SALMOS 28 - Guarani Bible with DC

SALMO 28YandeYa oendu yandeyerure

1CheYa Tumpa, ndeveño asapukaita;

ita guasu cheñepɨ̈roa,

eendu chesapúkai,

echa mbaetɨ yave reendu cheyerure,

omano vae reta rami ma ko aï.

2Eendu romoñera vae, asapúkai ndekotɨ yave,

chepo aupi ndetupao oñeñono tee vae kotɨ yave.

3Agüɨye chereraja jeko pɨ̈chɨi vae reta ndive,

jupimbae vae reta ndive,

jae reta imiari mbɨakatu re japicha pe,

ërei ipɨa reta pe oï ikavimbae.

4Eiporarauka chupe reta jembiapo oï rupi,

jare jeko kavimbae oï rupi,

eiporarauka chupe reta jae reta oyapo rami.

5Echa mbaetɨ oyemomaendúa reta,

yandeYa oyapogüe re,

¡jae topa tomokañɨtei, jare agüɨye tamaeño topüa ye!

6¡Toyemboeteuka yandeYa,

oyeapɨsaka cheyerure re vae!

7YandeYa jae ko cheñepɨ̈roa jëguambae jare cheyeopiaka,

jese ayeko jare chemborɨ.

Chemboyerovia, amboeteta tairari pe.

8YandeYa jae ko imbae vae reta iñepɨ̈roa jëguambae,

ñepɨ̈roa oporogüɨroasayepe vae jembiparavo peguarä.

9CheYa, eroasayepe ndembae vae reta;

ndeporerekua ndembae vae reta re.

Eyangareko jese reta, vecha iyangarekoa oyangareko jɨmba re rami;

¡emae kavi avei jese reta!