1Ïru tëta reta oendu yave mɨmba oyeyuka oyeapɨ jese vae oyeapo katu ye jare tupao oñemopüa ye pɨau tenonde oiko rami, jasɨ katu yae chupe
2jare oñererökuavee opavusu vaerä jae reta pɨri yogüɨreko Israel-ɨgua vae reta re, jökorai yave, omboɨpɨ oyuka reta opa vaerä omokañɨtei.
3Jayave Judas ojo oñoraro Esaú iñemuña reta ndive Idumea pe, joko pe opüa Acrabatene re, Israel pegua reta oñekëseuka ñogüɨnoia pe. Joko pe omoamɨri mbatee Idumeo reta opa regua omokañɨtei.
4Jare imaendúa vi Beón pegua reta ipɨapochɨ re, echa jae reta jovayoyavi ñoi jare oyapo ñoi yemboavai echa okätɨrose yepi tape rupi Israel pegua reta re.
5Judas omoingeuka reta iñepɨ̈roa, oikëse jare opa omokañɨtei, echa oapɨ chugüi reta iñepɨ̈roa japɨpe pe ñogüɨnoi reve.
6Joko güi oasa amonita reta iñepɨ̈roa kotɨ, joko pe oñoövaiti metei ejército ipɨ̈rata yae vae ndive, echa juvicharä güeru reta Timoteo.
7Mbovɨ yé oporepeña reta jese, güɨrajai omboyao yao jare omoamɨri,
8opɨ̈ro ma yave Jazer jare ïru tëta raɨ reta, oyerova ye Judea kotɨ.
Ñoraro Galaad jare Galilea pe(2 Mac 12.10-31)9Galaad pegua itumpa ambuae vae reta oñemoïru Israel-ɨgua jókuae tëta pegua reta ndive, opa vaerä opavusu jese. Kuae reta oyemboya ñepɨ̈roa Datema kotɨ,
10jare omondo Judas jare jëtara reta pe kuatía körai: “Itumpa ambuae vae reta oñomoïru opavusu vaerä yanderé,
11oyeapo katu ma ñogüɨnoi oporepeña vaerä ñaneñepɨ̈roka re. Timoteo ou kuae ejército iñäka pe.
12Eyu orereepɨ chugüi reta, echa oregüi jeta yae ma omano vae.
13Opaete orerëtara reta Tobías iɨvɨ rupi ñogüɨnoi vae opa ma oyeyukauka; güɨraja reta jembipɨɨrä jembireko jare imichia reta, jare opɨ̈ro reta chugüi imbaembae. Mil rupita ma kuimbae reta opa omano kuae ɨvɨ pe.”
14Ndei opa omongeta kuae kuatía mbove yogüeru ma oväe Galilea güi ñee imombeúa reta jemimonde osoro reve, jei reta:
15“Tolemaida pegua, Tiro, Sidón jare Galilea pegua itumpa ambuae vae reta, oñomoïru opa vaerä ñanemokañɨtei.”
16Judas jare jëta oendu yave kuae ñee, jetagüe oyomboatɨ reta oyemongeta vaerä mbae ko oyapota oepɨ vaerä jëtara reta tekoavai pe ñogüɨnoi vae kotɨ, echa ko tovaicho güɨroa yae ma güɨnoi reta.
17Judas jei jëtara Simón pe: “Eiparavo mbɨa reta ndepɨapotaa rupi, jare ekua eepɨ ñanerëtara Galilea pegua reta. Che ajata Jonatán ndive Galaad kotɨ.”
18Sundaro jembɨregüe oeya reta Judea pe, oyangareko vaerä jókuae tëta re José ipogüɨ pe, jae ko Zacarías taɨ, jare Azarías, mbɨa imbaepuere yae jókuae tëta pe vae reta.
19Ërei oyókuai reta oeya körai: “Pepo pe opɨta kuae tëta, ërei agüɨye peñoraro itumpa ambuae vae reta ndive ore royerova ye regua.”
20Simón ipo pe omboasa reta tres mil kuimbae reta Galilea re opüa vaerä, jare Judas pe omboasa ocho mil Galaad re opüa vaerä.
21Simón ojo Galilea kotɨ yave, jeta yae oñoraro itumpa ambuae vae reta ndive, omoamɨri
22jare oaɨkuemoña reta güɨraja Tolemaida rape kotɨ. Itumpa ambuae vae reta güi oa Simón ipo pe tres mil rupi, jare jae opɨ̈ro chugüi reta jeyupa ipo.
23Joko güi, oyerovia katu reve opa güɨraja Judea kotɨ judío reta yogüɨrekose Galilea jare Arbata pe vae, jembireko, imichia jare opaete imbaembae reve.
24Jökorai ramboeve, Judas Macabeo jare jëtara Jonatán ndive oasa reta Jordán jare oguata mboapɨ ara ɨvɨpöreɨ rupi.
