1Amasías güɨnoi veinticinco año omboɨpɨ oï mburuvicha guasurä yave, jare oiko mburuvicha guasurä Jerusalén pe veintinueve año. Ichɨ jee Joadán, jae ko Jerusalén pegua.
2Oyapo jupi vae yandeYa jesa róvai, yepe tëi mbaetɨ ipɨa jupi rupi kavi.
3Jare Amasías oï kavi ma mburuvicha guasurä yave, oyuka opaete mburuvicha reta tu Joás iyukaa reta.
4Ërei mbaetɨ oyuka jókuae oporoyuka vae reta taɨ reta, mborookuai pe oyekuatía oï rami, Moisés jembikuatía pe, yandeYa oporookuai vae jei: “Agüɨye kia reta tomano taɨ reta jeko re ani taɨ reta tu reta jeko re, metei vae ñavo tomano iyoa ae re.”
5Javoi Amasías omboatɨ opaete Judá pegua reta jare Benjamín pegua reta, jare opa oñono metei ñemuña ñavo vae juvicharä mil vae re jare cien vae re. Javoi oipapa opaete veinte año güɨnoi vae güive ɨvate, jare opaete reve oupitɨ tresciento mil sundaro oyeparavogüe yogüɨraja vaerä ñeraroa pe, güɨnoi mii jare yeopiaka vae reta.
6Güeru vi cien mil sundaro jëia vae reta Israel pegua omboepɨ reve chupe reta tres mil tresciento kilo korepoti pe.
7Ërei metei kuimbae Tumpa iñeemombeúa ou ípɨri, jare jei chupe:
—Mburuvicha guasu, agüɨye toyogüɨraja nderupíe Israel pegua sundaro reta; echa yandeYa mbaetɨ oï Israel ndive, opaete Efraín iñemuña reta ndive.
8Ërei reipotañoi reñemoïru reo jae reta ndive reñeraro vaerä yave, Tumpa nemoamɨriukata tovaicho reta pe; echa Tumpa güɨnoi mbaepuere oporomborɨ vaerä jare oporomoamɨriuka vaerä.
9Amasías oparandu Tumpa iñeemombeúa pe:
—¿Mbae pa jayave oyeapota tres mil tresciento kilo korepoti amee sundaro Israel pegua reta pe vae ndive?
Kuimbae Tumpa iñeemombeúa jei chupe:
—YandeYa ipuere omee ndeve ma jeta jókuae güi.
10Jayave Amasías ombosɨrɨ sundaro reta yogüeru tëi omborɨ Efraín güi vae opa ye vaerä yogüɨraja jëta rupi. Ërei jókuae sundaro reta iyarasɨ yae ete Judá kotɨ, jare iyarasɨ reve opa reta ye yogüɨraja jëta kotɨ.
11Jayave Amasías oñemoäta ngatu jare güɨnoe isundaro reta ɨvɨtɨ päu ipe kavi Yukɨ jee vae pe, jare oyuka reta Seir iñemuña reta güi diez mil.
12Judá pegua reta oporopɨɨ vi jekove reveño diez mil kuimbae jare güɨraja reta metei ɨ̈vavira iyapɨte re; joko güi oitɨ reta ɨ́vɨkotɨ, jare opaetei opë opë reta oa.
13Ërei ngatu sundaro reta, Amasías mbaetɨ omaeño yogüɨraja jae ndive ñeraro pe vae reta, opa ye omondo jëta kotɨ vae reta oike reta omaepɨ̈ro tëta guasu reta Judá pegua rupi, Samaria güive Bet-horón kotɨ, oyuka reta tres mil kuimbae jare opɨ̈ro reta güɨraja iyeupe jeta mbaembae.
14Amasías oyerova ye Edom pegua reta omoamɨri güire, güeru Seir iñemuña reta itumpa reta jare oñono iyeupe itumpa retarä, omboete jare oapɨ chupe ikäti kavi vae incienso.
