JUECES 10 - Guarani Bible with DC

Tola jare Jair yogüɨreko mburuvicharä

1Abimelec jaɨkue rupi, metei kuimbae Isacar iñemuña pegua Tola jee vae, Fúa taɨ, Dodo jɨmɨmino oñemopüa oepɨ vaerä Israel iñemuña reta. Tola oiko Samir pe ɨvɨtɨ Efraín pegua pe,

2jare veintitré año oiko mburuvicharä Israel pe, omano jare oñotɨ reta Samir pe.

3Jaɨkue rupi oñemopüa Jair Galaad pegua, jare oiko mburuvicharä Israel pe veintidó año.

4Jair güɨnoi treinta taɨ, mburika re opo vae reta, jare güɨnoi treinta tëta guasu; kuae tëta guasu reta jee “Jair jëta guasu reta”. Kuae reta ñogüɨnoi ɨvɨ Galaad pe.

5Jair omano yave oñotɨ reta Camón pe.

Jefté oepɨ Israel iñemuña reta Amón iñemuña reta güi

6Jare Israel iñemuña reta jekuae oyapo ye ikavimbae yandeYa jesa róvai, jare omboete reta Baal jare Astarot, jökoraiño vi tumpa ambuae reta Siria pegua, Sidón pegua, Moab pegua, Amón iñemuña reta itumpa jare filisteo reta itumpa reta pe; jare oeya reta yandeYa, mbaetɨ oyeokuai reta chupe.

7Jáeramo yandeYa iyarasɨ ikotɨ reta jare omee reta filisteo reta ipo pe jare Amón iñemuña reta ipo pe.

8Jayave güive, dieciocho año, filisteo reta jare Amón iñemuña reta oiporarauka yae opaete Israel iñemuña Galaad pe yogüɨreko vae, Jordán jovaicho pe amorreo reta iɨvɨ pe.

9Jare Amón iñemuña reta oasa vi ɨ̈aka Jordán oñoraro vaerä Judá, Benjamín jare Efraín iñemuña reta ndive, jare Israel iñemuña reta ipɨatɨtɨ yae.

10Jayave oyerure reta yandeYa pe omborɨ reta vaerä, jare jei reta: “OreTumpa, oreyoa ndekotɨ, echa rosɨrɨ ndegüi jare rojo romboete jare royeokuai baal reta pe.”

11Jare yandeYa jei Israel iñemuña reta pe: “Pe reta peiporara yae peikose Egiptoɨgua reta ipo pe, amorreo reta ipo pe, Amón iñemuña reta ipo pe, filisteo reta ipo pe,

12Sidón pegua reta ipo pe, Amalec iñemuña reta ipo pe, jare Madián iñemuña reta ipo pe; ërei pe reta peiporu yave cheve, che pogüɨroasayepe.

13Ërei pe reta jekuae chereeya, jare pemboete tumpa ambuae reta, jayave che ngaraa ye ma poepɨ.

14¡Pekua, jare peiporu yemborɨ jókuae tumpa reta peiparavo peyeupe vae pe! ¡Jae reta tapereroasayepe peiporara peï yave!”

15Jayave Israel iñemuña reta jei yandeYa pe: “Oreyoa ko, eyapo oreve nde nderemimbota, ërei, ¡eyapo oreve ikavi vae, orereepɨ añave!”

16Jare Israel iñemuña reta oeya tumpa ambuae reta jare oyerova ye reta omee mbaemboete yandeYa pe; jare yandeYa mbaetɨ ma güɨropɨa Israel iñemuña reta oiporara ñogüɨnoi vae.

17Oyomboatɨ Amón iñemuña reta jare oyembojeyupa Galaad pe. Israel iñemuña reta oyomboatɨ vi jare oyembojeyupa reta Mizpa pe.

18Israel iñemuña reta yogüɨreko Galaad pe vae, jare juvicha reta, jei reta oyoupe, kia oporogüɨraja ñeraroa pe oñoraro vaerä Amón iñemuña reta ndive vae, toiko mburuvicharä.