25Joko pe oñoväe nabateo reta ndive, jae reta oë jape pe ipɨakatu reve jare imiari opaete mbae oasa chupe reta jare jëtara judío Galaad pegua reta pe vae re,
26ërei ngatu jeta katu oñepɨ̈ro reta Bosrá, Bosor, Alema, Caspín, Maqued jare Carnáin rupi, opaete kuae tëta reta oñemotiɨ kavi yae oï.
27Omombeu reta vi oime ko tëta reta Galaad pegua pe Israel-ɨgua reta oñepɨ̈ro ñogüɨnoi, jare jovaicho reta jókuae pɨareve pe opüata ñogüɨnoi jese reta, opavusu vaerä Israel-ɨgua reta re metei ara peño.
28Jayave Judas jare isundaro reta oipoepɨ güɨramoi peguaño jape, jare omboɨpɨ oguata reta ɨvɨpöreɨ guasu rupi Bosra kotɨi. Judas opüa tëta guasu re jare opa oyuka jokuaeɨgua kuimbae reta kɨse pe, omboai jókuae tëta jare oapɨ.
29Pɨ̈tu yave omboɨpɨ reta oguata ñepɨ̈roa Datema pegua kotɨ,
30köe ma yave oecha reta metei ejército tuichagüe vae okua oï jókuae ñepɨ̈roa re: Güɨraja reta mbɨrunga jare vi tembiporu ñoraro pegua okua vaerä pɨpe jese.
31Judas oecha ko ñoraro oyemboɨpɨ ma echa sapúkai ñoraro pegua jare mimbɨ reta iñee mombɨrɨ oyeendu.
32Jayave jei isundaro reta pe: “¡Peñoraro añave perëtara reta re!”
33Omboguatauka reta mboapɨ jɨsɨ okua vaerä jovaicho re jaɨkue kotɨ rupi. Omoñee reta jemimbɨ jare osapúkai reve oiporu reta yemborɨ Tumpa pe.
34Timoteo jare isundaro reta oecha yave Macabeo, otekuarai reta chugüi. Judas joko pe oporomoamɨri mbatee, echa ocho mil rupi oporoyuka jókuae ara.
35Joko güi Judas opia Alema kotɨ, oporepeña jare opɨ̈ro vaerä jókuae tëta re, oyuka opaete kuimbae jokuaeɨgua reta, joko güi omboai jare opa oapɨ jókuae tëta guasu.
36Joko güi oasa opoko vaerä Caspín, Maqued, Bosor jare ïru tëta reta Galaad rupi ñogüɨnoi vae reta re.
37Kuae jaɨkue rupi, Timoteo omboatɨ ïru ejército jare oyembojeyupa Rafón jóvai, ɨ̈aka rovaicho kotɨ.
38Judas omondo isundaro reta oipïaro vaerä jókuae teyupa, kuae reta imiari kërai opaete itumpa ambuae vae reta oñemoïru Timoteo ndive, jare omopüa reta metei ejército vae,
39imiari reta vi ñoraro regua Arabiaɨgua reta ou omborɨ vae re, jae reta ñogüɨnoi ko ɨ̈aka rovaicho kotɨ, jare oïndaivi ñogüɨnoi oporepeña vaerä jese reta. Jökorai yave Judas oë jape pe.
40Oyaro ma yave yogüeru Judas jare isundaro reta ɨ̈aka, Timoteo jei isundaro ruvicha reta pe: “Judas räri oasa yave ɨ̈aka okua vaerä yanderé, ngaraa ñamomara chupe; echa güɨramoi ñaneamɨrita.
41Ërei okɨɨye ko yave, jare oyembojeyupa yave ɨ̈aka rovaicho kotɨño, yaasata yande räri yakua jese ñamoamɨri vaerä.”
42Judas oväe ma yave ɨ̈aka iyɨ́vɨri, oñono sundaro ruvicha reta ɨ̈aka jembeɨ rupi jare oyókuai agüɨye vaerä kia oyembojeyupa jokoropi, echa opaete ko oporepeñata jovaicho re.
43Jökorai oyapo reta, Judas, opaete isundaro reta ndive, oasa jae räri jovaicho reta güi jare omoamɨri opaete jókuae itumpa ambuae vae reta, opa oeya reta jembiporu jare oñepɨ̈ro reta tupao Carnáin pegua pe.
44Israel-ɨgua reta oike jókuae tëta pe jare oapɨ tupao opaete japɨpe pegua reve. Jökorai opɨ̈ro reta Carnáin, echa mbaetɨ omomara Judas pe.
