ECLESIÁSTICO 10 - Guarani Bible with DC

Oporookuai vae reta

1Metei mburuvicha iyarakuaa vae omboarakuaa jëta ipo reta;

mburuvicha iyarakuaa vae oï kavi ko.

2Mburuvicha ikavi yave, jökorai vi ko iyɨvɨrigua reta;

tëta ruvicha ikavi yave, jökoraita vi ko jëta ipo reta.

3Metei mburuvicha guasu ipɨakúe katu vae omokañɨtei metei tëtaguasu;

mburuvicha reta iyarakuaa katu yave, tëtaguasu okuakuaa.

4Tumpa ipo pe ko oï ɨvɨ pegua mborookuai;

iara yave ko omee mburuvicha oata chupe vae.

5Tumpa ipo pe ko oï opaete kuimbae reta iporookuai,

jare jae ko omee iporookuai ae mburuvicha pe.

Pɨayemboete

6Oipotagüe ñee jasɨkatu vae agüɨye emboyevɨ pɨ̈chɨi nderapicha pe,

jare agüɨye emomoe ipɨayemboete vae reta jape.

7Pɨayemboete ikaviä ko Tumpa pe jare kuimbae reta pe;

Tumpa jaeramiño vi kuimbae reta güɨröɨro ko tembiporara.

8Mbaepuere oasa metei ɨvɨ güi ïru ɨvɨ pe

pɨarai jare pɨayemboete jeko pegua.

9¿Kia pa ipuereta ipɨayemboete ɨvɨkúi jare tanimburä oiko reve,

oikove oiko reve ichuumbi ma jete vae?

10Mbaerasɨ järea vae, oporopoano vae oyerovia katu;

ërei añave oiko mburuvicha guasu vae, pɨare tëogüerä ko.

11Kuimbae omano yave, taso reta opokota ko jese,

mberu reta jare mbae chuumbi.

12Yembotuicha iyɨpɨ jae ko mbaepuere,

jae ko oyapo kuimbae iñakañɨ vaerä iYapoa güi.

13Imbaeyoa vae jae ko metei ɨvɨkua yembotuicha tɨnɨe vae,

joko güi oë mbae ikavimbae.

Jókuae ramo, Tumpa omotɨnɨe ñenupa pe

jare ombopere ombopaa regua jae ndive.

14Tumpa ombogüeyɨ jenda güi oyembotuicha vae reta,

jaema jendagüe pe eñono paravete vae.

15Tumpa omondoro japo reve tëtaguasu reta,

jare jendagüe rupi ombokuakuaa paravete vae reta.

16Tumpa mbaetɨ oeya tëtaguasu jupimbae reta jaɨkueregüe ave;

oyasɨa japo reve oeya vaerä jaɨkuere ave.

17Omboai ɨvɨ güi, omokañɨtei;

omboai ɨvɨ güi imaenduagüe reve.

18Yembotuicha jupigüeä ko kuimbae pegua,

pɨarai jaenunga vi.

Yomboete añetegüe

19¿Tekove oporomboete vae? Kuimbae reta.

¿Tekove oporomboete vae? Tumpa omboete vae reta.

¿Tekove ikavimbae vae? Kuimbae reta.

¿Tekove ikavimbae vae? Mborookuai oyapo mbae vae reta.

20Jeta oyotɨvɨ vae reta ipɨte pe tenondegua vae ko oyemboete,

ërei Tumpa omboete kia iporomboete ikotɨ vae.

22Oyakavo vae, ketɨgua vae jare paravete vae,

imbaemboete jae ko Tumpa omboete vaerä.

23Agüɨyeta ko ñaröɨro kia iyarakuaa katu vae, yepe paravete vae,

jare mbaetɨ tëi vi yamboete kuimbae jekorai vae.

24Oikokatu vae, mburuvicha jare mburuvicha oporojäa vae pe ko oñemee mboromboete;

ërei ngaraa kia má tuicha jókuae Tumpa pe omee mbaemboete vae güi.

25Metei tembiau iyarakuaa katu vae pe oyeokuaita oikogüɨrai vae reta,

jare yarakuaa vae pe jókuae ngaraa jasɨ.

26Agüɨye ndearakuaa eyeapo ndepɨapotaa reyapo yave,

jare agüɨye eeka yemboete mbae oata oï vae iara pe.

27Má ko ikavi mbaravɨkɨ jare ñanoi vaerä jeta rupi

pea oyererovia katu vae mbaetɨ mbae jou vaerä vae güi.

28Cheraɨ michi, eyemboete ndeiño yembotuicha mbae reve

jare eyeandu reiko vae rami.

29Kia jaeiño oyembosusere vae, ¿kia pa omboeko potaa?

Jare jaeiño oyemboeteuka mbae vae, ¿kia pa omboeteta?

30Oime ko paravete vae iyarakuaa vae re omboete vae,

ërei ïru vae reta ko kia omboete oikokatu jeko peguaño.

31Jaema amogüe, yepe paravete, omboete vae,

ipuere má oikokatu yave.

Jare amogüe, yepe ko oikokatu vae, oñereröɨrouka ko,

ipuere oasa ete paravete yave.