi ñee reta má yavai vae reta;

3eeka vi mbae oyekuaambae ñee raanga reta pe vae

jare eväe mbae jei vaerä mbarandu má yavai vae pe.

4Omee yemborɨ kuimbae tuicha vae reta pe

jare oguapɨ mburuvicha reta ndive.

Ojo oguata ketɨgua tëta tuicha vae reta rupi

jare oikuaa kuimbae reta güi ikavigüe jare ikavimbae.

5Oyemoambeko opüa vaerä ndeimboveasɨ

oeka vaerä pea ɨvate ete pe oï vae, Tumpa jae iyapoa;

oyerure jae jóvai

jare oiporu iñɨ̈ro vaerä chupe imbaeyoa re.

6Tumpa imbaepuere yae vae oiparareko yave,

täta ko iyarakuaa,

ñee arakuaa pegua ama okɨ vae rami ko oata iyuru güi

jare omeeta ko mbaemboete Tumpa pe yerure rupi.

7Omeeta ko arakuaa añetegüe jare ikavigüe,

jare opokota oyemboe Tumpa omboyekuaambae reta re.

8Oesape ïru vae reta pe iyemboe rupi jare iporomboe rupi,

jare oyembotuichata opɨta mborookuai rupi Tumpa omee ñemoïru chupe vae re.

9Tätata ko iyarakuaa rupi omboete vae

jare ngaraa ye ma iñakañɨ chugüi vae.

Yemomaendúa jesegua ngaraa ma okañɨ,

jare jee oikota ko oiko opaete vae rupi.

10Tëta guasu reta imiarita iyarakuaa re,

jare oyemboatɨ vae reta oyemongoita chupe mbaemboete rupi.

11Oikoveño oiko ramboeve, má yaeta ma ko jërakua ïru jeta vae reta güi,

jare ojo omano yave, jókuae jaekavi yaeta chupe.

Mbaemboete Tumpa oporoapo vae pe

12Oimeño anoi cheäka pe jeta mbae jae vaerä;

chetɨnɨe aï, yasɨ jovaguasu vae rami.

13Peyeapɨsaka cheré, cheraɨ oporoparareko vae reta, peiko kavita

mbaepotɨ ɨ jembeɨ pe oñeotɨ vae rami,

14omoaita ipiche kavigüe incienso rami

jare ipotɨta tüpa-ɨpɨ rami.

Peräsémbai täta peyemongoi,

pemboete Tumpa opaete mbae oyapo vae rupi.

15Pesapúkai jae jee tuicha ete vae pe,

pemee yasoropai chupe jare pemboete

oipotagüe yemongoi pe jare arpa ipugüe pe,

pesapúkai chupe kuae ñee ndive:

16“Opaete mbae Tumpa oyapogüe ikavi ko;

jae, iara yave ko, omee opaete mbae oata vae reta.”

17Metei ñee peño ko omboatɨ i reta,

jare iñee peño ko oyeapo jɨru retarä.

18Jae oipota vae, jupivei ko oyeapo;

oipota oporomboasayepe yave mbaetɨ ko kia oyopiata.

19Jae oecha ko opaete mbae kuimbae reta oyapogüe;

mbaetɨ etei ko mbae oñemi jesa güi.

20Arakae güive ma jae omae oï,

jare jae iporomboasayepe mbaetɨ ko iyapɨ.

Chupegua mbaetɨ ko mbae michi yae vae ani ramo ichutu vae,

ani ramo tuichagüe yae vae ani ramo yavaigüe vae.

21Agüɨyeta ko yaparandu mbaerä ko kuae ikavi ani ramo pea,

echa opaete vae ko oime jembiapo.

22Mbaeyekou omeegüe oasa yé ko Nilo rami

jare omoäkɨ ɨvɨ Éufrates rami.

23Jökorai vi ko, iyarasɨ yave, opa omoë ɨvɨ güi tëta guasu reta

jare opa jembochɨ oyapo ɨvɨ reta ñäkɨ ngatugüe.

24Jeko kavi vae reta pe omee tape yavaimbae vae,

jare jeko kavimbae vae reta pe, yavaigüe vae.

25Iyɨpɨ güive ko omee mbaeyekou jeko kavi vae reta pe,

jare jeko kavimbae reta pe omee vi mbaeyekou jare mbae ikavimbae.

26Mbaembae reta ikavi yaiko jese vaerä vae jae ko:

Ɨ, tata, jiero, yukɨ,

mbaekúi, neche, ei,

vino, asaite, jare temimonde.

27Opaete kuae mbaembae reta jaekavi jeko kavi vae reta pe,

ërei jeko kavimbae reta pe jaekaviä etei.

28Oime ɨvɨtu Tumpa oyapo oporonupa pɨpe vaerä vae,

iyarasɨ yave ɨvɨtɨ reta omondoro iyɨpɨ reve vae.

Oporonupa vaerä pɨpe yave oyora ko täta rupi,

jare jökorai iyapoa iyarasɨ oasa chugüi.

29Tata, amandau, karuai jare mbaerasɨ reta

jae ko oyeapo mbaeporara pegua aeño vae.

30Mɨmba pochɨ vae reta, tumɨkarape reta, mboi reta

jare ñoraro yepɨ pegua reta omokañɨteita jeko kavimbae reta.

Opaete kuae reta oyeapo ko güɨramoi yave oyeporu vaerä;

Tumpa oime oñovatu güɨnoi tembiporara iara peguarä.

31Jae oenɨi reta yave, oyerovia reve yogüeru

jare oyapo reta iñeengurumbae reve mborookuai oñemee chupe vae.

32Kuae re che ayemboe iyɨpɨ güive chepɨa-kïrii ngatu reve,

aikuaa jare apoko aikuatía.

33Opaete mbae Tumpa oyapogüe ikavigüe ko,

jare jae, iara pe, omee opaete mbae oata vae rupi.

34Mbaetɨ ko yandepuere yae: Kuae ma ete ikaviä pea güi,

echa opaete ko ikavita iara ma yave.

35Peyemongoi vi, opaete pepɨa reve,

jare pembotuicha Tumpa jee ikɨambae vae.