45Judas omboatɨ opaete Israel-ɨgua reta Galaad pe rupi ñogüɨnoi vae, mbaetɨ etei kia oeya, jembireko jare imichia reve reve jaeramiño vi imbaembae reta, opa vaerä oyakavo Judá kotɨ. Matɨ ñapɨta reta oguata jokotɨ.
46Yogüeru oväe reta Efrón pe, jae ko tëta guasu tuicha vae, oñemotiɨ kavi yae vae, tape rupi oï vae. Mbaetɨ yé ketɨ rupi yapia vaerä chugüi; mbɨte rupi etei tape oasa.
47Ërei jokuaeɨgua reta mbaetɨ omaeño jese reta oasa vaerä jokoropi, jáeramo omboatɨ reta ita jöke rupi.
48Judas omondo jei chupe reta ñee kavi rupi: “Roipota roasa peɨvɨ rupi rojo vaerä oreɨvɨ kotɨ. Ngaraa kia mbae pɨ̈chɨi vae ayapo peve. Jaeño ma ko orekɨ̈reɨ roasa.” Ërei jae reta mbaetɨ oipota oipea tape chupe.
49Jayave Judas omondo omombeu isundaro reta pe oïndaivi vaerä ñogüɨnoi.
50Sundaro reta opa oñeñono kavi jenda ñavo rupi, jare opüa reta jókuae tëta guasu re opaete jókuae ara jare jókuae pɨ̈tu, güɨrajai oipɨaka reta.
51Opaetei oyuka japɨpe pegua reta kɨse pe jare tëta opa oitɨ, omboai jare oasa reta tëogüe iárambo rupi.
52Joko güi oasa reta ɨ̈aka Jordán rupi, ojoi oväe ñuu Bet-seán jóvai oï vae pe.
53Ërei ngatu Judas, omboatɨ oyembotaɨkue vae reta jare omoäta ngatu avei jëtara reta oguata yogüɨraja, jökorai ojo oväe reta Judea pe.
54Oyerovia katu jare jorɨ katu reve oyeupi reta ɨvɨ Sión re jare ombaerapɨ reta joko pe, echa oyerova ye jete maraëɨ jare jäta ngatu reve, mbaetɨ reve metei ave omano chugüi reta.
Oë kavi mbae vae jare oë kavimbae vae(2 Mac 12.32-45)55Judas jare Jonatán oyembojeyupa ramboeve ñogüɨnoi Galaad pe, jare vi jëtara Simón Galilea pe, jae ko Tolemaida jóvai,
56José, Zacarías taɨ, jare Azarías, opɨtaño Judea pe ejército juvicharä. Joko pe jërakua chupe reta jëtara Israel-ɨgua reta iñoraro regua;
57jayave jei reta: “¡Tiñanerërakua vi yande! ¡Yaja ñañoraro yandeɨpɨ rupi ñogüɨnoi itumpa ambuae vae reta ndive!”
58Jaema etei omee reta ñee isundaro reta pe, jare omboɨpɨ reta oguata Jabnia kotɨ.
59Ërei Gorgias oë jëta güi isundaro reta ndive oñoraro vaerä jae reta ndive.
60Ojo José jare Azarías iñamɨri jare oñemuñauka reta, güɨrajai güɨroväe reta Judea ɨvɨ pe. Jókuae ara omano dos mil rupi Israel-ɨgua reta.
61Israel pe jasɨ katu yae jókuae iñamɨri mbatee vae, mbaetɨ ramo Judas jare jëtara reta jeigüe oyeapo, oyembokuimbae oyeapo reta ramo.
62Ërei jae reta ko mbaetɨ Israel pe omee yeyora vae reta jëtara.
63Ñoraro regua Judas jare jëtara reta jërakua yae opaete Israel rupi jare ïru tëta guasu rupigua itumpa ambuae vae reta imiari yae jese.
64Jeta rupi yatɨ jese omoäta ngatu vaerä vae.
65Judas ojo jëtara reta ndive oñoraro vaerä Esaú iñemuña reta ndive, ara yevɨ kotɨ. Opɨ̈ro reta Hebrón jare ïru tëta raɨ reta, ombosururu reta ipɨ̈rataka jare jo ɨvate jokoropi ñogüɨnoi vae.
66Joko güi oasa reta Maresa rupi opa yogüɨraja filisteo reta jëta kotɨ.
67Jókuae ara omano mbovɨ katu sacerdote reta, echa ikɨ̈reɨ oyembotuicha jëia pe ramo, oë tëi oñoraro.
68Judas opia Azoto kotɨ, filisteo reta jëta pe, jare omboai tumpa ambuae vae reta pe mɨmba oyeyuka oyeapɨ jese vae, oapɨ tumpa-raanga reta iä jare opavusu reta tëta guasu re, joko güi oyerova ye Judea kotɨ.
Who We AreWhat We EelieveWhat We Do
2025 by iamachristian.org,Inc All rights reserved.