15Kuae jeko pegua yandeYa iyarasɨ Amasías kotɨ, jare ombou chupe metei ñeemombeúa jei vaerä chupe:
—¿Maera pa reeka ndeyeupe ïru tëtaguasu reta itumpa reta, jókuae mbaetɨ jëtaɨgua reta oepɨ ndepo güi vae?
16Ërei ñeemombeúa jei oï kuaekuae yave, mburuvicha guasu jei chupe:
—¿Ndeparavo reta pa mburuvicha guasu remboarakuaa vaerä? ¡Agüɨye jökorai! ¿Ani reipota pa ndeyuka reta?
Kuae ñee opa jei yave, ñeemombeúa jei:
—Che aikuaa Tumpa oñono ma ndemboai vaerä kuae reyapo jeko pegua, mbaetɨ ramo reipota reendu cheporomboarakuaa.
17Ërei Amasías, mburuvicha guasu Judá pegua, ïru vae reta iporomboarakuaa rupi omondo jei Joás, Joacaz taɨ pe, Jehú jɨmɨmino pe, mburuvicha guasu Israel pegua pe: “Eyu, jare yayoecha, yaecha ra kia jëia.”
18Ërei Joás, mburuvicha guasu Israel pegua omondo jei Amasías, mburuvicha guasu Judá pegua pe: “Yuu Líbano pegua omondo jei ɨ̈vɨrare Líbano pegua pe: ‘Emee nderayɨ cheraɨ jembirekorä.’ Ërei oasa mbaeporou jokoropi jare opa oakɨo oeya jókuae yuu.”
19Nde rere: “Amoamɨri Edom iñemuña reta. Jare jókuae re reyembotuicha jare reyemboete. Ërei ngatu epɨta ndero pe. ¿Maera pa reyemoinge ikavimbae pe nde resusere vaerä jare Judá osusere vaerä?”
20Ërei ngatu Amasías mbaetɨ oipota oendu, echa Tumpa jemimbota ko kuae, jae oipota ramo omee jovaicho reta ipo pe, Edom pegua tumpa reta omboete reta jeko pegua.
21Jare Joás mburuvicha guasu Israel pegua ojo oñeraro Amasías mburuvicha guasu Judá pegua ndive, Bet-semes pe, ɨvɨ Judá pe.
22Ërei Judá pegua reta iñamɨri Israel pegua reta ndive oñeraro yave, jare metei ñavo otekuarai jo kotɨ.
23Joás mburuvicha guasu Israel pegua oipɨɨ tembipɨɨrä Bet-semes pe mburuvicha guasu Judá pegua, jae ko Amasías, Joás taɨ, Joacaz jɨmɨmino, javoi güɨraja Jerusalén pe; jare ombosururu ciento ochenta metro Jerusalén ikësea, öke Efraín jee vae güive öke Ekina jee vae pe oväe regua.
24Jökoraiño vi opɨ̈ro opaete oro jare korepoti, opaete tembiporu reta Tumpa jo pe oime vae Obed-edom oyangareko jese vae, jare mburuvicha guasu jo pe mbaembae jepɨ vae oñeñovatúa güi. Jare opa oipɨɨ mbovɨ mburuvicha reta taɨ reta tembipɨɨrä güire oyerova ye Samaria kotɨ.
25Jare Amasías, Joás taɨ, mburuvicha guasu Judá pegua oiko ye quince año, omano güire Joás, Joacaz taɨ mburuvicha guasu Israel pegua.
26Ïru mbaembae Amasías oyapogüe, tenonde rupi jare taɨkue rupi vae, oyekuatía oï Judá pegua jare Israel pegua mburuvicha guasu reta regua oyekuatía oïa pe.
27YandeYa güi Amasías oyembosɨrɨ güire, Jerusalén pegua reta omboɨpɨ oyovaicho ikotɨ, jare jae otekuarai Laquis kotɨ; ërei oaɨkuemoñauka reta jókuae tëta guasu kotɨ, joko pe oyuka reta.
28Javoi güeru reta metei kavayu re, jare oñotɨ reta iñemuñagüe reta oñeotɨa pe, David Jëta guasu pe.
Who We AreWhat We EelieveWhat We Do
2025 by iamachristian.org,Inc All rights reserved.
